Ըստ Կիրօ Մանոյեանի՝ Ղարաբաղը Պէտք է Աւելի Վճռական Ըլլայ

 

 ԵՐԵՒԱՆ, «Երկիր».- ՀՅԴ Բիւրոյի Հայ Դատի եւ քաղաքական հարցերու գրասենեակի պատասխանատու Կիրօ Մանոյեան Դեկտեմբեր 10ին կայացած ասուլիսի մը ընթացքին անդրադարձած է Ղարաբաղի հարցին:

 Կարեւոր համարելով բանակցային գործընթացին Ղարաբաղի մասնակցութիւնը՝ դաշնակցական գործիչը նշած է, որ եթէ Հայաստան իր մօտեցումը չփոխէ, բանակցութիւններուն մէջ Ղարաբաղի մասնակցութիւնը չի կրնար   իրականանալ: Ըստ իրեն անհրաժեշտ է, որ Հայաստանը պահանջէ, Ղարաբաղը հիմա իսկ մասնակցի բանակցութիւններուն:

 «Այլապէս Ղարաբաղը միշտ ներկայացուելու է որպէս խոչընդոտ», նշած է  Կ. Մանոյեան աւելցնելով, որ Ղարաբաղի իշխանութիւններն ալ պէտք է իրենց հերթին աւելի վճռական ըլլան մասնակցութեան պահանջը ներկայացնելուն մէջ։ 

 Օպամա-Էրտողան հանդիպումի արդիւնքները գնահատելով, Մանոյեան յայտնած է, որ Թուրքիա յաջողած է իր շահերուն համապատասխանեցնել զանոնք:

 Ըստ ՀՅԴ գործիչին, Հայաստանի հետ յարաբերութիւններուն բարելաւման համար Արցախի հարցին մէջ առաջընթացը պայման համարելը անգամ մը եւս առիթ կու տայ ըսելու, որ Հայաստանի իշխանութիւնները պէտք է այսօր իսկ դուրս գան բանակցութիւններէն՝ մեղադրելով Թուրքիոյ իշխանութիւնը, որ կը փոխեն խաղի կանոնները եւ կը տապալեն՝ բանակցութիւնները:

 Նշենք, որ բանակցութիւններու տապալման քայլերէն մէկը Դեկտեմբեր 7ին Թուրքիոյ խորհրդարանի արտաքին յարաբերութիւններու յանձնաժողովին կողմէ արձանագրութեան մասին եզրակացութեան հրապարակման ակնկալիքն էր, որ տեղի չունեցաւ: Այժմ Հայաստանը որքան շուտ դուրս գայ բանակցութիւններէն, այնքան կը կրճատուի ապագային անոր կրելիք վնասները, ըսած է Մանոյեան:
 Բանախօսը ծիծաղելի համարած է Էրտողանի յայտարարութիւնը, թէ իր կառավարութիւնը չի կրնար Մէճլիսի վրայ ճնշում բանեցնել:

  «էրտողանը ուղղակի չի ուզում իր վրայ պատասխանատուութիւն վերցնել», նշած է Կ. Մանոյեան, որ  ուշացած եւ անհամարժէք համարած է նաեւ մեր արտաքին գործոց նախարարին յայտարարութիւնը, ըստ որուն՝ հայ-թրքական երկխօսութեան մէջ նախապայմաններուն լեզուով խօսիլը կը նշանակէ վերադարձ «փակ շրջան»:

 Խօսելով «Ողջամիտ ժամկէտ»ի առեղծուածին մասին՝ Կ. Մանոյեան նշած է, որ Հայաստանի համար անիկա կարծես թէ եկող Փետրուար-Մարտն է: Իսկ Թուրքիան անպայման կը յաջողի դիւանագիտական խաղ մը բանեցնել մինչեւ Ապրիլ՝ անգամ մը եւս պատեհութիւն տալով Օպամային, որ Ցեղասպանութեան մասին իր «չփոխուած տեսակէտը» չյայտարարէ:

 Ըստ Կ. Մանոյեանի, կասկածէ վեր է, որ Թուրքիոյ համար Հայաստանի հետ յարաբերութիւններու հաստատումը այլեւս առաջնահերթութիւն չէ։ Անոր հաւաստումով Թուրքիային կը հետաքրքրէ միայն գործընթացի առկայութիւնը, որու միջոցաւ ան կը խուսափի միջազգային ճնշումներէ:

 «Անցած տարի, երբ Թուրքիան վարչապետ, արտգործնախարար ու գլխաւոր շտապի պետ էր ուղարկում Ուաշինկթըն, որպէսզի բանաձեւի կամ Օպամայի հաւանական յայտարարութեան դէմ աշխատանք տանեն, մենք չկարողացանք մեր իշխանութիւններից՝ ո՛չ նախագահից, ո՛չ ԱԺ նախագահից, ո՛չ արտգործնախարարից նամակ ապահովել, որ ԱՄՆ Կոնգրէսի կամ նախագահի կողմից նման բանաձեւ կամ որոշումը չի խոչընդոտի Հայաստան-Թուրքիայի յարաբերութիւններին: Այսօր այլեւս հեռու չէ Ապրիլի 24ը, ու պարզ չէ, թէ պետութիւնը ինչպէս է նշելու Ցեղասպանութեան 95 ամեակը: Ո՛չ կառավարական յանձնաժողով կայ… ոչինչ չկայ: Կարող է Մարտին ինչ-որ բան որոշեն, բայց դա արդէն անլրջութեան մակարդակը ցոյց կը տայ այս հարցում», նշած է Կ. Մանոյեան:

 Ըստ բանախօսին՝ Թուրքիան միջամուխ կ՛ըլլայ Ղարաբաղեան բանակցութիւններուն: Անոր հաւաստումով՝ Մինսկի խումբի համանախագահները կը փորձեն Ղարաբաղի հարցի լուծման բանակցութիւններու տրամաբանութենէն առաջ վազել, որ կ՛ենթադրէ, թէ մէկը ճնշում կը գործադրէ իրենց վրայ:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top