Ատանայի Ջարդի Հարիւրամեակին Նուիրուած Համագումարը

 

 ԱՆԹԻԼԻԱՍ.– Հինգշաբթի 29 Հոկտեմբերին, հովանաւորութեամբ եւ նախագահութեամբ Արամ Ա. կաթողիկոսի, Անթիլիասի Մայրավանքի Վեհարանին մէջ բացումը կատարուեցաւ Ատանայի ջարդի  հարիւրամեակին նուիրուած համագումարին, մասնակցութեամբ Լիբանանէն, Սուրիայէն, Հայաստանէն, Կիպրոսէն, Յունաստանէն, Իտալիայէն, Ֆրանսայէն, Իրանէն եւ այլ երկիրներէ ժամանած մասնագէտներու:

1031adana
 Համագումարի բարի գալստեան խօսքը արտասանեց կազմակերպիչ յանձնախումբի ատենապետ Նարեկ եպս. Ալեէմէզեան: Ապա, հայրապետական իր օրհնութիւնը տալով համագումարին, վեհափառ կաթողիկոսը սոյն համագումարին արդիւնաւէտ աշխատանքին համար կատարեց կարգ մը թելադրութիւններ: «Զգացականին դիմաց՝ իրապաշտը, ընդհանրացումներուն փոխարէն՝ մասնաւորը, նկարագրողականին տեղ՝ վերլուծականը տալ», թելադրեց ան: «Մենք ըսելիք ունինք, սակայն մեր խօսքը չէ՛ այդ միայն, այլ մեր նահատակներո՛ւն խօսքը, զոր պէտք է ըսենք յստակօրէն», աւելցուց ան:
 Բացման նիստին, Մկրտիչ Պուլտուգեան ներկայացուց համագումարի առաջին նիւթը, որ Ատանայի մէջ հայութեան ներկայութեան մասին համապարփակ ծանօթացում մըն էր, իր հոգեւոր, կրթական, ընկերային, թուային ու այլ բնագաւառներով:
 Անկէ ետք, առաջին նիստը յատկացուեցաւ ականատեսներու վկայութիւններուն եւ ուսումնասիրութիւններու: Սոյն կալուածին մէջ, դասախօսութիւններ ներկայացուցին Արմէն Գլոտ Մութաֆեան («Ատանան Եւրոպացի ճամբորդներուն համաձայն»), Ժերար Տէտէյեան («Միջամուխ ըլլալու իրաւունքին ռահվիրայ մը՝ ֆրանսացի հիւպատոս Ֆերտինանտ Ռօք-Ֆէրիէ»), որուն դասախօսութիւնը ի բացակայութեան կարդացուեցաւ, եւ Նազարէթ Պէրպէրեան («Ազատախոհ Եւրոպայի պատասխանատուութեան բաժինը Ատանայի կոտորածին նախաձեռնողները անպատիժ ձգելու յանցագործութեան մէջ»):
 Երեւանէն ժամանած զեկուցաբերներ Վերժինէ Սվազլեան եւ Քնարիկ Աւագեան ներկայացուցին «Ատանայի կոտորածը ըստ ականատես վերապրողների վկայութիւնների» եւ «Ատանայի կոտորածը եւ ամերիկահայութիւնը» զեկոյցները:
 Ապա ներկաները ունկնդիր դարձան Գրիգոր Ծ. վրդ. Չիֆթճեանի «Մուշեղ եպս. Սերոբեանի օրագիրը» զեկոյցին: Մուշեղ եպս. Սերոբեան եղած է Ատանայի առաջնորդ, ու թէեւ ջարդի օրերուն ան բացակայ եղած է Կիլիկիայէն, սակայն անոր օրագրութիւնները Ատանայի մասին կատարուած ուսումնասիրութիւններուն մէջ կարեւոր տեղ կը գրաւեն:
 Պատմաբան Երուանդ Փամպուքեան զեկուցեց «Սիմոն Զաւարեան եւ Ատանայի աղէտը» թեմային շուրջ: Աղէտի օրերուն Զաւարեան կը գտնուէր Պոլիս: Իր կուսակցական ընկերներուն գրած նամակներուն մէջ կը նկարագրուին ջարդերուն ահաւոր տեսարանները:
 Հոկտեմբեր 29ին, համագումարի երկրորդ օրը ելոյթներ ունեցան նաեւ Կիպրոսի թեմի կաթողիկոսական փոխանորդ Վարուժան արք. Հերկելեան, որ ներկայացուց «Ատանայի կոտորածը եւ Կիպրոսը», եւ Կարօ Յովհաննէսեան՝ «Հայութեան նիւթական եւ մարդկային կորուստը Ատանայի մէջ» զեկոյցը: Վարուժան արք. Հերկելեանի զեկոյցէն իմացանք, որ հաւանաբար Կիլիկիոյ աղէտի զոհերուն առաջին յուշարձանը Լառնագայի Ս. Ստեփանոս մատուռն է՝ կառուցուած 1912 թուականին:
 Բոլոր նիստերուն յաջորդեցին լայն քննարկումներ:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top