Հայ Դատի Թելեթոնին Մասնակցութիւնը Ազգային Պարտաւորութիւն Է

  Պահը արդէն հասաւ:
 Վաղը կէսօրէ ետք ժամը երեքին կը սկսի Ամերիկայի Հայ Դատի Յանձնախումբի Հիմնադրամի հանգանակային թելեթոնը:
 Կազմակերպիչները պատրաստած են վեց ժամնոց ծրագիր մը, որու ընթացքին պիտի ներկայացուի գեղարուեստական յայտագիր եւ Հայ Դատի վերաբերեալ նիւթեր:
 Ծրագրի ընթացքին պիտի ըլլան նաեւ կոչեր ու դիմումներ, որոնք պիտի փորձեն ձեր մասնակցութիւնը ապահովել համազգային նշանակութեամբ այս հանգանակային արշաւին:
 Ձեռնարկի համազգային նշանակութեան մասին կը վկայեն բազում փաստեր:
  Արդարեւ, Ուաշինկթընէն սկսեալ մինչեւ ամերիկեան խուլ անկիւններ տարածուող Հայ Դատի ճանաչումը ապահովող աշխատանքները ոչ մէկ հատուածական բնոյթ ունին, ոչ մէկ կուսակցութեան շահերով կամ գաղափարներով չեն ղեկավարուիր:

 

 Այդ աշխատանքներու անցեալի ձեռք բերած արդիւնքներով հպարտ ենք բոլորս, անխտիր:
 Այդ աշխատանքներու արդիւնքներուն շնորհիւ մեր համայնքը ձեռք բերած է լայն ճանաչում ոչ միայն Ամերիկայի Միացեալ Նահանգներու, այլեւ ամբողջ աշխարհի մէջ:
 Ճանաչում եւ հեղինակութիւն:
 Ճանաչում եւ ազդեցութիւն:     
 Այդ աշխատանքներու արդիւնքներէն է, որ հայ երիտասարդ տղաներ ու աղջիկներ հպարտութեամբ ու ինքնավստահութեամբ քաղաքական ասպարէզ մտնելու հեռանկարներ կը փայփայեն ու ծրագիրներ կը մշակեն:
 Այդ աշխատանքներու գնահատականը տուած է նախ եւ առաջ մեր ժողովուրդը՝ իր անսակարկ նեցուկով:
 Այդ աշխատանքներու գնահատականը տուած է հայոց պետութիւնը, որ երախտագիտօրէն կը հետեւի, ուղղակիօրէն կամ անուղղակիօրէն կը խրախուսէ այդ աշխատանքները, իր արտաքին քաղաքական մշակումներուն մէջ հաշիւ կÿընէ անոնց վրայ:
 Այդ աշխատանքներու գմահատականը տուած են մեր հակառակորդները՝ Թուրքիոյ եւ Ատրպէյճանի իշխանաւորները, ո-րոնց հակահայ քաղաքականութեան առանցքային ծրագիրներուն մէջ միշտ նկատի առնուած են այդ աշխատանքներու արդիւնքները չէզոքացնելու կոչուած ձեռնարկներ, որոնց համար անոնք միլիոնաւոր տոլարներ կը յատկացնեն իրենց պետական հարուստ պիւտճէներէն:
 Փաստերը համոզիչ են: պահանջուածն ալ, հասկնալիօրէն, կ՛ենթադրէ զոհողութիւն, մանաւանդ տնտեսական այսօրուան պայմաններուն: բայց ուրիշ ելք չկայ, ուրիշին չենք կրնար վստահիլ: Պարտաւորութիւնը մերն է, մեր հաւաքականութեան: Մարտահրաւէրը մերն է, մեր հաւաքականութեան դէմ
ծառացած է ու մենք հաւաքաբար պիտի դիմագրաւենք զայն:
 Մեր կոչը.
 Մասնակցեցէ՛ք այս հանագանակային արշաւին անպայման:
 Մասնակցեցէ՛ք ձեր կարողութեան չափով:
 Մասնակցեցէ՛ք ձեր կարողութենէն քիչ մը աւելիով:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top