Առաջնորդ Նշան Եպիսկոպոս Թօփուզեան Ոչ Եւս Է

Արամ Ա. կաթողիկոս եւ Կիլիկեան ուխտի միաբանութիւնը խոր վիշտով կը գուժեն միաբանութեան երիտասարդ անդամներէն, Ատրպատականի Հայոց թեմի առաջնորդին՝ Նշան եպս. Թօփուզեանի (1966-2010) վաղաժամ վախճանումը, որ պատահեցաւ Երեքշաբթի Ապրիլ, 27ին, յետ կարճատեւ հիւանդութեան:
Նշան եպս. Թօփուզեան, աւազանի անունով Արա, ծնած է 1966ին, Շթորա, Լիբանան։ 1984ին, աւարտելէ ետք Կիլիկիոյ կաթողիկոսութեան դպրեվանքի ժառանգաւորաց հնգամեայ ուսումնական շրջանը, ձեռնադրուած է սարկաւագ։ Յաջորդ երեք տարիներուն աւարտած է Դպրեվանքի ընծայարանի ուսումնական շրջանը եւ 1987ին ձեռնադրուած է կուսակրօն քահանայ, ձեռամբ՝ երջանկայիշատակ Գարեգին Բ. կաթողիկոսին եւ վերակոչուած՝ Նշան աբեղայ։

Փետրուար 1991ին, իբրեւ այցելու հոգեւորական Ատրպատականի հայոց թեմին՝ ան առաքուած է Թաւրիզ, Իրան։ Նոյն տարուան Մայիսին, Գարեգին Բ. կաթողիկոս զինք նշանակած է այդ թեմի կաթողիկոսական փոխանորդ։ Շուրջ 11 տարի, իբրեւ կաթողիկոսական փոխանորդ ծառայելէ ետք, Օգոստոս 2002ին ընտրուած է Ատրպատականի հայոց թեմի առաջնորդ։ Յունիս 4, 2006ին, եպիսկոպոսական ձեռնադրութիւն ստացած է ձեռամբ Արամ Ա. կաթողիկոսին։
Ատրպատականի թեմէն ներս հոգելոյս սրբազանի 19 տարիներու ծառայութիւնը եղած է բազմաբեղուն։ Իր գլխաւորութեամբ եւ թեմի Պատգամաւորական ժողովի ու Թեմական խորհուրդի սերտ գործակցութեամբ, հիմնովին նորոգուած են Թաւրիզի չորս եկեղեցիներն ու առաջնորդարանը, կառուցուած են Թաւրիզի «Նարեկ» բնակարանային համալիրը եւ Հայ մշակութային «Արարատ» կազմակերպութեան կեդրոնատեղին։ Նաեւ Ուրմիոյ մէջ կառուցուած է նոր եկեղեցի։
Հիւսիսային Իրանի տարածքին գտնուող պատմական բազմաթիւ եկեղեցիներու եւ վանքերու, յատկապէս Ս. Թադէի եւ Ս. Ստեփանոս Նախավկայի վանքերուն ու Ծործորի եկեղեցւոյ նորոգութեանց եւ պահպանումի գործին մէջ մեծ վաստակ ունէր սրբազանը։ Քանիցս իր անձը վտանգի ենթարկելով՝ Արաքս գետի իրանական ափէն հետեւած ու նկարահանած էր Արաքս գետի միւս ափին, Նախիջեւանի սահմանին գտնուող հին æուղայի պատմական գերեզմանատան հազարաւոր խաչքարերու քանդումը Ատրպէյճանի բանակին կողմէ։
Սրբազանը լաւապէս կը տիրապետէր պարսկերէն եւ ատրպեճանական թրքերէն լեզուներուն։ Իր վաղաժամ վախճանումը մեծ կորուստ մըն է Կիլիկիոյ կաթողիկոսութեան, Ատրպատականի հայոց թեմի ժողովուրդին եւ ընդհանրապէս հայ եկեղեցւոյ եւ ժողովուրդին համար։
Երանական խաղաղութի՜ւն իր հոգւոյն եւ հանգի՜ստ իր երիտասարդ աճիւններուն:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top