Ռուսիա Եւ Հայաստան Ստորագրեցին 500 Միլիոն Տոլար Վարկի Համաձայնագիր

 Ռուսիոյ եւ Հայաստանի ելեւմուտի նախարարներ Ալեքսէյ Քուտրին եւ Տիգրան Դաւթեան, Չորեքշաբթի օր, Մոսկուայի մէջ ստորագրեցին 500 միլիոն տոլար վարկի շուրջ համաձայնագիր մը: Վարկը պիտի տրամադրուի 15 տարուան ժամկէտով՝ ԼԻԲՕՐ առաւել տարեկան 3 տոկոս տոկոսադրոյքով:
 Նշենք, որ նախարարներու հանդիպումը կատարուած է Եւրասիական տնտեսական համագործակցութեան կազմակերպութեան հերթական հաւաքի շրջանակէն ներս: Հայաստան նշեալ կազմակերպութեան մէջ ունի դիտորդի կարգավիճակ:

 Անդրադառնալով վարկին՝ Քուտրին նշած է, թէ հիմնական պարտքին մարումը պիտի սկսի միայն 5 տարի ետք: Դաւթեան, իր կարգին յայտնած է, որ՝ «Վարկին պայմանները համարժէք են Հայաստանի տնտեսութիւնում առկայ պայմաններին», եւ թէ այս համաձայնագիրը կը հաստատէ երկկողմանի ռազմավարական համագործակցութեան բարձր մակարդակը:

 Հայաստանի նախարարին համաձայն, վարկով ձեռք բերուած միջոցները պիտի տրամադրուին Հայաստանի տնտեսութեան խթանման եւ փոքր ու միջին ձեռնարկութեանց աջակցելու նպատակին: «Այս պայմանաւորուածութիւնը լուրջ աջակցութիւն է Հայաստանի տնտեսութեանը՝ ներկայիս ճգնաժամի պայմաններում», ռուսական լրատուամիջոցներուն յայտնած է հայ նախարարը:
 Նշենք, որ սոյն վարկը տրամադրելու խնդրանքով Հայաստան Ռուսիոյ դիմած էր ընթացիկ տարուան սկիզբը: Իսկ Ռուսիա զարգացման վարկեր արդէն տրամադրած է Պելոռուսին եւ Ղրղզստանին՝ յաջորդաբար 1.5 միլիառ եւ 300 միլիոն տոլարի ծաւալով, եւ ըստ Ալեքսէյ Քուտրինի, տակաւին այլ երկիրներ, ինչպէս՝ Չինաստան, Հնդկաստան եւ Պուլկարիա, դիմումներ կը ներկայացնեն Ռուսիոյ՝ վարկեր ստանալու միտումով:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top