Յայտնի Աստղերու Համար Հագուստներ Կարելը Չի Բաւարարեր Սեպուհին

ԼՈՍ ԱՆՃԵԼԸՍ.- Լիբանանէն 1978ին Լոս Անճելըս փոխադրուած եւ շուտով լաւ դերձակի հռչակ շահած Սեպուհին համար հոլիվուտեան յայտնի աստղերուն հագուստ կարելը միջոց մըն է, որպէսզի կարենայ ընել այն, ինչ կը սիրէ ընել՝ երգել:
Սեպուհ կ՛երգէ յանուն բարեգործութեան: Ինք համալսարան երթալու առիթ չէ ունեցած, ուստի կ՛ուզէ օգնել անոնց, որոնք նիւթականի պատճառով պիտի զրկուէին ուսում ստանալու կարելիութենէն:
Իր բարեգործութիւնը Սեպուհ կեդրոնացուցած է Հայկազեան քոլեճի ուսանողներու վրայ՝ հովանաւորելով արժանաւոր ու նիւթական անձուկ վիճակի մէջ գտնուող ուսանողներ ու յանձն առնելով անոնց կրթաթոշակի վճարումը:
Նիւթական անհրաժեշտ միջոց գոյացնելու համար, Սեպուհ կ՛երգէ, ճաշկերոյթ-երգահանդէս կը կազմակերպէ ու իր խումբով կը զուարճացնէ հայ եւ օտար բարեկամներ: Ձեռնարկին հասոյթը կ՛երթայ կրթաթոշակի ֆոնտին:
Սեպուհին խոստացանք, որ իր գործունէութեան՝ արուեստի ու բարեգործութեան ոլորտներուն մէջ, յետագային դարձեալ անդրադառնանք: Առ այժմ, կը բաւարարուինք յայտնելով, որ Սմոքի Ռապինսընի, Փօլ Անքայի նման արուեստագէտներու ու Լի Պաքայի նման մարդոց դերձակ Սեպուհը (իր հաստատութեան անունն է՝ «ՍիՊօ», SiBeau) Յունիս 26ին դարձեալ պիտի կազմակերպէ ճաշկերոյթ-երգահանդէս մը՝ նոյն բարեսիրական ծրագիրին համար դրամ ապահովելու նպատակով:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top