Ապշանք Եւ Զայրոյթ (Միաժամանակ)

Այո՛, միայն ապշանք եւ զայրոյթ կարելի է զգալ կարդալով այն լուրը, ըստ որուն, Ներկայացուցիչներու տան ԵԱՀԿի յանձնաժողովի՝ Հայաստանի յետընտրական կացութեան նուիրուած Ապրիլ 17ի ունկնդրութեան «վկայութիւն» պիտի տան Հայաստանէն երկու դէմքեր, որոնցմէ մէկը նոյնիսկ պաշտօնական հանգամանք ունի:

Վկայութիւն բառը չակերտեցինք: Որովհետեւ եղածը, քիչ մը աւելի պարզ հայերէնով, աւելի մօտ է «եկէք եւ հաշիւ տուէք»ի:

Ըստ լրատուութեան, ունկնդրութեան կիզակէտը Արցախի հարցին եւ «Հազարամեակի մարտահրաւէր» ծրագիրի ապագային վրայ Հայաստանի յետընտրական զարգացումներուն հետեւանքները քննելն է:

Քոնկրէսի տուեալ յանձնախումբը, բնականաբար, ազատ է իր ուզած հարցը քննելու: Խնդիրը հոն չի կայանար:

Առաջին խնդիրը այն է, որ այս նախաձեռնութիւնը ուրիշ բան չէ, եթէ ոչ գերիշխան երկրի մը (այս պարագային՝ Հայաստանի Հանրապետութեան) ներքին գործերուն միջամուխ ըլլալ: Երկրորդ խնդիրը այն է (եւ հոս է ապշեցուցիչն ու զայրացուցիչը մեզի համար), որ հայկական պաշտօնական կողմը հլու-հնազանդ կերպով Ուաշինկթըն պիտի երթայ եւ… հարցաքննուի: Այո, ծուռ նստինք, շիտակ խօսինք, ըլլալիքը հարցաքննութիւն պիտի ըլլայ եւ ոչ թէ հարցապնդում:

Մեր կարծիքով, Հայաստանի իշխանութիւններուն համար թոյլատրելի չէ նման քայլ մը առնելը, որովհետեւ այդ մէկը ոտնակոխել է նոյնինքն Հայաստանի գերիշխանութիւնն ու մանաւանդ՝ արժանապատուութիւնը: Երեւանի պատասխանը պիտի ըլլար՝ հարցե՞ր պիտի քննէք, խնդրեմ, սակայն մենք Երեւանի մէ՛ջ կը լուծենք մեր՝ ներհայկական խնդիրները՝ առանց հաշուետու ըլլալու որեւէ արտաքին կողմի:

Մարտ 1ի դէպքերով արդէն իսկ վիրաւորուած է համայն հայութեան արժանապատուութիւնը, անկախ մեզմէ իւրաքանչիւրին գաղափարական կամ քաղաքական համոզումներէն: Պաշտօնական Երեւանը, իր ներկայացուցիչը «վկայութեան» համար Ուաշինկթըն ղրկելով, կրկնակիօրէն կը խոցէ ամբողջ հայութեան արժանապատուութիւնը: Միւս կողմէ, նախագահական նախկին թեկնածու Լ. Տ. Պետրոսեանի խօսնակ Արման Գրիգորեանի պետական-պաշտօնական հանգամանք չունենալը զինք ու իր «պոսը» չեն փրկեր հայութիւնն ու Հայաստանը անգամ մը եւս վիրաւորող յանցապարտի ոչ պատուաբեր հանգամանքէն:

Վերադառնալով արեւմտեան կողմն աշխարհի, ի դէպ, յիշեցում մը Ներկայացուցիչներու տան (թէեւ՝ ոչ անմիջականօրէն այս յանձնախումբին): Կը յիշէ՞ք, յարգելի ներկայացուցիչներ, թէ մօտաւորապէս եօթուկէս տարի առաջ, հոս, այս երկրին մէջ տեղի ունեցած նախագահական ընտրութիւններուն, Ֆլորիտա կոչուած նահանգին մէջ ընտրական խնդիրներ յառաջացան: Հարցը բարդացաւ, հասաւ մինչեւ Գերագոյն ատեան, եւ երկրին նախագահը «ընտրուեցաւ» ա՛յդ ատեանին կողմէ եւ ոչ թէ ընտրական քուէներով (ինչպէս սովորաբար կ’ըլլայ ժողովրդավար երկիրներու պարագային, չէ՞): Արդեօք ձեր յարգարժան ատեանը որեւէ ունկնդրութիւն կազմակերպե՞ց իմանալու համար ամբողջ ճշմարտութիւնը, թէ ի՞նչ անցած-դարձած էր Ֆլորիտայի մէջ 2000ի Նոյեմբերի առաջին Երեքշաբթի օրը, թէ արդեօք ընտրական գործընթացը բնական ընթացա՞ծ էր հոն:

Յիշելով Ֆլորիտան, մեր զայրոյթն ու ապշանքը կը կրկնապատկուի:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top