Յաղթանակի Տօնակատարում

ԱԲՕ ՊՈՂԻԿԵԱՆ

Վաղը տօն է, եռակի տօն՝ Ղարաբաղի համար, եռակի տօն՝ համայն հայ ժողովուրդի համար:
Տօն է Շուշիի ազատագրութեան:

 օն է Արցախի բանակի կազմաւորման տարեդարձի:

Տօն է Երկրորդ համաշխարհային պատերազմի յաղթանակին. տօն մը, զոր փառաւորապէս նշելու իրաւունքը հայ ժողովուրդը շահած է ի գին անհաշիւ զոհերու:

Փոքրիկ Հայաստանի թաղամասին մէջ, վաղը, առաւօտեան ժամը տասէն սկսեալ, մենք ալ այս երրեակ տօներուն հետ պիտի նշենք մեր համայնքի կարեւորագոյն իրագործումներէն մէկուն՝ ՀՄԸՄի Նաւասարդեան մարզախաղերու, 34րդ փուլի բացումը:

Զուգադիպութեամբ կամ գիտակցութեամբ, կազմակերպողները այս օրը ճշդելով գաղութիս երիտասարդութիւնը խանդավառող, եռամսեայ տենդոտ ժամանակաշրջանով մը զանոնք հայ կեանքին եւ իրարու կապող ձեռնարկներու մեկնարկը՝ խորհրդանշական յաւելեալ իմաստ մը տուած են իրենց ծրագիրին: Յաղթանակի փառաւորման իմաստ:

Արդարեւ, Այս մարզախաղերուն մասնակցող իւրաքանչիւր մարզիկ արդէն յաղթանակած ըլլալու գոհունակութիւնը կրնայ ապրիլ: Յաղթանակած է, որովհետեւ կրցած է պահել իր ազգային դիմագիծը: Յաղթանակած է, որովհետեւ մերժած է միանալ նահանջողներու, թոյլերու ու պարտուողներու խումբին, ու ոչ միայն պահած է իր ազգային դիմագիծը, այլեւ հպարտութեամբ ու ինքնավստահութեամբ կը նայի իր ապագային, եւ իր ազգին, հայրենիքին ու պետականութեան նուաճումներով փառաւորուելու, երջանկանալու ամբողջական գիտակցութիւնը ունի:

Շնորհաւոր ըլլայ տօնդ, Նաւասարդեան մարզիկ:

Շնորհաւոր ըլլայ ձեր տօնը, Նաւասարդեան մարզիկի ծնողներ, կազմակերպիչներ, հանդիսատեսներ, ծափահարողներ:

 Շնորհաւոր ըլլայ մեր բոլորին երրեակ տօնը:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top