Ամերիկացի Նախկին Դիւանագէտը Կը Բացայայտէ Ցեղասպանութեան Ճանաչման Դէմ Ջանքերը

 ՈՒԱՇԻՆԿԹԸՆ.-  Ամերիկայի Հայ Դատի յանձնախումբը կը տեղեկացնէ, թէ ամերիկացի նախկին դիւանագէտ եւ դեսպան Արմա Ճէյն Քարէր բացայայտած է շարք մը ցնցիչ տեղեկութիւններ, Հայկական Ցեղասպանութեան ճանաչման բանաձեւերը ձախողութեան մատնելու համար Թուրքիոյ տարած աշխատանքներուն մէջ Միացեալ Նահանգներու արտաքին գործոց նախարարութեան մեղսակցութեան մասին:

 1980ական թուականներուն տեղի ունեցած Ցեղասպանութիւնը ուրանալու միտող այս քայլերը բացայայտուած են Քարէրի հետ տեղի ունեցած հարցազրոյցի մը ընթացքին: Հարցազրոյցը, որ կատարուած է ապագայ դիւանագէտներ պատրաստելու գործին մաս կազմող բերանացի պատմութիւնները ամբարելու աշխատանքին ծիրէն ներս, վերջերս հանրութեան տրամադրելի դարձած է Քոնկրէսի գրադարանին կողմէ:

 Յայտնենք, թէ ամերիկացի դիւանագէտը Անգարայի մօտ Միացեալ Նահանգներու դեսպանատան առեւտրական գրասենեակի պատասխանատու, ինչպէս նաեւ արտաքին գործոց նախարարութեան մէջ Թուրքիոյ բաժնի գրասենեակի բարձրաստիճան պաշտօնատար եղած է:

 «Դեսպան Քարէրի հարցազրոյցը կը տարածենք, որովհետեւ հոն կը բացայայտուին իսկապէս զարմացնող եւ ցնցիչ տեղեկութիւններ ցեղսապանութեան ուրացման աշխատանքներուն մասին: Որքան, որ ցաւալի է կարդալ անոր խօսքերը, անոնք ցոյց կու տան, թէ ամերիկացի պաշտօնատարներ ինչ մակարդակներու իջած են, Հայկական Ցեղասպանութիւնը ուրանալու Թուրքիոյ քաղաքականութիւնը իրականացնելու համար: Դժբախտաբար պատեհապաշ այդ մօտեցումը կը շարունակուի ի զօրու մնալ մինչեւ այսօր եւ քիչերն են, որ բարոյականութիւնը առաջնահերթ կը դասեն անցողիկ շահերէն», կը յայտնէ Ամերիկայի Հայ Դատի յանձնախումբի վարիչ գործավար Արամ Համբարեան:

 Հարցազրոյցին մէջ, կրկնելէ ետք Ցեղասպանութեան մասին Թուրքիոյ պաշտօնական կեցուածքը, Քարէրի կը պատմէ, թէ ինչպէս ինքը եւս դերակատար եղած է Հայկական Ցեղասպանութեան բանաձեւները ձախողութեան մատնելու աշխատանքին մէջ եւ կ՛ընդունի, թէ հրէական լոպպին եւս նպաստած է Թուրքիոյ ջանքերուն:

 Ամբողջ հարցազրոյցը կարդալու համար այցելել մեր համացանցային կայքը՝ www.asbarez.com:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top