Asbarez News - Armenian Edition » Միջազգային

Տինքի Սպանութեան Հարցով Հայցագիր՝ Թուրքիոյ Արդարութեան Նախարարին

Asbarez Staff — Fri, 25 May 2012 00:07:38 +0000

ՊՈԼԻՍ, «Մարմարա».- Թուրքիոյ կառավարութեան գլխաւոր ընդդիմադիր՝ Հանրապետական ժողովրդային կուսակցութեան նախագահի տեղակալ Սեզկին Թանրըքուլու, Հրանդ Տինքի սպանութեան դատավարութեան կապակցութեամբ խորհրդարանին յղեց հարցագիր մը՝ պահանջելով, որ այդ հարցագիրին պատասխանէ արդարադատութեան նախարար Սատուլլահ Էրկինը։ Հարցագիրին մէջ Թանրըքուլու նախ կը պնդէ, որ ոճրագործը ոստիկանական կարգ մը շրջանակներու կողմէ դիմաւորուեցաւ որպէս հերոս ու այդ ոստիկանները չպատժուեցան։ Ապա ան կը յիշեցնէ, որ Տինքի սպանութենէն ետք իշխանութիւնները յայտնած էին, որ սպանութեան բուն հեղինակները մէջտեղ պիտի հանուին, սակայն այդ խոստումը չէ իրականացած:

Ան նաեւ կը յիշեցնէ, թէ Մարդկային իրաւունքներու եւրոպական ատեանը արձակած է վճիռ մը այն մասին, թէ անհրաժեշտ հարցաքննութիւնները չեն կատարուած այս գործին միջամուխ պաշտօնեաներու հետ։ «Ի՞նչ քայլեր առնուեցան, երբ եւրոպական ատեանը վճռեց, որ հարցաքննութեան ազդու միջոցառումներ չեն գործադրուած պաշտօնեաներու մասին։ Որո՞նք են անոնք, որոնք թերացում ունեցած են Հրանդ Տինքի դատավարութեան խնդիրին մէջ եւ անոնց կապակցութեամբ ինչպիսի՞ քայլեր առնուած են։ Անհրաժեշտ տեղեկութիւնները տրուա՞ծ են Եւրոխորհուրդին։ Ի՞նչ պատճառով կը պաշտպանուին այն անձերը, որոնք ամբողջ աշխարհի հետաքրքրութեան արժանացած այս դատավարութեան մէջ թերացումներ ունեցած են։ Արդեօք Հրանդ Տինքի սպանութեան կապակցութեամբ կա՛ն կարգ մը խնդիրներ, որոնք պէտք չէ փոխանցուին Եւրոխորհուրդ: Մէջտեղը սպանութիւն մը կայ եւ տակաւին չէ լուսաբանուած այդ սպանութեան ետին մնացած մարմինը։ Ըստ ձեզի, այս սպանութեան հեղինակներուն երեւան հանուիլը աւելի՞ կարեւոր է ձեր կառավարութեան վարկը փրկելու մտահոգութենէն։ Հրանդ Տինքի սպանութեան մասին պետական մարմիններու ու նախարարութիւններու միջեւ ինչպիսի՞ թղթակցութիւններ փոխանակուած են։ Այս ժողովներուն ընթացքին ինչպիսի՞ որոշումներ ընդունուած են», հարց տուած է ան։

Հալէպի Մէջ Առեւանգուածները Ազատ Արձակելու Ջանքերը Կը Շարունակուին

Asbarez Staff — Fri, 25 May 2012 00:07:00 +0000

ՊԷՅՐՈՒԹ, «Ռոյթըրզ».- Հալէպի մէջ 13 լիբանանցի առեւանգեալները «քանի մը ժամէն ազատ արձակելու» խոստումները չիրականացան Հինգշաբթի, Մայիս 24ին, մինչ Լիբանանի արտաքին գործոց նախարար Ատնան Մանսուր յայտնեց, որ առեւանգուողները «ողջ եւ առողջ են» եւ կ՛ակնկալուի, թէ մօտիկ ապագային ազատ արձակուին: Նաեւ, Դամասկոսի իշխանութեանց դէմ պայքարող Սուրիական ազատ բանակէն գնդ. Խալետ Համուտ լիբանանեան «Օ.Թի.Վի.» կայանին յայտնեց, որ ինք առեւագումին հետ կապ չունի, եւ թէ «առեւանգեալները աւազակներու ձեռքն են»:

Լիբանանի մօտ Միացեալ Նահանգներու դեսպան Մորա Քոնելլի եւս խստիւ դատապարտեց Հալէպի մէջ լիբանանցիներուն առեւանգումը:

Լիբանանի կառավարութիւնը Չորեքշաբթի օրուան նիստին ընթացքին քննեց ապահովական վերջին իրադարձութիւնները՝ շեշտելով, թէ երկիրը պէտք է հեռու մնայ երկպառակիչ պատերազմի ծուղակին մէջ իյնալու փորձութենէն:

Նախագահ զօր. Միշել Սլէյման դատապարտեց Սուրիոյ մէջ լիբանանցիներու առեւանգումը՝ միաժամանակ «ընդվզեցուցի»չ որակելով կարգ մը երկիրներու կոչը՝ իրենց քաղաքացիները Լիբանանէն հեռացնելու գծով: Ան գոհունակութիւն յայտնեց, որ վերջին դէպքերը խթան հանդիսացան այլազան կողմերու ղեկավարներուն միջեւ երկխօսութեան վերսկսման:

Միւս կողմէ՝ արեւմտեան Պէյրութի Քարաքաս շրջանին մէջ, լիբանանեան բանակը Հինգշաբթի օր սպաննեց բնակարանէ մը կրակ բացած երկու զինեալները, որոնցմէ մէկը սուրիացի մըն էր: Զինեալ ընդհարումին ընթացքին վիրաւորուած են հինգ զինուորներ:

Ատրպէյճանի Մէջ «Տիքթէյթըր»ի Ցուցադրութիւնը Կ՛արգիլուի

Asbarez Staff — Fri, 25 May 2012 00:05:29 +0000

ԵՐԵՒԱՆ, «Արմէնփրէս».- Բրիտանացի յայտնի դերասան Սաշա Պարոն Քոընի նորագոյն ֆիլմը՝ «Տիքթէյթըր»ը, որ երեւակայական ու քարիւղով հարուստ երկիրի մը մենատէրի մասին է, պիտի չցուցադրուի Ատրպէյճանի մէջ, որուն նախագահը մենատիրութեամբ կ՛ամբաստանուի: Ֆիլմի ցուցադրութիւնը արգիլուած է նաեւ Տաճիկիստանի եւ Պելոռուսի մէջ:

Քիւրտ Երեսփոխան Զանա Դարձեալ Բանտարկութեան Կը Դատապարտուի

Asbarez Staff — Fri, 25 May 2012 00:04:40 +0000

ՏԻԱՐՊԵՔԻՐ, «Ռոյթըրզ».- Թուրքիոյ խորհրդարանի անկախ պատգամաւոր Լէյլա Զանա Հինգշաբթի, Մայիս 24ին դարձեալ բանտարկութեան դատապարտուեցաւ՝ այս անգամ 10 տարիով, Քիւրտիստանի բանուորական կուսակցութեան ի նպաստ քարոզչութիւն կատարելու յանցանքով: Նկատի ունենալով, որ ան երեսփոխանական անձեռնմխելիութիւն ունի, վճիռը ի զօրու պիտի դառնայ միայն 2015ին կայանալիք խորհրդարանական ընտրութիւններէն ետք: Թուրքիոյ քիւրտերու ազգային, մշակութային, քաղաքական իրաւունքները ապահովելու համար Չանայի ելոյթներուն պատճառով, դատախազութիւնը 55 տարուան բանտարկութիւն կը պահանջէ:

Թուրքիա Սուրիան Կ՛ամբաստանէ Քիւրտ Անջատողականներուն Օժանդակելու Յանցանքով

Asbarez Staff — Fri, 25 May 2012 00:03:33 +0000

ԱՆԳԱՐԱ, «Էյ.Փի.».- Թուրքիոյ ներքին գործոց նախարար Իտրիս Նայիմ Շահին սուրիական վարչակարգը ամբաստանեց Քիւրտիստանի բանուորական կուսակցութեան օժանդակելու յանցանքով՝ պնդելով, որ թրքական գաղտնի սպասարկութիւնը հիւսիսային Սուրիոյ մէջ քիւրտ անջատողականներու մեծաթիւ ներկայութիւն նշմարած է: Ան ընդգծեց, որ Սուրիոյ այս քայլը վտանգաւոր է եւ շրջանի ապահովութիւնը կը վտանգէ՝ աւելցնելով, որ սուրիական վարչակարգը իր այս քայլով կ՛ուզէ Թուրքիայէն վրէժ լուծել, որովհետեւ Անգարա նեցուկ կանգնեցաւ սուրիացի ժողովուրդին ժողովրդավարութեան եւ ազատութեան պահանջներուն:

Միւս կողմէ, ՄԱԿի քննիչներուն կողմէ պատրաստուած տեղեկագիր մը հրապարկուեցաւ Հինգշաբթի օր. անոր մէջ կը շեշտուի, թէ Սուրիոյ ապահովական ուժեր եւ անոնց դէմ զէնք բարձրացուցած զինեալներ կը շարունակեն անընդունելի բռնարարքներու դիմել:

Քանի Մը Տողով

Asbarez Staff — Fri, 25 May 2012 00:02:48 +0000

- Մայիս 24ին աւարտած են Պաղտատի մէջ տեղի ունեցած Իրանի հիւլէական ուժանիւթի ծրագիրին նուիրուած բանակցութիւնները՝ առանց յատկանշական յառաջդիմութիւն ապահովելու: Կողմերը որոշած են բանակցութիւնները շարունակել Մոսկուայի մէջ, Յունիս 18-19ին:

- Փաքիստանցի 48ամեայ բժիշկ Շաքիլ Աֆրիտի 33 տարուան բանտարկութեան դատապարտուեցաւ փաքիստանեան ատեանի մը կողմէ, «Քայիտա»ի ղեկավար Օսամա պըն Լատենը բացայայտելու նպատակով ամերիկացիներու հետ գործակցելուն համար:

- 2020ի Ողիմպիական խաղերը կազմակերպելու Պաքուի եւ Տոհայի դիմումները Մայիս 24ին մերժուեցան Միջազգային ողիմպիական յանձնախումբին կողմէ, որ երեքի իջեցուց թեկնածու քաղաքներու ցանկը, որուն վրայ կը մնան Թոքիօն, Մատրիտը եւ Պոլիսը:

Երկու Զինուորներ Եւս Կը Սպաննուին Ատրպէյճանի Բանակին Մէջ

Asbarez Staff — Thu, 24 May 2012 02:41:45 +0000

ԵՐԵՒԱՆ, «Արմէնփրէս».- Ատրպէյճանի պետական սահմանային ծառայութեան զինուրներուն միջեւ դարձեալ տեղի ունեցած է զինեալ ընդհարում մը՝ ըստ ատրպէյճանական «Թրենտ» լրատու գործակալութեան կողմէ Չորեքշաբթի, Մայիս 23ին հաղորդուած տեղեկութեանց: Միջադէպը տեղի ունեցած է Իմիշլիի շրջանին մէջ՝ Իրանի հետ սահմանակից Պայրամթեփէ աւանին մօտերը, ուր զինուոր մը, վիճաբանութեան մը պատճառով, սպաննած է իր զինակիցը, ապա անձնասպան եղած է:

Յատկանշական է, որ նման միջադէպ մը տեղի ունեցած էր Մայիս 15ին, Ղազախի զօրամասերէն մէկուն մէջ:

Ըստ ատրպէյճանական «Տոքթրինա» կեդրոնին՝ այս տարուան ընթացքին Ատրպէյճանի զինեալ ուժերուն մէջ արձանագրուած է սպանութեան 33 պարագայ:

Սուրիոյ Հարցով Անանի Ծրագիրը Ձախողութեան Մատնելու Ջանքեր

Asbarez Staff — Thu, 24 May 2012 02:40:56 +0000

ՊԷՅՐՈՒԹ, «Էյ.Փի.».- ՄԱԿի ընդհանուր քարտուղար Պան Քի Մունի խաղաղապահ գործողութեանց հարցերով օգնական Հերուէ Լատսոս, սուրիական «Ուաթան» օրաթերթին յայտնած է, թէ գոյութիւն ունի երրորդ կողմ մը կամ կողմեր, որոնք կը ջանան ՄԱԿի եւ Արաբական լիկայի Սուրիոյ հարցով յատուկ պատուիրակ Քոֆի Անանի ծրագիրը ձախողութեան մատնելու՝ իրենց ծրագիրները իրականացնելու նպատակով: «Գոյութիւն ունի երրորդ կողմ մը, որ կազմուած է ահաբեկչական խմբաւորումներէ, սակայն ի վերջոյ կ՛ուզենք, որ այս հարցերուն լուծումը նոյնինքն սուրիացիներուն միջեւ ըլլայ», ըսած է ան:

Պան Քի Մունի օգնականը շեշտած է, որ ընդդիմութիւնը զինելը ի շահ սուրիացիներուն չէ, եւ «զէնքերու ու դրամի մատակարարման միջոցով՝ «կրակին վրայ ձէթ թափել»ը անարդարանալի է»:

Միւս կողմէ՝ Սուրիական պատկերասփիւռի կայանը հաղորդեց, որ Դամասկոսի օդակայանի ճամբուն վրայ Չորեքշաբթի, Մայիս 23ին տեղի ունեցած ականահարում մը առնուազն երեք զոհ եւ 19 վիրաւոր պատճառած է: Երեքշաբթի օր, Դամասկոսի ճաշարաններէն մէկուն մէջ այլ պայթում մը եւս երեք զոհեր խլած է:

Նաեւ, իրաքեան «Սապահ» թերթը, մէջբերելով իրաքեան կառավարութենէն քաղաքական բարձրաստիճան աղբիւրներ՝ կը հաղորդէ, որ գոյութիւն ունի Պաղտատի մէջ Սուրիոյ տագնապի լուծման նուիրուած ժողով մը հիւրընկալելու գաղափարը՝ սուրիական տագնապին առնչակից կողմերուն մասնակցութեամբ, նշելով, որ իրաքեան ծրագիրը կոչ կ՛ընէ ազգային միասնութեան կառավարութիւն մը կազմելու ու անմիջապէս զինադադար հաստատելու:

Քանի Մը Տողով

Asbarez Staff — Thu, 24 May 2012 02:40:11 +0000

- Իրաքի Ռամատի քաղաքին մէջ, ականի մը պայթումին պատճառով, առնուազն 3 լիբանանցի շիիի ուխտաւորներ սպաննուած են Չորեքշաբթի, Մայիս 23ին: Նոյն օրը, Պաղտատի եւ Քերքուքի մէջ երկու այլ յարձակումներ 5 զոհեր խլած են:

- Սթրազպուրկ հաստատուած Մարդկային իրաւունքներու եւրոպական ատեանը, Մայիս 23ին դարձեալ երկու վճիռներ արձակած է Թուրքիոյ դէմ՝ պահանջելով անկէ, որ 23,000 եուրոյի վնասուց հատուցում վճարէ երկու քաղաքացիներու՝ զանոնք առանց պաշտօնական ամբաստանութեան ու երկար ժամանակով ձերբակալեալ վիճակի մէջ պահելու յանցանքով։

- Թուրքիոյ մէջ, Մայիս 23ին ձերբակալուած են 17 զինուորականներ, որոնք կ՛ամբաստանուին Վանի մէջ բանակին յանձնուած երեք քիւրտ գերիներ սպաննելու յանցանքով:

- Պաղտատի մէջ, Մայիս 23ին սկսան Իրանի եւ միջազգային միջնորդներու վեցեակին (ՄԱԿի Ապահովութեան խորհուրդի մնայուն 5 անդամները եւ Գերմանիան) միջեւ բանակցութիւնները՝ Իրանի հիւլէական ծրագիրներուն գծով: Մէկ օր առաջ, ՄԱԿի քննիչներու ներկայացուցիչը յայտարարած էր, թէ Իրանի հիւլէական կեդրոնները հսկելու գծով համաձայնութիւն մը մօտալուտ է:

- Մայիս 23ին, Եգիպտոսի մէջ սկսան նախկին նախագահ Հոսնի Մուպարաքը իշխանութենէն հեռացուցած ապստամբութենէն ետք առաջին նախագահական ընտրութեանց քուէարկութիւնը: Երկօրեայ քուէարկութեամբ տեղի ունեցող ընտրութեանց կը մասնակցին 13 թեկնածուներ, եւ եթէ ոչ մէկ թեկնածու քուէներուն 50 տոկոսը ապահովէ, ապա երկրորդ հանգրուան մը տեղի պիտի ունենայ Յունիս 16-17ին: Յեղափոխութեան մասնակիցներէն հատուած մը կը մերժէ մասնակցիլ ընտրութեանց, որովհետեւ բանակին իշխանութեան տակ գտնուող կառավարութիւնը բաւարար քայլերու չէ դիմած ընտրութիւնները իսկապէս ազատ ու արդար դարձելու համար:

- Ատրպէյճանի պետական քարիւղի հիմնադրամի եկամուտներուն 54.2 տոկոսը արդէն ծախսուած է. այս մասին հաղորդած է «Թուրան» լրատու գործակալութիւնը: 1999ին հաստատուած հիմնադրամը մինչեւ այս տարուան Ապրիլ 1, ստացած է 70.8 միլիառ տոլար, որուն 38.4 միլիառը ծախսուած է, իսկ մնացեալը կը կազմէ երկիրին ռազմավարական դրամական պահուստին 75 տոկոսը: Ատրպէյճանի պետական ամավարկը ամէն տարի աւելիով կախեալ կը դառնայ երկիրի քարիւղի հարստութենէն: Մինչ 2008ին ամավարկին 35.3 տոկոսը գոյացած էր քարիւղի հիմնադրամին փոխանցումներէն՝ 2012ին այդ համեմատութիւնը 60.3 տոկոսի հասած է:

Լարուածութիւնը Մեղմացնելու Կոչեր՝ Լիբանանի Մէջ

Asbarez Staff — Thu, 24 May 2012 02:35:42 +0000

Լիբանանցի զինուորներ Պէյրութի Թայունի շրջանին մէջ

ՊԷՅՐՈՒԹ, «Ռոյթըրզ».- Հիւսիսային Լիբանանի մէջ տեղի ունեցած իրադարձութիւններուն ու աւելի ուշ Հալէպի մէջ տեղի ունեցած լիբանանցի շիի ուխտաւորներու առեւանգումին հետեւանքով ստեղծուած լարուածութիւնը զսպելու նպատակով, լիբանանցի ղեկավարներ Չորեքշաբթի, Մայիս 23ին առաւելագոյն զսպուածութիւն ցուցաբերու կոչ ըրին իրենց համակիրներուն՝ միաժամանակ վստահեցնելով, թէ անհրաժեշտ քայլերու դիմուած է՝ առեւանգեալներուն վերադարձը ապահովելու համար: Անոնք նաեւ կոչ ըրին վերաբանալու բոլոր ճամբաները, որպէսզի օտար տարրեր առիթէն օգտուելով՝ երկպառակիչ արարքներ չգործեն:

Վարչապետ Նեժիպ Միքաթի յայտնեց, որ առեւանգեալներուն գտնուած վայրը բացայայտուած է եւ անոնց ազատ արձակման համար առաւելագոյն ջանք կը տարուի:

Մինչ այդ, Չորեքշաբթի օր Պէյրութ վերադարձած են առեւանգեալ տղամարդկանց հետ կարճ ժամանակով առեւանգուած ու ապա ազատ արձակուած 34 կիներ եւ երեխաներ:

Նաեւ, Պէյրութի «Սեն Ժոզէֆ» համալսարանին մէջ, Չորեքշաբթի օր «Հըզպալլա»ի եւ «Փաղանգաւոր» կուսակցութեան անդամ ուսանողներուն միջեւ բախումի մը ընթացքին, երկու վիրաւոր արձանագրուեցաւ: Լիբանանեան բանակին միջամտութեան շնորհիւ կարելի եղաւ կացութիւնը հանդարտեցնել: Նաեւ Ժտէյտէ շրջանին մէջ գտնուող «Սաժես» դպրոցին մօտերը հրացանաձգութեան պատճառով, երեք վիրաւոր արձանագրուած է:

Միւս կողմէ՝ սուրիական «Ուաթան» թերթը հաւանական նկատած է, որ առեւանգուած լիբանանցիները Թուրքիա փոխադրուած ըլլան, իսկ Սուրիոյ կառավարութեան դէմ զինեալ պայքար մղող Սուրիական ազատ բանակէն աղբիւրներ յայտնած են, թէ լիբանանցիները առեւանգող կողմը «Սուրիոյ ազատականներ» ծայրայեղական կուսակցութիւնն է:

Երուսաղէմը Միացեալ Քաղաք Պիտի Մնայ. Կ՛ըսէ Նեթանիահու

Asbarez Staff — Thu, 24 May 2012 02:34:28 +0000

ՊԵՐԼԻՆ.- Գերմանական լրատու գործակալութեան մը հետ հարցազրոյցի մը ընթացքին, Իսրայէլի վարչապետ Պենիամին Նեթանիահու յայտնած է, թէ Երուսաղէմը միացեալ քաղաք պիտի մնայ՝ միաժամանակ զգուշացնելով. «Երուսաղէմի մասնատումը կրնայ կրօնական պատերազմի առաջնորդել»: Նեթանիահու Երուսաղէմի երկու հատուածներու միաւորման եւ Իսրայէլի կցման տարեդարձին առիթով ըսած է. «Պատմութիւնը մեզի սորվեցուց, որ միայն իսրայէլեան գերիշխանութեան տակ կրօններուն միջեւ խաղաղութիւնը եւ հանդարտութիւնը կը պահուի: Մասնատուած քաղաքը միաւորուեցաւ եւ այդպէս ալ պիտի մնայ»:

Ըստ Թրքական Մամուլին՝ Իսրայէլ 20,000 Զինուորներ Կ՛ուզէ Տեղակայել Կիպրոսի Մէջ

Asbarez Staff — Wed, 23 May 2012 05:34:54 +0000

ԵՐԵՒԱՆ, «Արմէնփրէս».- Կիպրոսի եւ Իսրայէլի միջեւ կառուցուելիք ընդծովեայ կազատարին եւ Կիպրոսի հարաւային շրջաններուն մէջ կառուցուելիք կազի արտադրութեան կեդրոնի ապահովութիւնը երաշխաւորելու նպատակով, Թել Աւիւ կը փափաքի մօտաւորապէս 20 հազար զինուորականներ տեղակայել կղզիին մէջ. այս մասին կը հաղորդեն թրքական թերթեր, ըստ որոնց, Իսրայէլի վարչապետ Պենեամին Նեթանիահու խնդրած է Կիպրոսի իշխանութիւններէն, որ օդային եւ ծովային ռազմական խարիսխներ տրամադրեն իսրայէլացի զինուորականները տեղակայելու համար՝ միաժամանակ խոստանալով ջնջել Կիպրոսի մէջ իսրայէլացի գործարարներու կողմէ ներդրումներ կատարելը արգիլող օրէնքները:

Ըստ թրքական մամուլին՝ Իսրայէլ կը փափաքի Կիպրոսի Լիմասոլ նաւահանգիսին մէջ Իսրայէլի զինուորներու եւ անոնց ընտանիքներուն ու իսրայէլացի այլ մասնագէտներու համար 50 հազար հոգինոց բնակավայր մը կառուցել՝ զայն անուանելով «Փոքրիկ Իսրայէլ»:

ՆԱԹՕն Սուրիոյ Մէջ Զինուորական Միջամտութեան Նպատակ Չունի

Asbarez Staff — Wed, 23 May 2012 05:34:28 +0000

ՄԱԿի դէտեր Տէր Զօրի մէջ անցած շաբաթավերջին տեղի ունեցած յարձակումի մը վայրը կ՛այցելեն

ՇԻՔԱԿՕ, «Էյ.Փի.».- ՆԱԹՕի ընդհանուր քարտուղար Անտերս Ֆոկ Ռասմուսեն յայտարարեց, որ դաշինքը Սուրիոյ մէջ զինուորական միջամտութիւն կատարելու նպատակ չունի: Ռասմուսեն Շիքակոյի մէջ տեղի ունեցած ՆԱԹՕի գերաստիճանին ընթացքին լրագրողներու հետ զրոյցի մը ընթացքին յայտնեց. «Թոյլ տուէք շեշտեմ, որ մենք Սուրիոյ կացութեան նկատմամբ շատ մտահոգ ենք: Կը կարծեմ, որ անոր հետ վարուելու եւ լուծումներ գտնելու լաւագոյն ձեւը՝ ՄԱԿի եւ Արաբական լիկայի Սուրիոյ հարցով յատուկ պատուիրակ Քոֆի Անանի ծրագիրն է»:

Ան աւելցուց, թէ խորապէս կը ցաւի, որ «սուրիական ղեկավարութիւնը կը թուի չյարգել Անանի ծրագիրը, եւ մենք կը դատապարտենք սուրիական ապահովութեան ուժերու վարմունքը եւ քաղաքայիններու բռնաճնշումը»:

Միւս կողմէ, Սուրիոյ նախագահ Պաշշար Ասատ հրապարակեց հրամանագիր մը, որ Սուրիոյ նորընտիր խորհրդարանը կը հրաւիրէ յառաջիկայ Հինգշաբթի օր իր առաջին նիստը գումարելու:

Քանի Մը Տողով

Asbarez Staff — Wed, 23 May 2012 05:33:21 +0000

- Իրանի մօտ Ատրպէյճանի դեսպան Ճեւանշիր Ախունտով Մայիս 22ին դարձեալ կանչուած է արտաքին գործոց նախարարութիւն, ուր արտաքին գործոց նախարարի տեղակալ Ապպաս Արաքճիի հետ քննած է վերջերս երկու երկիրներուն յարաբերութեանց մէջ ծագած լարուածութիւնը: Արաքճի բողոքած է Ատրպէյճանի մէջ «կրօնական արժէքներու հանդէպ անյարգալից վերաբերմունքին» դէմ: Անցնող շաբաթավերջին, Պաքուի մօտ իրանեան դեսպանատան առջեւ տեղի ունեցած ցոյցի մը ընթացքին, վիրաւորական արտայայտութիւններ հնչած էին Իրանի նախագահի գերագոյն կրօնապետի հասցէին, որմէ ետք Ատրպէյճանի մօտ Իրանի դեսպանը խորհրդակցութեանց համար Թեհրան կանչուած էր:

- Պոլսոյ ծանր յանցագործութիւններու ատեանին վճիռով, Մայիս 22ին փակուած է Թուրքիոյ մէջ հրատարակուող քրտական «Տեմոքրաթիք Վաթան» (ժողովրդավար հայրենիք) թերթը: Ըստ քրտական «Ֆրա»չ լրատու գործակալութեան՝ ատեանը իր վճիռը հիմնած է այն ամբաստանութեան վրայ, թէ թերթը Քիւրտիստանի բանուորական կուսակցութեան ի նպաստ քարոզչութիւն կը կատարէ, հակառակ այն իրողութեան, որ Անգարա այդ կուսակցութիւնը ապօրինի կը նկատէ:

- Վրաստանի նախագահ Սահակաշվիլի, որ մասնակցած էր Շիքակոյի մէջ կայացած ՆԱԹՕի գերաստիճանին, Մայիս 22ին յայտնած է, թէ Վրաստան ամենայն հաւանականութեամբ 2014ին պիտի դառնայ Հիւսիսատլանտեան ուխտի լիիրաւ անդամ:

- Այս ամրան շրջապտոյտի մը մեկնելու ծրագիրներ ունեցող ամերիկացիներուն թիւը 54 տոկոսի հասած է՝ բաղդատած անցեալ տարուան ընթացքին արձանագրուած 52 տոկոսին:

13 Լիբանանցի Շիիներ Կ՛առեւանգուին Սուրիոյ Մէջ

Asbarez Staff — Wed, 23 May 2012 05:32:54 +0000

Ճամբայ մը կը փակուի Պէյրութի Մար Մխայէլ շրջանին մէջ

ՊԷՅՐՈՒԹ, «Էյ.Փի.».- Լիբանանցի պետական պաշտօնատարներ հաղորդեցին, թէ Երեքշաբթի, Մայիս 22ին, Հալէպի Ազազ շրջանին մէջ 13 լիբանանցի շիիներ առեւանգուած են, դէպի Իրաք կատարած իրենց ուխտագնացութենէն վերադարձի ճամբուն վրայ:

Ըստ «Նաշրա» կայքէջին՝ 13 լիբանանցիներ առեւանգողները կը պահանջեն Սուրիոյ իշխանութիւններէն առեւանգեալները փոխանակել Սուրիոյ բանտերուն մէջ մնացող ընդդիմադիրներու հետ:

Իբրեւ բողոք այս առեւանգումին, քաղաքացիներ շիիներով բնակեցուած շրջաններու մէջ շարք մը ճամբաներ փակեցին, ինչպէս սիւննիներ հիւսիսային Լիբանանի մէջ ճամբաներ փակած էին, երբ Թրիփոլիի մէջ ձերբակալուեցաւ սիւննի գործիչ Շատի Մաուլաուին, որ կ՛ամբաստանուէր Սուրիոյ իշխանութեանց ընդդիմադիրները զինելու յանցանքով: Յայտնենք, թէ Երեքշաբթի օր լիբանանեան զինուորական ատեան մը որոշեց փրկագինով ազատ արձակել նշեալ գործիչը՝ պահանջելով անկէ չհեռանալ երկիրէն: Իսկ Պաալպեք-Հըրմել ժողովրդային մարմինը դատապարտեց «ահաբեկի»չ Մաուլաուիի ազատ արձակումը:

Մաուլաուիի ձերբակալութենէն ետք Թրիփոլիի մէջ տեղի ունեցած զինեալ բախումները 10 զոհ խլած էին անցեալ շաբաթ:

Միւս կողմէ, բանակը ձերբակալած է բանակային անցարգելի մը վրայ գտնուող 19 զինուորները եւ երեք սպաները, որոնք պատասխանատու կը նկատուին Աքքարի մէջ սիւննի շէյխ մը եւ անոր ընկերակիցը սպաննելու արարքին: Շէյխն ու գործակիցը Երկուշաբթի օր հողին յանձնուեցան յուղարկաւորութեամբ մը, որ վերածուեցաւ հակակառավարական ցոյցի: Շէյխին սպանութեան հետեւանքով, արեւմտեան Պէյրութի մէջ տեղի ունեցած բախումները երկու զոհ խլած էին Երկուշաբթի օր:

Վրաստան Եւ Ատրպէյճան Դաւիթ Կարեճի Վանքի Հարցով Կը Համաձայնին

Asbarez Staff — Wed, 23 May 2012 05:31:54 +0000

ԹԻՖԼԻՍ.- Վրացական լրատուամիջոցները կը հաղորդեն, որ Վրաստանի եւ Ատրպէյճանի նախագահներու յանձնարարականին հիման վրայ, Վրաստան-Ատրպէյճան սահմանին վրայ գտնուող Դաւիթ Կարեճի վանական համալիրի օգտագործման գծով համաձայնութիւն գոյացած է՝ վերջ տալով ատրպէյճանական կողմին ստեղծած տագնապին:

Կողմերը համաձայնած են, որ ատրպէյճանցի սահմանապահները պիտի վերադառնան Մայիս 6ի իրենց դիրքերուն ու վրացի եւ օտար զբօսաշրջիկներուն պիտի արտօնեն մուտք գործել վանական համալիրի այն մասէն ներս, որ Ատրպէյճանի տարածքին մէջ կը գտնուի, իսկ վրացական կողմը պիտի երաշխաւորէ, որ զբօսաշրջիկները համալիրէն դուրս գտնուող ատրպէյճանական տարածքներ մուտք չգործեն:

Ըստ Հոլանտի՝ Ֆրանսական Ուժերու Աֆղանիստանէն Հեռացումը Բանակցելի Չէ

Asbarez Staff — Wed, 23 May 2012 05:31:29 +0000

ՇԻՔԱԿՕ, «Էյ.Փի.».- Ֆրանսայի նախագահ Ֆրանսուա Հոլանտ Երկուշաբթի, Մայիս 21ին հաստատեց, թէ Ֆրանսա վճռակամ է եւ իր մարտական ուժերը այս տարի Աֆղանիստանէն պիտի հեռացնէ, միաժամանակ, ՆԱԹՕի անդամ իր դաշնակիցներուն հետ համաձայնութիւն մը գոյացուց, որ 2013ի ընթացքին Ֆրանսա միայն աֆղան ոստիկանական ուժերը մարզելու նպատակին համար ուժեր պիտի տրամադրէ:

Հոլանտ իր պաշտօնակիցներուն հետ հանդիպումներէ ետք լրագրողներուն յայտնեց, թէ այս սկզբունքներուն շուրջ «յաջողեցանք համաձայնութիւն գոյացնել»՝ աւելցնելով, որ մարտական ուժերը Աֆղանիստանէն հեռացնելու կէտը «բանակցելի չէր, որովհետեւ ֆրանսական գերիշխանութեան հետ կապ ունի»:

Յայտնենք, թէ դաշինքը եւս որոշեց Աֆղանիստանէն իր ուժերուն հեռացումը արագացնել:

Ամերիկեան Կարմիր Խաչի Հիմնադիր Եւ Մարդասէր Քլարա Պարթոնի Նուիրուած Յիշատակի Ձեռնարկ

Asbarez Staff — Wed, 23 May 2012 05:22:11 +0000

23 Մայիսին՝ ժամը 11ին Հայոց Ցեղասպանութեան թանգարանհիմնարկի նախաձեռնութեամբ եւ Հայաստանի մէջ Միացեալ Նահանգներու դեսպանատան աջակցութեամբ՝ Հայոց Ցեղասպանութեան թանգարանին մէջ տեղի պիտի ունենայ Ամերիկեան Կարմիր Խաչի հիմնադիր Քլարա Պարթոնի յիշատակին նուիրուած հանդիսաւոր հանդիսութիւններ: Այս առիթով խօսք պիտի առնեն Հայոց Ցեղասպանութեան թանգարանի տնօրէն Հայկ Դեմոյեանը, Հայաստանի մէջ Միացեալ Նահանգներու դեսպան Ճոն Հեֆըրնը, Քլարա Պարթոնի տուն-թանգարանը ներկայացնող պատմաբան Քեւին Փաթին:

Տեղի պիտի ունենայ նաեւ 1896 թուականին Քլարա Պարթոնի պատրաստած զեկուցումին՝ «Ամերիկեան Կարմիր խաչի նպաստամատոյց առաքելութիւնը Փոքր Ասիոյ մէջ» նիւթով անգլերէն եւ հայերէն գիրքերու շնորհանդէսը: Զեկուցումը հայերէնի թարգմանուած եւ հրատարակուած է Հայաստանի մէջ Միացեալ Նահանգներու դեսպանութեան աջակցութեամբ:

Այս առիթով Հայոց Ցեղասպանութեան թանգարանի գիտական խորհուրդի որոշումով պատրաստուած է «Երախտագիտութիւն» անուանակարգով եւ Քլարա Պարթոնին նուիրուած ոսկեայ յուշամետալ, որով պիտի պարգեւատրուին մարդասիրական աջակցութիւն ցուցաբերած անձեր եւ կազմակերպութիւնները, ինչպէս նաեւ հայ-ամերիկեան բարեկամութեան ամրապնդման իմաստով ներդրում ունեցած անձնաւորութիւններ։

Նոյն օրը Հայոց Ցեղասպանութեան թանգարանին մէջ բացումը պիտի կատարուի Ք. Պարթոնի նուիրուած ժամանակաւոր ցուցահանդէսին, որուն մասնակիցներուն պիտի բաժնուի Ք. Պարթոնի 190ամեակի առթիւ պատրաստուած յիշատակի բացիկներ:

Այնուհետեւ տեղի պիտի ունենայ Հայոց Ցեղասպանութեան յուշահամալիրի Յուշապատի մէջ Քլարա Պարթոնի գերեզմանէն բերուած հողի ամփոփման եւ յուշատախտակի տեղադրման հանդիսաւոր արարողութիւն:

Միացեալ Նահանգներու Կարմիր խաչի հիմնադիր եւ նախագահ Քլարա Պարթոն ծնած է 1821ին Մասաչուսեց նահանգի Օքսֆորտ քաղաքին մէջ: Միացեալ Նահանգներու քաղաքացիական պատերազմին ընթացքին իր ծաւալած մարդասիրական գործունէութեան համար ան ճանչցուած է «Մարտադաշտի հրեշտակ» անունով։

Օսմանեան կայսրութեան մէջ հայերուն նկատմամբ 1895-1896 թուականներուն գործադրուած զանգուածային կոտորածներուն մասին տեղեկանալով՝ Քլարա Պարթոն 1896ին կը մեկնի Պոլիս եւ շուրջ մէկ տարի կը ղեկավարէ ջարդերէն տուժածներուն եւ անօթեւաններուն նիւթական օգնութիւն տրամադրելու աշխատանքները։

Անոր ջանքերուն շնորհիւ ջարդերէն փրկուած հայերուն կ՛ապահովուի կացարան, սնունդ, դեղորայք եւ հագուստ: Օսմանեան կառավարութեան յարուցած բազմաթիւ խոչընդոտներուն պատճառով Քլարա Պարթոն կը ստիպուի Միացեալ Նահանգներ վերադառնալ։

1896ին իր գործընկերներուն հետ Քլարա Պարթոն կը հրատարակէ զեկուցում մը՝ Օսմանեան կայսրութեան մէջ իրենց ծաւալած մարդասիրական գործունէութեան մասին։

Կիւլ Հոլանտէն Կը Խնդրէ «Նոր Էջ Բանալ»

Asbarez Staff — Tue, 22 May 2012 06:24:01 +0000

ԵՐԵՒԱՆ, «Արմէնփրէս», «Մարմարա».- ՆԱԹՕի գերաստիճանի ծիրէն ներս, Թուրքիոյ նախագահ Ապտուլլահ Կիւլի նախաձեռնութեամբ հանդիպում մը տեղի ունեցած է Ֆրանսայի եւ Թուրքիոյ նախագահներուն միջեւ. ընթացքին Կիւլ Ֆրանսուա Հոլանտէն խնդրած է «նոր էջ բանալ» երկու երկիրներու յարաբերութիւններուն մէջ: Ըստ Թուրքիոյ պետական պատկերասփիւռի կայանին, Հոլանտ պատրաստակամութիւն յայտնած է «սխալ ըմբռնումներով ժամանակ կորսնցնելու փոխարէն՝ յարաբերութիւնները հասցնելու նախկին մակարդակին», աւելցնելով, թէ Թուրքիոյ հարցը Ֆրանսայի ներքին քաղաքականութեան նիւթ պիտի չդարձնէ:

Միւս կողմէ, թրքական լրատուական աղբիւրներ կը գրեն, թէ Ֆրանսայի մէջ նախագահը փոխուած է, բայց Հայկական Ցեղասպանութեան քաղաքականութիւնը չէ փոխուած, եւ մօտալուտ կը նկատեն այդ մասին նոր տագնապ մը։

Սուրիոյ Նկատմամբ Էրտողանի Կեցուածքին Դէմ Ցոյցեր Թուրքիոյ Մէջ

Asbarez Staff — Tue, 22 May 2012 06:22:39 +0000

ԵՐԵՒԱՆ, «Արմէնփրէս».- Պոլսոյ մէջ Կիրակի եւ Երկուշաբթի, Մայիս 20-21ին տեղի ունեցած են բողոքի ցոյցեր, որոնց ընթացքին քննադատուած է Սուրիոյ նկատմամբ Թուրքիոյ վարչապետ Ռեչեփ Թայիփ Էրտողանի վարած քաղաքականութիւնը: Ցոյցերուն միացած են նաեւ արաբ երիտասարդներ՝ դատապարտելով Սուրիոյ ներքին տագնապին միջամուխ ըլլալու Անգարայի փորձերը:

Այս ցոյցերուն զուգահեռ, Հալէպի համալսարանի ուսանողները բազմահազարանոց հանրահաւաք մը կազմակերպած են՝ աջակցելով նախագահ Պաշշար Ասատի առաջարկած բարեփոխումներու ծրագիրին եւ դատապարտելով զինեալ խմբաւորումներու ահաբեկչական գործունէութիւնը:

Նաեւ, թուրք հրամանատար Թիւրքեր Էրթիւրք յայտարարած է, որ Էրտողանի կառավարութիւնը «ահաբեկչութիւն կ՛արտահանէ դէպի դրացի երկիրներ»: Ըստ անոր՝ Էրտողանի արտաքին քաղաքականութիւնը կը նպաստէ շրջանին մէջ լարուածութեան բորբոքման:

Թրքական լրատուամիջոցներ նաեւ կը հաղորդեն, որ Թուրքիա-Սուրիա սահմանի սուրիական կողմին վրայ սուրիական բանակին եւ ընդդիմադիր զինեալներու միջեւ բախումներուն հետեւանքով, Սուրիա որոշած է միակողմանի կերպով փակել Պապ Հաուայի սահմանակէտը: Ներկայիս Քիլիս քաղաքին մօտ գտնուող սահմանային կէտը միայն բաց է:

Վերջապէս, Ութեակի խմբակի երկիրները, անցած շաբաթավերջին յայտարարեցին, թէ Սուրիոյ կառավարութիւնը եւ բոլոր կողմերը պէտք է ամբողջութեամբ կատարեն ՄԱԿի եւ Արաբական լիկայի պատուիրակ Քոֆի Անանի ծրագիրի պարտաւորութիւնները՝ աւելցնելով, թէ խստօրէն կը դատապարտեն Սուրիոյ մէջ ահաբեկչական գործողութիւնները:

Իրաքի Մէջ Ցուցարարները Թուրքիոյ Դրօշը Այրած Են

Asbarez Staff — Tue, 22 May 2012 06:22:08 +0000

ՊԱՔՈՒ.- Ատրպէյճանական «Սալամնիուզ» լրատու գործակալութիւնը կը հաղորդէ, որ հարաւային Իրաքի Պասրա քաղաքի թրքական հիւպատոսարանին առջեւ Կիրակի, Մայիս 20ին տեղի ունեցած է բողոքի ցոյց մը, որուն ընթացքին ցուցարարները Թուրքիոյ դրօշակը այրած են: Ցոյցին մասնակիցները իրենց վրդովմունքը յայտնած են թրքական կառավարութեան դէմ, որ ապաստան կու տայ շիիներու դէմ ահաբեկչութիւններ կազմակերպելու յանցանքով ամբաստանուած Իրաքի սիւննի նախկին փոխնախագահ Թարիք Հաշիմիին: Ցուցարարները հիւպատոսարանի աշխատակիցներուն փոխանցած են նամակ մը, որուն մէջ թրքական կառավարութեան 15 օրուան պայմանաժամ կը տրուի Հաշիմին Պաղտատի յանձնելու համար: «Հակառակ պարագային՝ պիտի վտանգուին Թուրքիոյ շահերը», կ՛ըսուի յայտարարութեան մէջ, ուր նաեւ քննադատուած են Սուրիոյ ներքին գործերուն միջամտելու Թուրքիոյ ջանքերը: Թուրքիոյ արտաքին գործոց նախարար Ահմետ Տաւութօղլու, Երկուշաբթի օր, այս հարցով մտահոգութիւն յայտնած է Իրաքի իր պաշտօնակից Հոշեար Զեպարիին: «Կը քննադատենք թրքական դրօշի դէմ ցուցաբերուած տգեղ վերաբերմունքը եւ կ՛ակնկալենք, որ պատասխանատուները յայտնաբերուին եւ պատժուին», ըսած է ան:

Քանի Մը Տողով

Asbarez Staff — Tue, 22 May 2012 06:21:17 +0000

- Ատրպէյճանի Թառթառ շրջանին մէջ Մայիս 21ին տեղի ունեցած փոխադրակառքերու արկածի մը հետեւանքով մահացած են երեք անձեր, որոնցմէ երկուքը սպաներ էին, այս տարուան ընթացքին ատրպէյճանական բանակին կրած մարդկային կորուստներուն թիւը հասցնելով 30ի:

Արեւմտեան Պէյրութի Մէջ Զինեալ Բախումներ 2 Զոհ Կը Խլեն

Asbarez Staff — Tue, 22 May 2012 06:20:51 +0000

ՊԷՅՐՈՒԹ, «Էյ.Փի.».- Երկուշաբթի, Մայիս 21ի կանուխ ժամերուն, արեւմտեան Պէյրութի մէջ «Մուսթաքպալ» հոսանքէն եւ Արաբական հոսանքի կուսակցութենէն զինեալներու միջեւ տեղի ունեցած զինեալ բախումները պատճառեցին 2 զոհ եւ 18 վիրաւոր, ինչպէս նաեւ նիւթական վնասներ: Բանակին միջամտութեամբ կարելի եղած է կացութիւնը զսպել:

Բախումները մաս կը կազմէին Կիրակի օր սկսած լարուածութեան, որ հետեւանք էր հիւսիսային Լիբանանի մէջ տեղի ունեցած շէյխ Ահմետ Ապտըլ Ուահետի եւ անոր ընկերակիցի սպանութեան, բանակային անցարգելի մը մօտ: Անոնց սպանութենէն ետք զինեալներ բողոքի ելոյթներով ճամբաներ փակեցին՝ պահանջելով դէպքի պատասխանատուներուն յանձնումը:

Նախագահ Միշել Սլէյման ցաւ յայտնեց Քուէյխաթի մէջ տեղի ունեցած շէյխին եւ անոր ընկերակիցին սպանութեան համար՝ ըսելով, թէ այս գծով հետաքննութեան յատուկ յանձնախումբ մը պիտի կազմուի:

Վարչապետ Նեժիպ Միքաթի վարչապետարանին մէջ նախագահեց ապահովական ժողովի մը՝ մասնակցութեամբ ներքին գործոց, պաշտպանութեան ու արդարութեան նախարարներուն, բանակի հրամանատարին եւ ապահովական կառոյցներու պատասխանատուներու. աւարտին յայտարարուեցաւ, թէ դէպքին մանրամասնութիւնները պիտի բացայայտուին ու պատասխանատուները պիտի պատժուին:

Կառավարութեան ընդդիմադիր շրջանակները նաեւ կը քննեն խորհրդարանական յանձնախումբ մը կազմելու կարելիութիւնը՝ հետաքննութիւն բանալու համար դէպքին շուրջ:

Պաքուի Ոստիկանութիւնը Բռնարարքներով Կը Կասեցնէ Ցոյց Մը Եւս

Asbarez Staff — Tue, 22 May 2012 06:19:50 +0000

ԵՐԵՒԱՆ, «Արմէնփրէս».- Ատրպէյճանական ընդդիմութեան «Հանրային պալատ» միաւորման քանի մը հարիւր գործիչներ, Երկուշաբթի, Մայիս 21ին Պաքուի կեդրոնը բողոքի ցոյց մը կատարած են՝ պահանջելով վերջ տալ զեղծարարութեանց եւ նախագահին հրաժարումը: Ոստիկանութիւնը մահակներով յարձակած է ցոյցի մասնակիցներուն վրայ՝ ձերբակալելով Ժողովրդական ճակատ եւ այլ կուսակցութիւններու ու երիտասարդական կազմակերպութիւններու տասնեակներով գործիչներ: Նման ցոյցեր նեղ կացութեան կը մատնեն Պաքուի իշխանութիւնները, որովհետեւ արդէն իսկ Պաքու կը գտնուին բազմաթիւ օտար լրագրողներ՝ «Եւրոտեսիլ»ին հետեւելու համար:

Հիւսիսային Իտալիոյ Մէջ Երկրաշարժ Մը 7 Զոհ Խլեց

Asbarez Staff — Tue, 22 May 2012 06:18:33 +0000

ՀՌՈՄ, «Ռոյթըրզ».- Իտալիոյ հիւսիսարեւելեան շրջաններուն մէջ Կիրակի, Մայիս 20ին տեղի ունեցած երկրաշարժ մը, որուն ուժգնութիւնը 6 էր Ռիխթըրի աստիճանաչափով, առնուազն 7 զոհ խլած է եւ պատճառած է առնուազն 50 վիրաւոր: Բազմաթիւ շէնքերու կողքին, շրջանին մէջ գտնուող պատմական կառոյցներ, ներառեալ՝ եկեղեցիներ, աշտարակներ եւ 14րդ դարու դղեակ մը վնասուած են:

Իրանի Եւ Ռուսիոյ Դեսպանները Չեն Մասնակցիր Պաքուի Հակահայ Ձեռնարկին

Asbarez Staff — Sat, 19 May 2012 03:52:10 +0000

ԵՐԵՒԱՆ, «Արմէնփրէս».- Ատրպէյճանի փոխվարչապետ եւ գաղթականական հարցերով պետական յատուկ յանձնախումբի նախագահ Ալի Հասանով Ուրբաթ, Մայիս 18ին յայտարարած է, որ Ատրպէյճանի մօտ Ռուսիոյ եւ Իրանի դեսպանները չեն մասնակցած հակահայ «Լաչին» ֆիլմի շնորհահանդէսին, որ նուիրուած էր Լեռնային Ղարաբաղի ինքնապաշտպանութեան ուժերուն կողմէ Հայաստանի հետ Լաչինի միջանցքի բացման 20 ամեակին:

Թուրքիա Մտահոգ Է Ֆրանսայի Արտաքին Գործոց Նոր Նախարարով

Asbarez Staff — Sat, 19 May 2012 03:50:47 +0000

ԵՐԵՒԱՆ, «Արմէնփրէս».- Թրքական լրատու գործակալութիւնները Հինգշաբթի, Մայիս 17ին իրենց անհանգստութիւնը յայտնած են Ֆրանսայի նորանշանակ արտաքին գործոց նախարար Լորան Ֆապիուսի նկատմամբ՝ յիշեցնելով, որ նախկին նախագահ Ֆրանսուա Միթերանի օրերուն, վարչապետի պաշտօն վարած Ֆապիւս ընդդիմացած է Թուրքիան Եւրոմիութեան լիիրաւ անդամ դարձնելու գաղափարին:

Նոր կառավարութիւնը Ֆրանսայի պատմութեան մէջ առաջինն է, որուն մէջ հաւասար թիւով (17) տղամարդ եւ կին նախարարներ կան:

Յատկանշական է, որ կառավարութիւնը իր առաջին քայլով, 30 տոկոսով կրճատեց երկիրի նախագահին ու կառավարութեան անդամներուն ամսականները՝ գործնականապէս նպաստելով պետական ամավարկին բացը կրճատելու աշխատանքին:

Քանի Մը Տողով

Asbarez Staff — Sat, 19 May 2012 03:50:06 +0000

- Հինգ ամերիկացի ծերակուտականներ նամակ յղած են Ատրպէյճանի նախագահին՝ կոչ ընելով անոր, որ ազատ արձակէ բանտարկութեան դատապարտուած մարդկային իրաւանց գործիչ Պախթիար Հաճիեւը, աւելի քան տարի մը առաջ տեղի ունեցած անոր ձերբակալութիւնը նկատելով ազատ արտայայտուելու եւ հաւաքներ կազմակերպելու իրաւունքներու ոտնակոխում:

- Իսրայէլեան ձայնասփիւռի կայանը Մայիս 17ին հաղորդեց, որ Թուրքիա Իսրայէլը ամբաստանած է Կիպրոսի թրքական հատուածի օդային տարածքը խզելու յանցանքով՝ պնդելով, որ իսրայէլեան օդանաւ մը գրաւեալ հիւսիսային Կիպրոսի օդային սահմանները հինգ առիթներով խախտած է:

- Անյայտ անձեր Մայիս 17ին կրակի տուած են իր սուր ծաղրանկարներով յայտնի թրքական «Փենկիւն» ամսագիրի խմբագրութիւնը: Թերթը յայտնի է յատկապէս Թուրքիոյ վարչապետ Ռեչեփ Թայիփ Էրտողանի գործունէութիւնը քննադատող ծաղրանկարներով:

- Թուրքիոյ պետակաacն մարմին մը Մայիս 18ին որոշած է չեղեալ յայտարարել ֆրանսական ընկերութեան մը հետ 7.7 միլիոն եուրոյի այն համաձայնութիւնը, որուն միջոցաւ ընկերութիւնը թրքական նոր անձնագիրներ պիտի պատրաստէր: Ընկերութիւնը 60 օրուան ընթացքին կրնայ բողոքել այս որոշումին դէմ:

- Իրաքի մօտ Թուրքիոյ դեսպանը Մայիս 18ին կանչուած է արտաքին գործոց նախարարութիւն, ուր անկէ բացատրութիւններ պահանջուած է Պասրա եւ Մոսուլ քաղաքներուն մէջ «իրաքեան իշխանութիւններու հետ չհամաձայնեցուած գործողութիւններ»ուն կապակցութեամբ: Պաղտատ մտահոգութիւն յայտնած է այդ քաղաքներու թրքական հիւպատոսութիւններու գործունէութեան նկամամաբ, սակայն չէ յստակացուցած , թէ ի՞նչ է մտահոգութեան դրդապատճառը:

- Ապրիլ ամսուան ընթացքին Լոս Անճելըսի նաւահանգիստէն արտածումներու եւ ներածումներու ծաւալը մրցանիշ հաստատած է՝ 14.6 տոկոսի աճ մը ապահովելով. սակայն յատկապէս Չինաստանէն ներածումներու նուազումին պատճառով, Լոնկ Պիչի նաւահանգիստէն առեւտուրը 13 տոկոսով նուազած է՝ բաղդատած նախորդ տարուան տուեալներուն:

- Ատրպէյճանի ոսկիի հանքերու արդիւնահանումէն ստացուող եկամուտը կը տնօրինեն նախագահ Իլհամ Ալիեւի ընտանիքի անդամները. այս մասին հաղորդած է ամերիկեան «RevenueWatch» հիմնարկը, որ ուժանիւթի եւ հանքային այլ պաշարներու արդիւնահանման վերահսկողութեան գծով՝ ոչ-կառավարական կազմակերպութիւն մըն է:

- Դանիացիները կը շարունակեն մնալ աշխարհի ամենաերջանիկ ժողովուրդը՝ ըստ Համաշխարհային երջանկութեան զեկոյցին, որ կը պատրաստուի ՄԱԿի հովանիին տակ: 2րդ դիրքը կը գրաւէ Ֆինլանտան, իսկ 3րդը՝ Նորվեկիան: Ամերիկա կը գտնուի 11րդ դիրքի վրայ, մինչ ամենատխուր երկիրներն են Թոկօն եւ Պենին: Այս արդիւնքը հիմնուած է 2005էն 2011ի միջեւ, 156 երկիրներու մէջ կայացած ուսումնասիրութեան մը հիման վրայ:

Մոսկուա Կը Քննադատէ Թուրքիոյ Մէջ Հակառուս Գիտաժողովը

Asbarez Staff — Sat, 19 May 2012 03:48:29 +0000

ԵՐԵՒԱՆ, «Արմէնփրէս».- Մոսկուա «անընդունելի» որակած է Մայիս 12-13ին Պոլսոյ մէջ տեղի ունեցած գիտաժողովի մը ընթացքին ուղղակիօaրէն Ռուսիոյ տարածքային ամբողջականութեան եւ ռուս քաղաքացիներուն ապահովութեան սպառնացող յայտարարութիւնը՝ ազդարարելով, որ նման արարքներ վնաս պիտի հասցնեն Ռուսիա-Թուրքիա կապերուն:

Ուրբաթ, Մայիս 18ին կայացած մամլոյ ասուլիսի մը ընթացքին, Ռուսիոյ արտաքին գործոց նախարարութեան ներկայացուցիչ Ալեքսանտր Լուքաշեւիչ յայտնած է, թէ Կովկասի նուիրուած միջազգային գիտաժողովին ընթացքին, Ռուսիոյ եւ անոր ղեկավարութեան հասցէին անթոյլատրելի արտայայտութիւններ կատարուած են:

«Նկատի ունենալով, որ հաւաքը տեղի ունեցած է Թուրքիոյ իշխանութիւններու արտօնութեամբ, կը ցաւինք, որ անոր ընթացքին վաւերացուած է յայտարարութիւն մը, ուր կոչ կ՛ըլլայ «Ռուսիոյ եւ անոր մեղսակիցներուն՝ դէմ պայքարելու», կամ կ՛ողջունուին «կովկասեան լեռներուն մէջ «սուրբ առաքելութիւնը» շարունակող (չեչեն անջատողականներու ղեկավար) Տողու Ումարովի գլխաւորութեամբ բոլոր զինեալները», աւելցուցած է ան՝ յոյս յայտնելով, որ Թուրքիոյ իշխանութիւնները պիտի հակադարձեն:

Քաթարի Իշխանը Տապալելու Կոչ

Asbarez Staff — Sat, 19 May 2012 03:41:33 +0000

«Անպա» լրատու գործակալութիւնը կը հաղորդէ, որ արտերկիր գտնուող քաթարեան ընդդիմութիւնը հրաժարելու կոչ ուղղած է Քաթարի իշխան շէյխ Համատ պըն Խալիֆա Թանիին՝ անոր վարած քաղաքականութիւնը «ամօթալի» նկատելով:

Գանատա հաստատուած ընդդիմութիւնը Քաթարի իշխող Թանի ընտանիքէն եւ քաթարցի մեծ ընտանիքներէ 65 անհատներու ստորագրութիւնը կրող հաղորդագրութեան մէջ թուած է շէյխ Համատի կառավարութեան կողմէ Քաթարի ժողովուրդը ճնշող վարմունքները եւ ոտնձգութիւնները, ինչպէս նաեւ «շրջանի զարգացումներուն նկատմամբ անոր ամօթալի կարգ մը կեցուածքները»:

Ընդդիմութիւնը քննադատած է նաեւ Իսրայէլի հետ վարկաբեկիչ յարաբերութիւնները եւ այլ երկիրներու դէմ դաւերը:

Տարակարծութիւններ Սուրիոյ Ընդդիմութեան Շարքերուն Մէջ

Asbarez Staff — Fri, 18 May 2012 06:30:05 +0000

ՊԷՅՐՈՒԹ, «Էյ.Փի.».- Արդէն իսկ միացեալ ճակատ ներկայացնելու հարցով դժուարութիւններ դիմագրաւող Սուրիոյ կառավարութեան ընդդիմացող կողմերը Հինգշաբթի, Մայիս 17ին նոր հարուած մը ստացան, երբ Սուրիոյ ազգային խորհուրդին մէջ կարեւոր խմբակ մը հանդիսացող «Տեղական համակարգումի յանձնախումբեր»ը սպառնաց անջատուիլ խորհուրդէն՝ դժուարացնելով ընդդիմութեան նեցուկ կանգնելու Արեւմուտքի եւ Ծոցի արաբական կարգ մը երկիրներու ջանքերը:

Միւս կողմէ, Արաբական լիկայի ընդհանուր քարտուղար Նեպիլ Արապի յայտնեց, որ ներկայիս ջանքերը կեդրոնացած են Սուրիոյ մէջ ամբողջական զինադադարի ապահովման վրայ: Ան ըսաւ, որ տակաւին տագնապի քաղաքական լուծման առիթ գոյութիւն ունի եւ ոչ ոք Սուրիոյ մէջ զինուորական լուծում կը փափաքի:

Նաեւ, իրենց ինքնութիւնը բացայայտել չուզող աղբիւներ, «Ուաշինկթըն Փոս»չին յայտնած են, թէ ամերիկացի պաշտօնատարներ Ուաշինկթընի մէջ արեւելեան Սուրիայէն քրտական պատուիրակութեան մը հետ ունեցած են հանդիպում մը, որուն ընթացքին քննուած է սուրիական բանակին դէմ նոր ճակատ մը բանալու կարելիութիւնը:

Քանի Մը Տողով

Asbarez Staff — Fri, 18 May 2012 06:26:34 +0000

- Թուրքիոյ իշխող Արդարութիւն եւ բարգաւաճում կուսակցութեան Շըրնաք գաւառի մասնաճիւղի փոխատենապետ Ալի Քըլընճ, Մայիս 17ին սպաննուած է անյայտ զինեալներու կողմէ:

- Մայիս 17ին, թուրք զինուորներ Տէօրթեոլ գաւառի լեռնային շրջաններուն մէջ ընդհարում մը ունեցած են Քիւրտիստանի բանուորական կուսակցութեան զինեալներուն հետ. ընթացքին երեք թուրք զինուորներ սպաննուած են:

- Միացեալ Նահանգներու պատմութեան մէջ առաջին անգամ ըլլալով, 2011ի նորածիններուն թիւին մէջ մեծամասնութիւն կազմած են փոքրամասնութեանց զաւակները: Այդ համեմատութիւնը 50.4 առ հարիւրի հասած է 2011ին՝ 1990ին արձանագրուած 37 տոկոսին փոխարէն:

- Այս շաբթուան ընթացքին, Յորդանանի մէջ սկսած են Միջին Արեւելքի մէջ վերջին 10 տարիներու ընթացքին մեծագոյնը նկատուող երկու շաբաթեայ ռազմափորձ մը, որուն կը մասնակցին 19 երկիրներէ 12 հազար զինուորներ, ներառեալ՝ ամերիկացիներ, ֆրանսացիներ եւ Արեւմուտքին դաշնակից արաբական երկիրներէ զինուորներ:

- Եգիպտոսի նախագահութեան Իսլամ եղբայրներ շարժումին կողմէ թեկնածու Մոհամմատ Մուրսի առաջարկած է Եգիպտոսի սահմանադրութիւնը մշակել՝ հիմնուելով Քորանին վրայ: Յիշեցնենք, որ Եգիպտոսի նախկին նախագահ Հոսնի Մուպարաքի ղեկավարման տարիներուն, Իսլամ եղբայրներ շարժումին գործունէութիւնը արգիլուած էր, սակայն ներկայիս Եգիպտոսի խորհրդարանին մէջ մեծագոյն կուսակցութիւնն է անիկա:

- Իրանի նախագահ Մահմուտ Ահմատինեժատ կը յայտնէ, թէ Իսրայէլը ոչնչացնելու համար պատերազմ պէտք չէ, այլ կարելի է այդ նպատակը իրագործել՝ պարզապէս շրջանի բոլոր երկիրներուն կողմէ անոր հետ յարաբերութիւններու խզումով:

- 2020ի ամառնային Ողիմպիական խաղերը հիւրընկալելու համար Մատրիտի, Թոքիոյի եւ Պոլսոյ դիմումները աւելի համոզիչ կը թուին ըլլալ, քան Պաքուի ներկայացուցածը. այսպէս ըսած է Ողիմպիական միջազգային յանձնաժողովի գործադիր վարչութեան ռուս անդամ Վիթալի Սմիրնով: Պաքու երկրորդ անգամ ըլլալով կ՛առաջադրէ իր թեկնածութիւնը: 2020ի խաղերը հիւրընկալող քաղաքին անունը յայտնի պիտի դառնայ յառաջիկայ տարուան Սեպտեմբերին:

Ատրպէյճանցիները Դժգոհ Են Հայերու Նկատմամբ Իրանի Կեցուածքէն

Asbarez Staff — Fri, 18 May 2012 06:26:08 +0000

ՊԱՔՈՒ, «Էյ.Փի.Էյ.», «Արմէնփրէս».- Հինգշաբթի, Մայիս 17ին, Ատրպէյճանի մօտ Իրանի դեսպանատան առջեւ դարձեալ տեղի ունեցած է բողոքի ցոյց մը, որուն ընթացքին ցուցարարները բողոքած են Իրանի մէջ վերջերս ծաւալած հակա-ատրպէյճանական արշաւին դէմ, ինչպէս նաեւ դատապարտած են «իրանցիներու կողմէ հայերուն ցուցաբերուող աջակցութիւնը»:

Ցոյցը կազմակերպողներու շարքին եղած է Հարաւային Ատրպէյճանի անկախութեան կուսակցութիւնը, որ կը պայքարի Իրանի սահմաններէն ներս գտնուող նշեալ տարածքը Ատրպէյճանին կցելու համար:

Քանի մը օր առաջ եւս նման ցոյց մը տեղի ունեցած էր՝ դատապարտելու համար Թաւրիզի մօտ Ատրպէյճանի հիւպատոսարանին առաջ իրանցիներու կազմակերպած ցոյցը, որուն ընթացքին քննադատուած էր «Եւրոտեսիլ 2012»ը Պաքուի մէջ կատարելու որոշումը:

Ատրպէյճանական այս ցոյցը քննադատուած էր Ատրպէյճանի այլախոհ շրջանակներու կողմէ: Այս մասին haggyolu.com լրատու կայքին վրայ լոյս տեսած յօդուածի մը մէջ գրուած է. «Իսրայէլի խոստումներուն հաւատացած եւ Իրանի հետ յարաբերութիւնները քանդած Ալիեւները շատ շուտով պիտի զգան մինակ մնալու ցաւալի պտուղները: Հայերէն վախցած Ալիեւի վարչակարգը մարտահրաւէր կը նետէ Իրանին: Իրան իսլամութեան նկատմամբ հաւատարմութիւն կը սպասէ Ալիեւներէն, բայց անոնք դարձած են Թել Աւիւի ծառաներ»:

Սուրիոյ Մէջ ՄԱԿի Դէտեր՝ Դարձեալ Յարձակումի Թիրախ

Asbarez Staff — Thu, 17 May 2012 05:45:35 +0000

ՄԱԿ, «Ռոյթըրզ».- Չորեքշաբթի, Մայիս 16ին, ռուսական պատկերասփիւռի կայանին հետ հարցազրոյցի մը ընթացքին, Սուրիոյ նախագահ Պաշշար Ասատ քննադատեց արեւմտեան երկիրները, որոնք շարունակաբար կը քննադատեն սուրիական ապահովական ուժերուն արարքները, սակայն չեն դատապարտէր խաղաղ բնակչութեան վրայ զինեալ ընդդիմութեան գործած բռնարարքները: Ան աւելցուց, թէ արտաքին ուժերու աջակցութիւնը վայելող սուրիացիներ եւ օտար վարձկաններ պատասխանատու են երկիրը քաոսային վիճակի մատնելու միտող յարձակումներու՝ աւելցնելով, թէ ապահովական ուժերը ձերբակալած են քանի մը օտարահպատակ վարձկաններ:

Նոյն օրը, ՄԱԿի աղբիւրները հաղորդեցին, թէ կարելի եղած է ապահովել ՄԱԿի վեց դէտերու ապահովութիւնը, անոնց վրայ մէկ օր առաջ տեղի ունեցած յարձակումէն ետք, զանոնք Համա քաղաքը փոխադրելով:

Հրթիռային յարձակումին հետեւանքով, անոնց փոխադրակառքերը վնասներ կրած էին, սակայն դէտերը անվնաս մնացած են:

Յարձակումը, որ երկրորդն է իր տեսակին մէջ, խստօրէն դատապարտուեցաւ Սուրիոյ հարցով ՄԱԿի յատուկ պատուիրակ Քոֆի Անանի կողմէ:

Նաեւ, «Ուաշինկթըն Փոս»չ գրած է, թէ սուրիական ընդդիմութիւնը՝ «Ուաշինկթընի հետ համագործակցաբար, Ծոցի երկիրներէն զէնքեր կը ստանայ»:

Մինչ այդ, Ռուսիոյ արտաքին գործոց նախարարութիւնը յայտարարեց. «Մտահոգիչ են վերջին շրջանին զանգուածային լրատուամիջոցներուն մէջ յայտնուած այն տեղեկութիւնները, որոնք ցոյց կու տան սուրիական ընդդիմութեան հետ կապերը՝ այսպէս կոչուած Քոսովոյի հանրապետութեան իշխանութիւններուն հետ: Խօսքը միայն գործող վարչակարգի տապալման ուղղուած անջատողական շարժման կազմակերպման հարցին մէջ «փորձառութեան փոխանակման» չի վերաբերիր, այլ նաեւ՝ Քոսովոյի տարածքին մէջ սուրիացի զինեալներու պատրաստութեան»:

Միւս կողմէ, լիբանանեան «Ճումհուրրիա» թերթը կը գրէ, թէ երկու դէպքեր կրնան մեծ ազդեցութիւն ունենալ սուրիական տագնապի ապագային, ինչպէս նաեւ ամբողջ շրջանի կացութեան վրայ: Առաջին զարգացումը՝ Սուրիոյ մէջ կալանաւորուած թուրք լրագրողներուն եւ մասնաւորաբար Թուրքիոյ իսլամական շրջանակներուն մէջ մեծ համբաւ վայելող Ատամ Էօզքիւսի ազատ արձակման գծով՝ իրանեան միջնորդութեան յաջողութիւնն է:

Էօզքիւսի ազատ արձակումը կրնայ Անգարայի եւ Դամասկոսի միջեւ որոշ հաշտութեան առաջնորդել, մանաւանդ որովհետեւ Անգարայի մէջ սկսած է զարգանալու այն համոզումը, թէ մօտիկ ապագային սուրիական վարչակարգը տապալելը անկարելի է, որովհետեւ Սուրիոյ նկատմամբ ամերիկեան եւ եւրոպական կեցուածքներուն մէջ կարեւոր շրջադարձեր նկատուած են վերջերս:

Կ՛ըսուի, թէ Թեհրան Անգարայէն խոստում ստացած է Սուրիոյ մէջ ապահովական գօտիի ստեղծման կամ զինուորական միջամտութեան գաղափարներէն հրաժարելու մասին, փոխան՝ Իրանի կողմէ իրանեան հիւլէական թղթածրարին լուծման մէջ Թուրքիոյ միջնորդի դեր տալուն:

Երկրորդ զարգացումը՝ Մայիս 23ին, Պաղտատի մէջ Իրանի հիւլէական թղթածրարի շուրջ բանակցութիւններուն ընթացքին յառաջդիմութեան ակնկալիքն է, որ իր ազդեցութիւնը պիտի ունենայ Սուրիոյ տագնապին նկատմամբ ամերիկեան եւ եւրոպական կեցուածքներուն վրայ. բան մը, որուն ցուցանիշերը արդէն սկսած են ի յայտ գալու, մասնաւորաբար՝ Դամասկոսի մէջ Մայիս 10ին տեղի ունեցած երկու ականահարումներէն ետք:

Ֆրանսուա Հոլանտ Կը Ստանձնէ Ֆրանսայի Ղեկը

Asbarez Staff — Thu, 17 May 2012 05:44:24 +0000

ՓԱՐԻԶ, «Ա.Էֆ.Փէ.».- Երեքշաբթի, Մայիս 15ին կայացած երդման արարողութենէն ետք, Ֆրանսայի նախագահական ընտրութեանց ընթացքին յաղթանակ արձանագրած Ֆրանսուա Հոլանտ ստանձնեց երկիրին ղեկը՝ դառնալով երկիրի հինգերորդ հանրապետութեան 7րդ նախագահը: Ան յայտարարեց, որ կը գիտակցի, թէ երկիրին առջեւ ծառացած են լուրջ խնդիրներ, որոնց շարքին՝ ամավարկի բացը ու տնտեսական դանդաղ աճը:

Հոլանտ աւելի ուշ վարչապետ նշանակեց Ժան Մարք Այրոնը եւ ապա մեկնեցաւ Պերլին, ցոյց տալու համար, թէ մեծ կարեւորութիւն կ՛ընծայէ ֆրանս-գերմանական ամուր յարաբերութիւններուն, հակառակ տնտեսական ճգնաժամէն դուրս գալու միջոցին շուրջ իր ու Գերմանիոյ վարչապետ Անճելա Մերքելի միջեւ տարակարծութեանց:

Նշենք, որ Հոլանտի երդման արարողութեան հրաւիրուած սահմանափակ թիւով հիւրերուն շարքին էր Ֆրանսայի հայ առաքելական եկեղեցւոյ առաջնորդ Նորվան եպս. Զաքարեան:

Թրիփոլիի Մէջ Դարձեալ Զինեալ Բախումներ Կ՛արձանագրուին

Asbarez Staff — Thu, 17 May 2012 05:43:48 +0000

ՊԷՅՐՈՒԹ, «Եու.Փի.Այ.».- Լիբանանեան բանակին միջամտութեան շնորհիւ հաստատուած միօրեայ համեմատական խաղաղութենէն ետք, Չորեքշաբթի, Մայիս 16ին Թրիփոլիի մէջ վերսկսան զինեալ բախումներ, որոնց հետեւանքով վիրաւորուեցան երկու զինուորներ, տասը զինեալներ ու քաղաքայիններ: Թրիփոլիի բախումները ցարդ առնուազն 8 զոհ խլած են եւ հարիւրաւոր վիրաւորներ պատճառած:

Թուրքիա-Իսրայէլ Լարուածութիւնը Մեղմացնելու Ամերիկեան Փորձեր

Asbarez Staff — Thu, 17 May 2012 05:42:51 +0000

ԵՐԵՒԱՆ, «Արմէնփրէս».- Թուրքիոյ եւ Իսրայէլի միջեւ լարուածութիւնը մեղմացնելու նպատակով, Միացեալ Նահանգները կը ծրագրէ երկու երկիրներէն պաշտօնատարներու միջեւ հանդիպում մը կազմակերպել: Ըստ թրքական «Անատոլու» լրատու գործակալութեան՝ Ուաշինկթըն նախ կ՛ուզէ կազմակերպել երկու երկիրներու պաշտպանութեան նախարարներու միջեւ հանդիպում մը: Թուրքիա-Իսրայէլ լարուածութիւնը սկսած էր Կազա մարդասիրական օգնութիւն փոխադրող նաւուն վրայ իսրայէլացի զինուորներու կողմէ 9 թուրքերու սպանութեան պատճառով: Թուրքիա կը պահանջէ, որ Թել Աւիւ պաշտօնապէս ներողութիւն խնդրէ եւ վնասուց հատուցում տրամադրէ զոհերու ընտանիքներուն:

Զգուշաւոր Խաղաղութիւն Կը Տիրէ Թրիփոլիի Մէջ

Asbarez Staff — Wed, 16 May 2012 05:51:55 +0000

ՊԷՅՐՈՒԹ, «Էյ.Փի.».- Երեքշաբթի, Մայիս 15ին, հիւսիսային Լիբանանի Թրիփոլի քաղաքին մէջ զգուշաւոր խաղաղութիւն հաստատուած է, մինչ լիբանանեան բանակը սկսած է տեղակայուելու քաղաքի սիւննի եւ շիի շրջաններուն միջեւ:

Լիբանանի նախագահ զօր. Միշել Սլէյման հերքեց այն տեղեկութիւնները, թէ Թրիփոլիի միջադէպերը ուղղակիօրէն կապուած են սուրիական ներքին իրադարձութիւններուն հետ, մինչ վարչապետ Նեժիպ Միքաթի հաստատեց, որ հիւսիսի մէջ բանակին առաքելութիւնը կը վայելէ լիբանանեան պետութեան քաղաքական եւ պաշտօնական զօրակցութիւնը:

Իր կարգին, հիւսիսային Լիբանանի միւֆթի Մալեք Շաար ընդգծեց, որ Թրիփոլիի մէջ լիբանանեան բանակին միջամտութիւնը կը միտի պահպանելու շրջանին կայունութիւնը, իսկ բանակի հրամանատար զօր. Ժան Քահուաժի շեշտեց, որ հարցերը պիտի լուծուին աստիճանաբար:

Զինեալ Միջադէպ Մը Եւս Ատրպէյճանի Բանակին Մէջ

Asbarez Staff — Wed, 16 May 2012 05:51:09 +0000

ԵՐԵՒԱՆ, «Արմէնփրէս».- Ատրպէյճանի պաշտպանութեան նախարարութեան Ղազախի շրջանին մէջ տեղակայուած զօրամասերէն մէկուն մէջ, Երեքշաբթի, Մայիս 15ին զինուոր մը գնդակահարած է իր ծառայակիցը, որմէ ետք անձնասպան եղած է: Նոյն օրը, Ատրպէյճանի լրագրողներու ռազմական հետազօտութիւններու «Տոքթրինա» կեդրոնը հաղորդեց, թէ այս տարուան առաջին չորս ամիսներուն ընթացքին, Ատրպէյճանի զինուած ուժերուն մէջ արձանագրուած է 28 զոհ:

Յունաստանի Մէջ Նոր Ընտրութիւններ

Asbarez Staff — Wed, 16 May 2012 05:50:38 +0000

ԱԹԷՆՔ, «Ռոյթըրզ».- Երեքշաբթի, Մայիս 15ին հաղորդուեցաւ, թէ Մայիս 6ին Յունաստանի խորհրդարանական ընտրութեանց արդիւնքներուն հիման վրայ՝ համախոհական նոր կառավարութիւն մը կազմելու վերջին փորձը ձախողած է, ինչ որ կը նշանակէ, թէ նոր ընտրութիւններ տեղի պիտի ունենան Յունիսին: Ընտրութեան ընթացքին անակնկալօրէն երկրորդ դիրքը գրաւած ձախակողմեան «Սիրիզա» կուսակցութիւնը կ՛ընդդիմանայ միջազգային վարկատուներու հետ գործակցութիւնը շարունակելու ընտրանքին:

Միւս կողմէ՝ եուրօ դրամանիշը գործածող երկիրներու պատասխանատուները ազդարարեցին Յունաստանի իշխանութեանց, թէ կարելի չէ վարկատուներու հետ գործակցութիւնը խզել եւ միաժամանակ եուրոյի գործածութիւնը շարունակել՝ այդպիսով Աթէնքը դնելով եուրոյի գործածութեան ու պարտատէրերուն հետ գործակցութիւնը շարունակելու միջեւ յստակ ընտրանք մը կատարելու պարտադրանքին տակ:

Ամերիկացի Երգչուհին Կը Մերժէ Պաքուի «Եւրոտեսիլ»ին Մասնակցելու Հրաւէրը

Asbarez Staff — Wed, 16 May 2012 05:49:23 +0000

ԵՐԵՒԱՆ, «Արմէնփրէս».- Թեքսասէն երգչուհի Սառա Հիքմըն մերժած է Պաքուի մէջ տեղի ունենալիք «Եւրոտեսիլ 2012»ին մասնակցելու հրաւէրը, Ատրպէյճանի մէջ մարդկային իրաւունքներու շարունակուող ոտնահարումներուն պատճառով:

Ատրպէյճանական «Թուրան» լրատու գործակալութիւնը կը տեղեկացնէ, թէ Ատրպէյճանի պետական քարիւղի ընկերութիւնը խոստացած էր հոգալ երգչուհիին ճանապարհորդութեան բոլոր ծախսերը, սակայն երբ երգչուհին Ատրպէյճանի մէջ մարդկային իրաւանց սարսափելի վիճակին մասին տեղեկութիւններ ստացած է Միջազգային ներում կազմակերպութենէն, որոշած է Պաքու չմեկնիլ:

«Մարդկային իրաւունքներու խախտումներուն մասին հարցերէն շատերը կապուած են նոյնինքն Ատրպէյճանի պետական քարիւղի ընկերութեան հետ: Մարդոց հետապնդումներ, ծեծ ու ձերբակալութիւններ, իրենց տուներէն վռնտել ու բնակարանները քանդել պատահած են Պաքուի մէջ, «Եւրոտեսիլ»ին համար դահլիճ կառուցելու նպատակով: Միջազգային կազմակերպութիւններու տուեալներով՝ 2011ի համեմատ, Ատրպէյճանի մէջ մարդկային իրաւունքներու վիճակը վատթարացած է այս տարի: Կառավարութիւնը ամօթալի դատական գործընթացներէ ետք կը բանտարկէ տասնեակներով գործիչներ, իսկ երկիրին մէջ կը շարունակուին կրօնական ազատութիւններու սահմանափակումները ու բանտարկեալներու նկատմամբ խոշտանգումները: Ատրպէյճան նաեւ կ՛արգիլէ Եւրոխորհուրդի քաղաքական բանտարկեալներու գծով զեկուցողին մուտքը: Որոշած եմ Ատրպէյճան չմեկնիլ, որովհետեւ կ՛ուզեմ կանգնիլ իմ այն եղբայրներուս եւ քոյրերուս կողքին, որոնք դաժանօրէն վռնտուած են իրենց տուներէն: Չեմ փափաքիր մարդկային իրաւունքներու խախտումներու մասնակից դառնալ: Կը յուսամ, որ մրցոյթի բեմէն կը հնչեն նաեւ Ատրպէյճանի մէջ տիրող իրավիճակը դատապարտող ձայներ», գրած է Սառա Հիքմըն:

Միւս կողմէ, Բրիտանիոյ Արտաքին քաղաքական հետազօտութիւններու կեդրոնը նշած է, թէ Ատրպէյճանի կառավարութիւնը վերջին 10 տարիներուն ընթացքին ոչ թէ երկիրը ժողովրդավար դարձնելու, այլ միայն սահմանափակ կերպով արդիականացնելու քաղաքականութիւն վարած է: Ատրպէյճանի մասին կեդրոնին զեկոյցին մէջ կը նշուի, թէ մինչ երկիրին տնտեսութիւնը զգալիօրէն աճած է վերջին տասնամեակին, քաղաքական շարժառիթներով ձերբակալութիւնները շարունակուած են, իսկ քաղաքական ազատութիւններու, ազատ ընտրութիւններու եւ մամուլի ազատութեան բնագաւառներուն մէջ վիճակը վատթարացած է: Բրիտանացի քաղաքագէտները կը զգուշացնեն, որ քարիւղի հարստութիւնը անսահման չէ եւ այդ պատճառով ալ, Պաքու պէտք է իր հարստութիւնը ծախսէ խելամտօրէն՝ պայքարելով զեղծարարութեանց դէմ, այլապէս, կառավարութիւնը կրնայ գտնուիլ հասարակութեան բանեցնելիք ճնշումներուն տակ:

Ռուսիա Եւս Սուրիոյ Յարձակումներուն Ետին «Քայիտա»ի Դաշնակիցներ Կը Տեսնէ

Asbarez Staff — Wed, 16 May 2012 05:48:36 +0000

ԴԱՄԱՍԿՈՍ, «Էյ.Փի.».- Երեքշաբթի, Մայիս 15ին, մինչ Սուրիոյ իշխանութեանց ընդդիմադիրները կը հաղորդէին, թէ երկիրին քանի մը շրջաններուն մէջ զինեալ բախումներ տասնեակներով զոհեր խլած են, Արաբական լիկան կը յայտարարէր, որ Գահիրէի մէջ Մայիս 16-17ին նախատեսուած սուրիական ընդդիմութեան ժողովը անորոշ թուականով յետաձգուած է՝ ընդդիմութեան խնդրանքով:

Նաեւ, Սուրիոյ կեդրոնական ընտրական յանձնաժողովը յայտարարեց, թէ Մայիս 7ի խորհրդարանական ընտրութեանց մասնակցութեան համեմատութիւնը 51.26 տոկոս եղած է, հակառակ տիրող անկայուն վիճակին:

Միւս կողմէ, Ռուսիոյ արտաքին գործոց փոխնախարար Կենատի Կաթիլով յայտնեց, որ Սուրիոյ մէջ տեղի ունեցած վերջին յարձակումներուն ետին «Քայիտա»ի դաշնակից ահաբեկչական խմբաւորումներ կը կանգնին: Ան նշեց, որ հաստատ տեղեկութիւններ գոյութիւն ունին այն մասին, թէ զինեալներու շարքին լիպիացի եւ արաբական այլ երկիրներէ վարձկաններ կան: Ան աւելցուց, թէ ՄԱԿի եւ Արաբական լիկայի Սուրիոյ հարցով յատուկ պատուիրակ Քոֆի Անանի ծրագիրի յաջողութեան համար տակաւին առիթ կայ՝ շեշտելով, որ Ռուսիա իր կարելին պիտի ընէ այդ ծրագիրի ձախողութիւնը կանխարգիլելու համար:

Իրանի արտաքին գործոց նախարար Ալի Աքպար Սալեհի վերահաստատեց, որ Իրան սուրիական ներքին հարցին մէջ արտաքին որեւէ միջամտութեան դէմ է, մինչ Աուրիոյ մօտ Իրանի նախկին դեսպան՝ ներկայիս Իրանի խորհրդարանի նախագահի խորհրդական Հուսէյն Շէյխուլիսլամ, քննադատեց Սուրիոյ հարցով Թուրքիոյ վարած քաղաքականութիւնը: Շէյխուլիսլամ յայտարարեց, որ Թուրքիան կը շարունակէ իր շահերուն համար օգտագործել Սուրիոյ մէջ տիրող իրադրութիւնը: «Թուրքիան Սէուտական Արաբիոյ, Քաթարի, Ամերիկայի եւ Իսրայէլի հետ միատեղ, բոլոր առիթները կը փորձէ շահագործել, Սուրիոյ մէջ յեղաշրջում իրականացնելու համար», ըսաւ ան:

Նաեւ, իրանեան «Մեհր» լրատու գործակալութիւնը հաղորդեց, որ Իրանի գերագոյն հոգեւոր պետի խորհրդական Ղուլամ Ալի Հատատ Ատել յայտնած է, որ սուրիական վարչակարգը ականահարումներով պիտի չտապալի, որովհետեւ ժողովրդային զօրակցութիւն կը վայելէ: «Եթէ Սուրիոյ նախագահ Պաշշար Ասատ, Միջին Արեւելքի կարգ մը ղեկավարներու նման Ամերիկայի եւ Իսրայէլի քաղաքականութեան համահունչ գործէր, ապա այսպիսի ականահարումներ տեղի պիտի չունենային», աւելցուցած է ան:

Քանի Մը Տողով

Asbarez Staff — Wed, 16 May 2012 05:42:45 +0000

Թեհրանի մէջ Մայիս 15ին կախաղան հանուած է 24ամեայ իրանցի քաղաքացի մը, որ խոստովանած էր, թէ Իսրայէլի գործակալ մըն էր ու մասնակցած էր 2010ին հիւլէական մարզէն ներս իրանցի գիտնական մը սպաննելու գործողութեան, որ տեղի ունեցած էր Թեհրանի կեդրոնը: Վերջին քանի մը տարիներու ընթացքին Իրանի մէջ սպաննուած են հիւլէական բնագաւառէն իրանցի առնուազն հինգ գիտնականներ:

Աղթամարի Ս. Խաչ Եկեղեցին Շահագործելու Ջանքերը Կը Շարունակուին

Asbarez Staff — Tue, 15 May 2012 05:16:25 +0000

ԵՐԵՒԱՆ, «Արմէնփրէս».- Վանի Աղթամար կղզիին վրայ գտնուող հայկական Սուրբ Խաչ եկեղեցին թրքական իշխանութիւններուն կողմէ տակաւին կ՛օգտագործուի իբրեւ զբօսաշրջիկներ գրաւելու միջոց: Թրքական «Զաման» թերթը կը տեղեկացնէ, թէ երկրին իշխանութիւնները յայտարարած են, որ յառաջիկայ ամիսներուն ընթացքին Սուրբ Խաչ եկեղեցւոյ շրջակայքը պիտի բարեկարգուի:

Թուրքիոյ մշակոյթի եւ զբօսաշրջութեան նախարարութիւնը յայտարարած է, որ պիտի ստեղծուին հանգիստի, զբօսնելու եւ կանաչ գօտիներ: Նախագիծի կարեւորագոյն բաժինը պիտի ըլլայ կղզիի լուսաւորութեան ցանցի ամբողջացումը:

Ըստ Կուլիեւի՝ Ատրպէյճան Բաւական Ուժ Ունի «Ազատագրելու Համար Իր Հողերը»

Asbarez Staff — Tue, 15 May 2012 05:15:15 +0000

ՊՈԼԻՍ, «Մարմարա».- Ատրպէյճանի արտաքին գործոց նախկին նախարար, իսկ այժմ Հունգարիոյ մօտ Ատրպէյճանի դեսպան Վիլայէթ Կուլիեւ, Թուրք-Հունգար գործարարներու միութեան կողմէ կազմակերպուած համագումարի մը ընթացքին ըսած է, որ Ատրպէյճան «բաւական ուժեղ է՝ ազատագրելու իր հողամասերը», բայց Ռուսիոյ հետ ստորագրուած համաձայնութիւնները արգելք կը հանդիսանան այդ նպատակին հասնելու զինուորական գործողութեանց առջեւ:

«Այդ համաձայնագիրին համաձայն, եթէ մենք Հայաստանի դէմ պատերազմ հռչակենք, 5 թրքախօս հանրապետութիւններ պիտի ստիպուին՝ Ռուսիոյ հետ միասին, կանգնելու Հայաստանի կողքին։ Ուրեմն, կրնայ պատահիլ, որ մեր թուրք եղբայրները զիրար կոտորեն։ Մենք չենք ուզեր, որ այսպիսի բան մը պատահի», ըսած է ան։

Համագումարը կազմակերպուած էր քննարկելու համար «Հայաստանի կողմէ ատրպէյճանական հողերու բռնագրաւումին» վնասները՝ վերջին քսան տարիներուն ընթացքին: «Ղարաբաղը 4500 քիլօմեթր քառակուսի տարածութիւն ունի, բայց հայերը գրաւած են 12,000 քիլօմեթր քառակուսի տարածք մը։ Պատերազմներն ալ իրենց օրէնքները ունին, բայց Հայաստան չէ ճանչցած այդ օրէնքները», ըսած է ան եւ ապա նշած Ատրպէյճանի կրած «սարսափազդու» վնասները՝ զանոնք գնահատելով 60 միլիառ տոլարով։

Ատրպէյճանի Ընդդիմութիւնը Կրնայ Ցոյցերու Դիմել «Եւրոտեսիլ»ի Օրերուն

Asbarez Staff — Tue, 15 May 2012 05:14:09 +0000

ԵՐԵՒԱՆ, «Արմէնփրէս».- Ատրպէյճանի ընդդիմադիր կուսակցութիւններու «Հանրային պալատ» միաւորումը կը ծրագրէ Պաքուի մէջ Մայիս 22-26ին կայանալիք «Եւրոտեսիլ 2012» երաժշտական մրցոյթի օրերուն բողոքի ցոյցեր իրականացնել Պաքուի կեդրոնական շրջաններուն մէջ, եթէ մինչ այդ իշխանութիւնները ազատ չարձակեն եօթը քաղաքական բանտարկեալներ:

Ատրպէյճանի Ժողովրդական ճակատ կուսակցութեան նախագահ Հասան Քերիմով, ատրպէյճանական «Թուրան» լրատուական գործակալութեան յայտնած է, թէ համաձայնութիւն գոյացած է տեղացի եւ արտասահմանցի հանդիսատեսներու հետ, որպէսզի մրցումի սրահին մէջ եւս բանտարկեալները ազատ արձակելու կոչեր կատարուին:

Իրանեան Մամուլին Համաձայն՝ «Մոսատ»ը Ազատօրէն Կը Գործէ Ատրպէյճանի Մէջ

Asbarez Staff — Tue, 15 May 2012 04:37:14 +0000

ԵՐԵՒԱՆ, «Արմէնփրէս».- Իրանեան լրատուամիջոցներ Երկուշաբթի, Մայիս 14ին կը հաղորդեն, թէ Իսրայէլի գաղտնի սպասարկութեան՝ «Մոսատ»ի, ի նպաստ լրտեսութիւն կատարելու համար Իրանի մէջ դատապարտուած 13 գործակալներ Ատրպէյճանի մէջ շարք մը հանդիպումներ ունեցած են իսրայէլացի գործակալներու հետ:

Աւելի կանուխ «Իրնա» լրատու գործակալութիւնը հաղորդուած էր, թէ «Մոսատ»ի գործակալները անարգել գործունէութիւն կը մշակեն Ատրպէյճանի տարածքին, եւ այդ պատճառով, քանի մը օր առաջ Իրանի մօտ Ատրպէյճանի դեսպանը դարձեալ կանչուած է Իրանի արտաքին գործոց նախարարութիւն, ուր անոր բողոքագիր մը յանձնուած է՝ պնդելով, թէ նշեալ իսրայէլացի գործակալներէն ոմանք կ՛ամբաստանուին իրանական հիւլէական ծրագիրի գիտնականներուն դէմ ահաբեկչութիւն իրագործելու յանցանքով:

Նաեւ, իրանեան թերթ մը գրած է, թէ Ատրպէյճանը «Իսրայէլի արտաքին հետախուզութեան գործակալներուն համար դրախտի վերածուած է», եւ թէ Ատրպէյճան կը հանդիսանայ «Կովկասի մէջ հակաիրանական դաւադրութիւններու սատանայական կեդրոն», իսկ «Ֆարս» գործակալութիւնը յայտնած էր, որ իսրայէլ-ատրպէյճանական յարաբերութիւնները կը սպառնան Իրանի ազգային շահերուն եւ որ Իրանի դէմ գործողութիւններուն համար Ատրպէյճան Իսրայէլի օդուժին յանձնած է իր «Սիթալճայ» ռազմակայանը:

5 Չոհեր՝ Լիբանանի Թրիփոլի Քաղաքին Մէջ Պատահած Բախումներէն

Asbarez Staff — Tue, 15 May 2012 04:36:05 +0000

ԹՐԻՓՈԼԻ, «Էյ.Փի.».- Շաբաթավերջին Թրիփոլիի մէջ սկսած զինեալ բախումները Երկուշաբթի, Մայիս 14ին շարունակուեցան՝ ցարդ սպաննուածներուն թիւը հասցնելով 5ի: Արձանագրուած են նաեւ տասնեակներով վիրաւորներ: Բախումները սկսան, երբ ընդհանուր ապահովութեան ուժերուն կողմէ ձերբակալուեցաւ ահաբեկչական կազմակերպութեան մը հետ գործակցելու յանցանքով ամբաստանուած ծայրայեղ իսլամական մը: Այս դէպքին իբրեւ հետեւանք, ծայրայեղ իսլամականներ Թրիփոլիի «Նուր» հրապարակին վրայ կազմակերպեցին ցոյց մը, որուն ընթացքին անոնք հրկիզուող անիւներով փակեցին նաեւ Թրիփոլի առաջնորդող բոլոր ճամբաները: Զինեալ իսլամականներու եւ լիբանանեան բանակին միջեւ բախումներուն ընթացքին սպաննուածներուն մէջ կայ բանակային մը:

Սուրիացի Այլախոհները Սուրիացի Բանակայիններ Կը Սպաննեն

Asbarez Staff — Tue, 15 May 2012 04:35:10 +0000

ԱՄՄԱՆ, «Ռոյթըրզ».- Երկուշաբթի, Մայիս 14ին, Դամասկոսէն 110 մղոն հիւսիս գտնուող Ռասթան քաղաքին մէջ, Սուaրիոյ իշխանութեանց դէմ զէնք բարձրացուցած զինեալներ սպաննեցին առնուազն 23 զինուորներ՝ միաժամանակ հաղորդելով, թէ բանակայիններ 9 հոգի սպաննած են քաղաքին մէջ:

Միւս կողմէ, Սուրիոյ կառավարութեան ընդդիմացող Սուրիոյ ազգային խորհուրդը Երկուշաբթի օր յայտարարեց, թէ պիտի չմասնակցի Արաբական լիկայի կողմէ Մայիս 16-17ին կայանալիք այն հաւաքին, որուն նպատակն էր ընդդիմութեան միացեալ ճակատ մը կազմելը:

Իր կարգին, Սուրիոյ մօտ Թուրքիոյ դեսպան Էօմեր Էօնհոն Էսթոնիոյ մէջ յայտարարեց, որ սուրիական վարչակարգը կը փորձէ համոզել ժողովուրդը, թէ նախագահ Պաշշատ Ասատի վարչակարգին միակ այլընտրանքը քաղաքացիական պատերազմը կամ կրօնական ծայրայեղականութիւնն է: Թուրքիոյ դեսպանը աւելցուց, որ միջազգային ընտանիքը պէտք է սուրիացիներուն մտավախութիւնները փարատէ՝ պնդելով, թէ վարչակարգի փոփոխութիւնը աւելի վատ կացութեան պիտի չառաջնորդէ: Ան նաեւ ըսաւ, թէ Անգարա Սուրիոյ մէջ որեւէ զինուորական միջամտութեան կ՛ընդդիմանայ, «սակայն եթէ օր մը մեր սահմաններուն վրայ 200 հազար սուրիացի գտնենք, ստիպուած պիտի ըլլանք բան մը ընելու»:

Մինչ այդ, սուրիական լրատուամիջոցները հաղորդեցին, որ Սուրիոյ բանակը Իտլիպ նահանգին մէջ ձախողութեան մատնած է Թուրքիայէն վարձկաններու ջոկատի մը յարձակումը եւ գրաւած է անոր մօտ գտնուող զէնքերն ու զինամթերքը: Յարձակողներու շարքերուն մէջ զոհեր արձանագրուած են: Նաեւ, Իտլիպի մէջ, Լաթաքիոյ նաւահանգիստը Հալէպին կապող երկաթուղիին վրայ յարձակում կատարուած է:

Նախագահ Ասատ Կիրակի օր Սահմանադրական դատարան մը ստեղծելու հրամանագիր հրապարակեց, իսկ Ռուսիոյ արտաքին գործոց նախարարութիւնը ՄԱԿի Ապահովութեան խորհուրդին կոչ ուղղեց՝ իր ջանքերը կեդրոնացնելու դէպի Սուրիա զէնքի մաքսանենգման հարցին վրայ, աւելցնելով, որ «միջազգային ընտանիքը պէտք է սուրիական ներքին տագնապը շարունակել փորձողներուն ճամբան փակէ»: Նախարարութեան բանբերը աւելցուց, թէ ծայրայեղական խմբաւորումները զինելը կը հակասէ ՄԱԿի յատուկ պատուիրակ Քոֆի Անանի ծրագիրին:

Վերջապէս, ակնարկելով անցեալ շաբաթ Դամասկոսը հարուածած ականահարումներուն՝ Միացեալ Նահանգներու պաշտպանութեան նախարար Լիան Փընեթա յայտարարեց, որ այդ ականահարումները կը կրեն «Քայիտա»ի մատնահետքերը եւ «կը յիշեցնեն տարիներ առաջ Իրաքի մէջ այդ կազմակերպութեան կատարած ականահարումները»: Ան ընդունեց, թէ «Քայիտա»էն տարրեր սկսած են Սուրիա ապաստանելու՝ օգտուելով այդ երկիրին մէջ տիրող քաոսային վիճակէն:

Քանի Մը Տողով

Asbarez Staff — Tue, 15 May 2012 04:34:32 +0000

- Տաղստանի մէջ Մայիս 14ին տեղի ունեցած զինեալ գործողութիւններու ընթացքին, Ռուսիոյ ապահովական ուժերը սպաննած են թուրք ահաբեկիչ մը, որ ըստ Ռուսիոյ ահաբեկչութեան դէմ պայքարի գրասենեակին՝ աւելի քան 5 տարիներէ ի վեր կը ղեկավարէր Տաղստանի մէջ գործող ահաբեկչական խմբաւորում մը:

- Թրքական «Տողան» լրատու գործակալութիւնը հաղորդեց, թէ անցնող շաբաթավերջին, Իրանի միջնորդութեան շնորհիւ, Սուրիա ազատ արձակած է երկու թուրք լրագրողներ, որոնք մօտաւորապէս երկու ամիս առաջ ձերբակալուած էին: