Մինչ Թուրքերը Երաշխիքներ Կու Տան՝ Պաքուի Մէջ Ցուցարարներ Կ՛այրեն Թուրք Ղեկավարներու Նկարներ

 ՊԱՔՈՒ, ԱՆԳԱՐԱ, «Արմէնփրէս», «Էյ.Փի.Էյ.», «Մարմարա».- Երեքշաբթի, Հոկտեմբեր 13ին, ատրպէյճանցի ազգայնամոլներու «Ղարաբաղի ազատագրութեան կազմակերպութիւն»ը, Պաքուի մէջ Հայաստան-Թուրքիա արձանագրութիւններու ստորագրման դէմ բողոքի ցոյց կազմակերպած է։
 Ատրպէյճանի մէջ Թուրքիոյ դեսպանատան առջեւ տեղի ունեցած ցոյցին ընթացքին ցուցարարներ պոռացած են՝ «Ամօթ Թուրքիոյ իշխանութիւններուն», «Թուրքիա՛, Ղարաբաղը հայերուն մի վաճառեր» եւ «Կա՛մ Ղարաբաղ, կա՛մ մահ»: Ցոյցին ընթացքին ցուցարարները նաեւ հրկիզած են Թուրքիոյ նախագահին, վարչապետին եւ արտաքին գործոց նախարարին նկարները, որոնց վրայ նախապէս սեւ խաչեր քաշած էին։

1015baku

Բողոքի ցոյցը տեւած է տասը վայրկեան, ապա ոստիկանութիւնը ցրուած է զայն։ Ձերբակալուած են ցոյցի քանի մը մասնակիցներ, որոնց շարքին նշեալ կազմակերպութեան նախագահ Աքիֆ Նատին։
 Ցուցարարները չեն յաջողած դեսպանատան յանձնել բողոքի բանաձեւը, որուն մէջ Թուրքիոյ իշխանութիւններէն պահանջած էին հրաժարիլ Հայաստանի հետ սահմանի բացումէն եւ չշարունակել բանակցութիւնները։
 Միւս կողմէ, Թուրքիոյ իշխանութիւնները շարունակեցին երաշխիքներ տալ Ատրպէյճանի, թէ՝ սահմանները պիտի չբացուին, եթէ չլուծուի Արցախին տագնապը:
 Արդարեւ, Թուրքիոյ կառավարութեան պաշտօնական ներկայացուցիչ Ճեմիլ Չիչէք յայտարարեց, թէ Հայաստան պէտք է «հեռանայ ատրպեճանական գրաւեալ տարածքներէն» եւ աւելցուց, թէ Ցիւրիխի մէջ ստորագրուած Հայաստան-Թուրքիա արձանագրութիւնները հաւանաբար յառաջիկայ շաբաթ պիտի ներկայացուին Թուրքիոյ խորհրդարան:
 Նաեւ, Երեքշաբթի օր հաղորդուեցաւ, թէ յառաջիկայ շաբաթ Ատրպէյճան պիտի մեկնի Թուրքիոյ արտաքին գործոց նախարար Ահմէտ Տաւութօղլու, որովհետեւ Պաքու «խստօրէն անհանգստացած է» այն իրողութենէն, թէ՝ «Երեւանի հետ յարաբերութիւնները Ղարաբաղի հարցի լուծմամբ պայմանաւորելու մասին Պաքուին տրուած բարձր մակարդակի խոստումներուն հակառակ», Թուրքիան Հայաստանի հետ յարաբերութիւնները բարելաւելու արձանագրութիւններ ստորագրած է:
 Ատրպէյճանի խորհրդարանը 11 հոգինոց պատգամաւորական պատուիրակութիւն մը ղրկած է Անգարա՝ «համոզելու» թուրք խորհրդարանականները չվաւերացնել արձանագրութիւնները:
 Ատրպէյճանի մօտ Թուրքիոյ դեսպանատունը եւս լուսաբանութիւն մը ղրկած է Ատրպէյճանի մամուլին՝ վստահեցնելով «եղբայրական» Ատրպէյճանի ժողովուրդին, թէ՝ «Հայաստանի սահմանի բացումը խնդրոյ առարկայ չի կրնար ըլլալ, այնքան ատեն, որ հայկական կողմը Ատրպէյճանի հողամասերը չի պարպեր»։ Հոն կոչ կ՛ըլլայ ատրպէյճանցիներուն, որ չհաւատան «սուտ ու սխալ լուրերու»։
 Վերջապէս, Թուրքիոյ խորհրդարանի Արտաքին գործոց յանձնախումբի նախագահ Մուրատ Մէրճան ըսաւ, թէ այնքան ատեն, որ Ատրպէյճանի «գրաւուած հողամասերը չեն պարպուած», կարելի չէ սպասել, որ խորհրդարանը կրնայ վաւերացնել ստորագրուած արձանագրութիւնները: «Վաւերացման գործընթացը կախեալ է Հայաստանի ու Ատրպէյճանի յարաբերութիւններու զարգացումէն։ Կրնանք ըսել, թէ  յարաբերութիւններու հաստատումը գտած է իր ուղին, բայց ամէն ինչ վերջացած չէ։ Պէտք չէ յուսալ, որ խորհրդարանը «փրոթոքոլ»ները կը վաւերացնէ առանց գրաւուած հողամասերու պարպումին», պնդեց ան:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top