Խռկոցը (snoring) քունի մէջ քթային կամ բերանային շնչառութեան ընթացքին արտադրուած անբնական ձայնն է: Այս խռկոցին արտադրութեան գործողութիւնը կը կոչուի խռկալ (snore):
Խռկալ բառին հայերէն հոմանիշներն են՝ խռնչել, խռմփալ, խռալ եւ խռլտալ: Իսկ խռկոց բառին հոմանիշներն են՝ խռնչոց, խռմփոց, խռոց եւ խռլտոց:
Խռկալը համամարդկային երեւոյթ է: Անիկա կը պատահի անխտիր բոլոր մարդոց, այսինքն՝ սեւին եւ ճերմակին, աղքատին եւ հարուստին, մեծին եւ պզտիկին, զարգացած մարդուն եւ տգէտին, իգական եւ արական սեռին: Մեզմէ շատեր ունին այս փորձառութիւնը: Շատ քիչեր չեն խռկար: Խռկացող անձը չի լսեր եւ չզգար իր խռկոցը: Շատերու համար անիկա ամէնօրեայ անլուծելի տագնապ է եւ մղձաւանջ:
Բնական պայմաններու մէջ առողջ անձ մը չի խռկար:
Խռկոցը կը պատահի առաւելաբար տղամարդոց եւ տարեցներու մօտ: Իսկ կիներ զայն առաւելաբար կ՛ունենան յղութեան շրջանին:
Յաճախ կը հանդիպինք մարդոց, որոնք կը նկարագրեն իրենց կողակիցին արտադրած արտառոց ձայնը քունի ընթացքին եւ կը նմանցնեն այդ ձայնը շոգեկառքի մը փուֆ-փուֆին, սրինգի մը կամ փողի մը սուլոցին, դրան մը ճռինչին, խելագարի մը անակնկալ եւ արտառոց պոռթկումին, կրակի վրայ ճնշիչ կաթսայի մը ֆշշոցին: Խռկոցը կը դառնայ ընկալողին համար զզուելի, խանգարիչ եւ անհանգստացնող:
Խռկացողը կը խանգարէ իր շրջապատին գիշերային խաղաղութիւնը եւ լռութիւնը, արգելք կը հանդիսանայ իր քով քնացող անձին հանգիստին եւ քունին: Խռկացողը իր խռկոցով կը գրգռէ իր դիւրազգաց կողակիցը եւ երբեմն կ՛ունենայ ընտանեկան, այսինքն՝ ամուսին-կին անհասկացողութիւն, վիճաբանութիւն, անբնական փոխյարաբերութիւն եւ տարակարծութիւն: Իսկ ծայրայեղ պարագաներուն մինչեւ իսկ ամուսնալուծում:
Խռկոցը ունի երկու սկզբնաղբիւրներ (origin).
1. Քիթ եւ քթաըմբան (nasopharynx).
2. Ըմբան-կոկորդ (pharynx) եւ բերան:
Խռկոցին հիմնական ախտապատճառները կը գտնուին այս երկու կեդրոններուն մէջ:
Քթային ախտապատճառները կրնան ըլլալ միակողմանի կամ երկկողմանի: Այս ախտապատճառներն են.
1. Քիթի գերզգայնութիւն, որ կը յառաջացնէ քիթի խլնաթաղանթի արիւնախռնում (congestion) եւ ջրախռնում (edema).
2. Քիթի միջնորմի (septum) ծուռութիւն.
3. Քիթի լաւորակ եւ վատորակ ուռեր.
4. Քիթի յետսամասի ընդոծին մկանային կամ ոսկրային մասնակի խցում (choanal atresia).
5. Քիթին մէջ օտար մարմինի գոյութիւն.
6. Քթաըմբանի գեղձուռոյցք (adenoids).
7. Քթաըմբանի զանազան տեսակի ուռեր:
Վերոյիշեալ ախտապատճառները կը խցեն քիթի խոռոչը մասնակիօրէն: Ներշնչուող օդը դժուարութեամբ կ՛անցնի քիթի խոռոչէն եւ կը յառաջացնէ տեսակաւոր սուլոցային ձայներ, որոնց ուժգնութիւնը կախեալ է խցումի տարողութենէն:
Ըմբանային-բերանային ախտապատճառներն են.
1. Ծաւալած նշիկներ (tonsils), լեզուակ (uvula), լեզու եւ լեզուի արմատ, որոնք կրնան ըլլալ ընդոծին կամ  բորբոքումի մը հետեւանքով.
2. Ըմբանի յետսապատի ուռեր եւ թարախակոյտ.
3. Ըմբանային լաւորակ եւ վատորակ ուռեր.
4. Լեզուի թուլութիւն քնանալու ընթացքին, երբ լեզուն կ՛ուղղուի դէպի ըմբան.
5. Ծնօտի ընդոծին յետադարձութիւն (retrognathia), որուն հետ լեզուն ալ մասնակիօրէն կը տեղադրուի ետեւ՝ դէպի ըմբան:
Վերոյիշեալ հինգ ախտապատճառները մասնակիօրէն կը խցեն կոկորդը: Ուստի ներշնչուած օդը հանգստօրէն չուղուիր դէպի խռչափող եւ կ՛արտադրուի անբնական շնչառական ձայն մը՝ խռկոցը:

6. Ընդոծին երկար եւ թոյլ մկանային քիմք: Քնանալու ընթացքին երկար եւ թոյլ մկանային քիմքը կը թրթռայ եւ կ՛արտադրէ յատուկ թրթռացումային խռկոց:
Խռկոցը ունի նաեւ երկրորդական ախտապատճառներ.
1.Գիրութիւն.
Գէր անձը կ՛ունենայ ըմբանային անցքի նեղութիւն եւ մասնակի խցում:
2. Ալքոլամոլութիւն.
Ալքոլը կը թուլցնէ կոկորդի եւ քիմքի մկանները, որոնք մասնակիօրէն կը խցեն ըմբանը:
3. Ծխախոտի գործածութիւն.
Ծխախոտի երկարատեւ գործածութիւնը կը յառաջացնէ կոկորդի եւ քիթի մնայուն բորբոքում եւ մասնակի խցում:
4. Քնաբեր եւ հակագերզայնութեան դեղեր ու թմրեցուցիչներ.
Այս դեղերը կը թուլցնեն կոկորդի եւ քիմքի մկանները:
5. Քնանալու ընթացքին մարմինի, վիզի եւ գլխու սխալ դիրքորոշում.
Կռնակի վրայ պառկած վիճակով լեզուն կ՛ուղղուի դէպի ըմբան եւ կը խցէ զայն մասնակիօրէն: Հակառակը կը պատահի, երբ կը քնանանք փորի վրայ եւ կամ կողմնակի դիրքորոշումով:
5. Բարձի կազմուածք.
Թոյլ եւ կակուղ բարձի գործածութեամբ լեզուն դարձեալ կ՛ուղղուի դէպի ըմբան եւ կը յառաջացնէ կոկորդի մասնակի խցում:
6. Քունէ առաջ ստամոքսը ծանրաբեռնել մեծածաւալ եւ դժուարամարս կերակուրներով.
Խռկացող անհատը կ՛ունենայ նաեւ այլ ախտանշաններ համաձայն ախտապատճառին: Յաճախակիօրէն տեսնուած ախտանշաններն են.
1. Ցերեկ ատեն քնոտութիւն, որ վտանգաւոր կը դառնայ ինքնաշարժ վարելու ընթացքին.
2. Կեդրոնացումի տկարացում-նուազում.
3. Կոկորդի չորութիւն եւ ցաւ.
4. Անհանգստաւէտ քուն.
5. Արեան ճնշումի բարձրացում.
6. Կրծքավանդակի մկանային եւ ոսկրային ցաւ:

Ինչպէս յիշուեցաւ նախապէս, խռկալը անբնական երեւոյթ է: Անիկա հիւանդագին բնոյթ կը ստանայ, երբ քիթի եւ կոկորդի խցումը աւելի զարգանայ, շնչահեղձութիւնը սաստկանայ, ուղեղին թթուածինով յագեցումը զգալիօրէն  նուազի եւ տեղի ունենայ քունի շնչադադար:
Խռկալու ախտաճանաչումը պէտք է կատարուի մասնագէտ բժիշկին կողմէ: Պէտք է ախտաճանաչուի խռկոցին ախտապատճառը, որպէսզի ըստ այնմ կատարուի անոր դարմանումը:
Խռկոցի դարմանամիջոցնրն են.
Ա. Վիրաբուժական գործողութիւններ եւ միջամտութիւններ.
ա. Քիթի, ըմբանի եւ քթաըմբանի խցումներուն,
բ. Թոյլ եւ տկար մկանային քիմքին,
գ. Ծաւալած լեզուակին եւ լեզուի արմատին:
Բ. Ոչ-վիրաբուժական դարմանամիջոցներ.
ա. Գործածել կարծր բարձ,
բ. Քիթի արտաքին սեղմիչներ (nasal strips),
գ. Քիթի հակախռնիչներ (nasal decongestants),
դ. Բերանի յատուկ կազմածներ (mouth pieces), որոնք կ՛օգնեն ծնօտի տեղաշարժումին եւ լեզուի բնական տեղադրութեան,
ե. Օդի շարունակական ներմղիչ սարք (CPAP continuous positive air pressure), որ կը գործածուի քունի ընթացքին շարունակ բնական շնչառութիւն ունենալու համար եւ շնչադադարի արգելք հանդիսանալու համար,
զ. Ալքոլ եւ ծխախոտ չգործածել,
է. Ստամոքսը չծանրաբեռնել քնանալէ առաջ,
ը. Չգիրնալ եւ ընդհակառակը՝ նիհարնալ,
թ. Քնանալ կողմնակի կամ փորի վրայ գլուխը պահելով կողմնակի դարձած,
ժ. Խոնաւութիւն ունենալ ննջարանին մէջ,
ժա. Քնաբեր դեղեր շատ չգրծածել,
ժբ. Ապրիլ ժուժկալ եւ հետեւիլ մարմնամարզանքի:

ԵՐԵՒԱՆ, «Փանորամա».– Արցախի Հանրապետութեան նախագահ Բակօ Սահակեան 17 Մայիսին կայացուցած է աշխատանքային խորհրդակցութիւն՝ նուիրուած մայրաքաղաք Ստեփանակերտի մէջ նոր մարզահամալիրի կառուցման առնչուող հարցերուն: Մարզահամալիրին նախագիծը ներկայացուցած է քաղաքաշինութեան նախարար Կարէն Շահրամանեանը:
Նախագահ Սահակեան դիտել տուած է, որ շատ կարեւոր է նման կառոյցի մը գոյութիւնը Ստեփանակերտի մէջ՝ աւելցնելով, որ անիկա մեծապէս պիտի նպաստէ հանրապետութեան մէջ մարմնակրթութեան  զարգացման ու տարածման:
Երկիրի ղեկավարը համապատասխան յանձնարարականներ տուած է նախագիծի կատարելագործման ուղղութեամբ՝ ընդգծելով, որ անիկա պէտք է իրականացուի պատշաճ մակարդակով եւ անթերի կերպով:
Խորհրդակցութեան կը մասնակցէին նաեւ Լեռնային Ղարաբաղի մարմնակրթութեան պետական կոմիտէի նախագահ Ռազմիկ Յովսէփեանը, պաշտօնատար այլ անձնաւորութիւններ:

ՄԱԼՄԻՕ.- Հինգշաբթի երեկոյեան շուէտական Մալմիօ քաղաքին մէջ տեղի ունեցաւ «Եւրատեսիլ-2013»ի երկրորդ կիսաւարտականը:
Այս տարի սոյն երգի մրցումին Հայաստանը ներկայացնող «Տորիանզ» ռոք խումբը կատարեց «Լոնլի փլանեթ» երգը եւ մրցումի երկրորդ կիսաւարտականին մասնակցող 17 երկիրներու շարքին գրաւելով 7րդ դիրքը, կարելիութիւնը ստացաւ մասնակցելու 18 Մայիսին տեղի ունենալիք «Եւրատեսիլ»ի աւարտական հանգրուանին:
Հայաստանէն զատ աւարտական հանգրուան հասան Հունգարիան, Ատրպէյճանը, Վրաստանը, Ռումանիան, Նորվեկիան, Իսլանտան, Ֆինլանտան, Մալթան եւ Յունաստանը:

ԵՐԵՒԱՆ, «Նիուզ».- «Իրանից կարելի է աւելի մեծ ծաւալներով գազ ստանալ, սակայն դա քաղաքական խնդիր է»: 17 Մայիսին լրագրողներուն հետ ունեցած հանդիպումին ընթացքին այս յայտարարութիւնը կատարած է Հայաստանի գործատուներու հանրապետական միութեան նախագահ Գագիկ Մակարեանը:
Անոր համաձայն, Իրան ուրախ կ՛ըլլայ, եթէ աւելնայ դէպի Հայաստան մատակարարուող կազին քանակը, քանի որ տնտեսական պատժամիջոցներու պատճառով դժուարութիւններ ունի: Իրանական կազը, այսպիսով, այլընտրանք պիտի դառնայ «Գազպրոմի» մատակարարումներուն:
Հայաստանին մատակարարուող ռուսական կազի գիներու վերանայման անդրադառնալով՝ Գ. Մակարեան յայտնած է, որ ատիկա առնչուած է մասամբ «Հայռուսգազարդ»ի չափէն աւելի ծախսալիութեան, բարձր աշխատավարձերուն, 30-35 տոկոս շահութաբերութեան ու ընդհանրապէս՝ «գեր-էլիտար» բնոյթին:
Անդրադառնալով կառավարութեան կողմէ կազի գծով տրամադրուելիք յատկացումներուն՝ Գ. Մակարեան հարց տուած է. «Իսկ ո՞ւմ հաշուին է իրականացուելու սուբսիդաւորումը»: Նրա հաշուարկով՝ գազի գնի թանկացման դէպքում բիւջէում 40-50 միլիոն տոլար լրացուցիչ հարկեր կը հաւաքուեն, սակայն կառավարութիւնը դրա փոքր մասն է ուղղում սոցիալական խաւերի աջակցութեան»:

ԵՐԵՒԱՆ, «Սիվիլնեթ».– «Մեր հեռուստատեսութիւնը «մուննաթի» հեռուստատեսութիւն է, իսկ հայ ժողովուրդը «մուննաթի» կենսակերպ է վարում»: «Սիվիլնեթ»ի հետ ունեցած զրոյցին ընթացքին նման տեսակէտ յայտնած է թատերգակ, հրապարակախօս, «Գրական Թերթ»ի գլխաւոր խմբագիր Կարինէ Խոդիկեանը՝ դիտել տալով, որ ներկայիս հասարակութեան մէջ տարածուած յարձակողական մօտեցումը պատկերասփիւռի ճամբով կը սերմանուի։
«Հեռուստատեսութիւնը դարձել է գաղափարական քարոզչական մահակ ազգի գլխին, Հանրային հեռուստաընկերութիւնն իր առջեւ խնդիր է դրել ստեղծել մի սերունդ, որը սերիալային մտածողութիւնից փրկում չունենայ», յայտնած է ան։
Պատասխանելով այն հարցումին, որ այսօր արդեօք կը կատարո՞ւի  մշակութային ստորնացում՝ Խոդիկեանը նշած է, որ բնականաբար առաջին արձագանգը պիտի ըլլայ դրական, սակայն աւելի խորքին թափանցելու պարագային կարելի պիտի ըլլայ ըսել, որ միշտ դիւրին է կառավարել ամբոխը, սակայն դժուար է կառավարել մտածող մարդիկը:
«Երբ տեսնում ենք այսօրուայ մեր իշխանութիւնների կողմից տարուող քաղաքականութիւնը, երբ իշխանութիւններն իրենց միանձնեայ իշխանութիւնը հաստատեցին ամբողջ Հայաստանի տարածքում, հասկանում ենք, որ սա հէնց այնպէս չէ, սա կառավարելի գաղափարախօսութիւն է, եւ դրա լաւագոյն ձայնափոխը Հանրային հեռուստաընկերութիւնն է», դիտել տուած է Խոդիկեան՝ նշելով, որ՝ «Հ1ն օր-օրի դեգրադացնում (քայքայիչ-Խմբ.) է հասարակութեանը»:
Խոդիկեանը յայտնած է, որ ինքը դէմ է այն արտայայտութեան, թէ մէկ ծաղիկով գարուն չի գար՝ դիտել տալով, որ ներկայիս իրավիճակէն դուրս գալու լաւագոյն ելքը համակարգային փոփոխութիւնն է:
«Ես շատ ուրախ կը լինեմ, որ Սերժ Սարգսեանը մի գիշեր որոշի, որ երկիրը պէտք է երկիր լինի», յայտնած է թատերգակը՝ նշելով, որ երկիրը տէր պէտք է ունենայ, իսկ Հայաստանը տէր չունի:

ԵՐԵՒԱՆ, «Նիուզ».- 17 Մայիսին Երեւանի բոլոր դպրոցներուն մէջ դասերը վարած են ոստիկանները: Ոստիկանութիւնը կազմակերպած էր «Ոստիկանն այսօր» խորագիրով նախաձեռնութիւն մը, որուն  նպատակն էր աշակետներուն ներկայացնել, թէ ինչ վիճակի մէջ է այսօրուան ոստիկանութիւնը, ինչպէ՛ս կը գործէ եւ այլն։
Դասերը ներկայացուցին սովորական, ինչպէս նաեւ բարձրաստիճան ոստիկանները, որոնք խանդավառութիւն եւ հետաքրքրութիւն ստեղծեցին աշակերտներուն մօտ։

ԵՐԵՒԱՆ, «Փանորամա».– 16 Մայիսին կայացած Հայաստանի կառավարութեան նիստին ընթացքին Հայաստանի ելեւմուտքի նախարար Դաւիթ Սարգսեան յայտարարած է, որ Հայաստանը 2013ին առաջին անգամ ըլլալով միջազգային շուկային մէջ արտարժութային պարտատոմսեր պիտի հրապարակէ։
Անոր համաձայն, միջազգային կազմակերպութիւնները այլեւս Հայաստանը չեն նկատեր ցած եկամուտ ունեցող երկիր. ասիկա  կը նշանակէ, որ միջազգային կառոյցներէն արտօնեալ պայմաններով վարկերու ստացումը աստիճանաբար պիտի նուազի, իսկ աւելի ուշ վերանայ։ Ասոր համար հարկաւոր է, որ Հայաստան ներկայութիւն ըլլայ միջազգային դրամական շուկաներուն մէջ եւ ինքնուրոյն կերպով ներգրաւէ ֆինանսներ։ «Դա նշանակում է, որ պէտք է սկսել եւրապարտատոմսերի թողարկումը», յայտնած է Դ. Սարգսեան:
Ըստ հայեցակարգի՝ եւրապարտատոմսերուն առաջին թողարկման նուազագոյն արդիւնաւէտ ծաւալ պիտի սահմանուի 500 միլիոն տոլարի պարտատոմսերու թողարկումով՝ 10 տարի ժամկէտով: Յաջորդ որոշման համաձայն, կառավարութիւնը եւրապարտատոմսեր թողարկելու նպատակով միջազգային իրաւախորհրդատուի ծառայութեան ձեռքբերման համաձայնագիր պիտի կնքէ «Cleary Gottlieb Steen & Hamilton LLC» ընկերութեան հետ, որը թեքնիք աջակցութիւն պիտի ցուցաբերէ եւ պիտի օժանդակէ լաւագոյնս կազմակերպելու եւրապարտատոմսերու թողարկումը:
Հայաստանի վարչապետ Տիգրան Սարգսեան յայտարարած է, որ քաղաքական որոշում տրուած է այն մասին, որ նոր էջ պիտի բացուի Հայաստանի տնտեսական քաղաքականութեան մէջ:
«Այսօր մենք քաղաքական որոշում ենք կայացնում, Հայաստանն առաջին անգամ արտարժոյթով պարտատոմսեր է թողարկելու։ Սա նոր էջ է բացում մեր տնտեսական քաղաքականութեան մէջ ոչ միայն պետական ֆինանսները կառավարելու բնագաւառում, այլեւ մասնաւոր հատուածի համար հնարաւորութիւն ենք ընձեռում ֆինանսական շուկաներից ներգրաւելու աւելի էժան միջոցներ: Բոլոր միջազգային կառոյցները, ֆինանսական ինստիտուտները, որոնց հետ աշխատում են մեր տնտեսվարող սուբյեկտները, միշտ մատնանշում են այն փաստը, որ եթէ Հայաստանը չունի միջազգային շուկաներում գնանշուած պարտատոմսեր, ապա նրա համար այդ շուկաներից լրացուցիչ ֆինանսական միջոցներ ստանալը լինում է առնուազն 1-1.5 տոկոսով աւելի թանկ: Հասկանալի է, որ սա մեր առաջին տեղաբաշխումն է լինելու, եւ մենք առաջին անգամ յայտնուելու ենք միջազգային ֆինանսական շուկայում եւ ապագայում էլ, իհարկէ, կախուած մեր երկրի վարկանիշից, տոկոսադրոյքները նոյնպէս կարող են նուազել»:
Վարչապետին համաձայն, այս որոշումով Հայաստանի տնտեսական քաղաքականութեան մէջ յետ այսու արմատական փոփոխութիւն տեղի պիտի ունենայ: «Մենք պարտաւոր ենք լինելու հետեւել, թէ ինչպիսին է մեր պարտատոմսերի գնանշումը միջազգային շուկաներում, եւ դա լրջագոյն ազդակներ է հաղորդելու նաեւ մեր տնտեսական վիճակի մասին: Մենք ընտրել ենք լաւագոյն իրաւաբանական խորհրդատուին, քանի որ սա մեր առաջին թողարկումն է եւ մենք պէտք է սովորենք, կարողութիւններ ձեւաւորենք ե՛ւ ֆինանսների նախարարութիւնում, ե՛ւ Կենտրոնական բանկում, ե՛ւ արդարադատութեան նախարարութիւնում՝ նման գործարքներ իրականացնելու համար: Լաւագոյն իրաւաբանական ծառայութեան ընտրութիւնը մեզ հնարաւորութիւն կը տայ նաեւ հարստացնել այդ բնագաւառի մեր գիտելիքները», յայտնած է վարչապետը:
Ըստ Տ. Սարգսեանի՝ եթէ տեղաբաշխումը այս տարուան ընթացքին յաջողութեամբ կատարուի, մտադիր են վճարել Ռուսիայէն ստացած վարկը, որովհետեւ այժմ 2B վարկանիշ ունեցող ընկերութիւնները՝ հաշուի առնելով շուկայի միջավայրը, կրնան աւելի աժան պաշարներ ներգրաւել. «Մենք արդէն մեր ռուս գործընկերների հետ այս երկխօսութիւնըսկսել ենք, ունենք նրանց համաձայնութիւնը եւ նաեւ օժանդակութիւն, որպէսզի վարկի մարումը լինի սահուն, եթէ տոկոսադրոյքները լինեն աւելի մեղմ, քան այն տոկոսադրոյքներն են, որ այսօր գործում են մեր միջպետական պայմանագրով:
«Այս տեղեկատուութիւնը նաեւ մասնաւոր հատուածին պէտք է մանրակրկիտ ներկայացուի, ինչպէս նաեւ այն փաստաթուղթը, որ մենք հիմա հաստատում ենք՝ հայեցակարգը, որտեղ մանրամասն նկարագրուած է, թէ այսուհետ մենք ինչպէս ենք կառավարելու մեր արտաքին պարտքը», դիտել տուած է վարչապետը:

ԼԱՍ ՎԵԿԱՍ.- Հինգշաբթի, Մայիս 9ի յետմիջօրէին, թենիսի աշխարհի աստեղերէն՝ հայազգի Անտրէ Աղասի, այցելեց Լաս Վեկասի նորակերտ Ս. Կարապետ Հայց. առաքելական եկեղեցին՝ դիմաւորուելով հոգեւոր հովիւ Աւետիս Ա. քհնյ. Թորոսեանի, Ծխական խորհուրդի ատենապետ Ատրուշան Արմէնեանի ու եկեղեցւոյ շինարարական յանձնախումբի անդամներ Գօգօ Տարագճեանի եւ Լեւոն Կիւլպէնկեանի կողմէ:
Հուրի Տարագճեանը՝ ՀՕՄի Շաբաթօրեայ վարժարանին կողմէ, ինչպէս նաեւ Գըրգ Գըրգորեանի կողմէ UCLA համալսարանին մէջ հաստատուած «Dream Fund» հիմնարկի ներկայացուցիչ Լինտի Շումախըրն ու տէր եւ տիկին Ալեքս եւ Արտա Եմէնէճեանները ներկայ էին սոյն հանդիպումին:
Եկեղեցւոյ մուտքին մոմեր վառելէ ետք, Աղասի եւ հիւրերը մուտք գործեցին եկեղեցի, ուր կառուցման աշխատանքներուն եւ Լաս Վեկասի հայութեան մասին տեղեկութիւններ փոխանցուեցան անոր:
Հիւրերը նաեւ այցելեցին եկեղեւոյ կից կառուցուած մշակութային կեդրոնը, ուր Հուրի Տարագճեան տեղեկութիւններ փոխանցեց ՀՕՄի Շաբաթօրեայ վարժարանին մասին:
Այցելութեան աւարտին, Աւետիս Ա. քհնյ. Թորոսեան Անտրէ Աղասիին յանձնեց հայկական աւանդական խաչքարի մը կրկնօրինակը, իսկ Աղասի շնորհաւորեց եկեղեցւոյ կառուցումը՝ դրուատելով ծուխին եւ Լաս Վեկասի հայութեան իրագործումները, միաժամանակ նորանոր յաջողութիւններ մաղթելով:

ՍԱՆ ՖՐԱՆՍԻՍՔՕ.- Կիրակի, Մայիս 5ին, Ծովածոցի շրջանի Հայ Դատի յանձնախումբը Սան Ֆրանսիսքոյի «Վասպուրական» սրահին մէջ հիւրընկալեց Արեւմտեան Ամերիկայի Հայ Դատի յանձնախումբի համաատենապետներ Նորա Յովսէփեան եւ Քրիս Կիւլճեան, շրջանի հանրութեան հետ քննելու համար Հայ Դատի գործունէութեան վերջին նորութիւնները եւ ապագայ ծրագիրները:
Համաատենապետները նախ հակիրճ զեկոյց մը ներկայացուցին, որմէ ետք առիթ տրուեցաւ ներկաներուն, որ հարցումներով եւ առաջարկներով իրենց մասնակցութիւնը բերեն քննարկումին, որպէսզի Ամերիկայի Հայ Դատի յանձնախումբը կարենայ աւելի ազդեցիկ գործունէութիւն մշակել՝ հասնելով ամերիկահայութեան կարիքներուն եւ պաշտպանելով Հայ Դատը:
«Ինչպէս վերջին քանի մը ամիսներուն տեղի ունեցած հանրային շարք մը այլ հանդիպումները այս մէկը եւս հոյակապ առիթ մը եղաւ մօտէն լսելու գործիչներու մտահոգութիւնները եւ անոնց թելադրանքները», կը յայտնէ Նորա Յովսէփեան:
«Շնորհակալութիւն կը յայտնենք բոլոր մասնակիցներուն եւ Արեւմտեան Ամերիկայի Հայ Դատի յանձնախումբին, կարծիքներու փոխանակման այս նախաձեռնութեան իրականացման համար», կը յայտնէ Ծովածոցի շրջանի Հայ Դատի յանձնախումբի ատենապետ Արմէն Կարապետեան:
Արեւմտեան Ամերիկայի Հայ Դատի յանձնախումբը ցարդ նման հանրային հաւաքներ կազմակերպած է Ֆրեզնոյի, Պոյզիի (Այտըհօ), Լաս Վեկասի եւ Ֆինիքսի մէջ:

ԵՐԵՒԱՆ, «Նիուզ».- Ճատրակի գերվարպետ Տաթեւ Աբրահամեան Սէյնթ Լուիսի մէջ աւարտած Միացեալ Նահանգներու ճատրակի կանանց ախոյեանութեան մրցաշարքին, առաւելագոյն 9 կէտերէն ապահովեց 6.5 կէտ՝ խլելով մրցաշարքի պրոնզ մետալը:
Ըստ «Armchess.am»ի՝ 8 կէտ ապահովելով ախոյեան դարձած է գերվարպետ Իրինա Քրաշը:
Տղոց մրցաշարքին մէջ, գերվարպետ Վարուժան Յակոբեանը խլեց 5 կէտ, ՖԻՏԷի վարպետ Սամուէլ Սեւեանը՝ 4 կէտ, գերվարպետ Մելիքսէթ Խաչիյեանը՝ 3 կէտ:
1-2րդ դիրքերը 6.5ական կէտով բաժնեցին գերվարպետներ Կաթա Քամսքին եւ Ալեհանտրօ Ռամիրեզը:

ԽԱՉԻԿ ՃԱՆՈՅԵԱՆ

Ըսուած է, որ աշխարհը մեծ թատրոն մըն է։ ՀԲԸՄի Վաչէ եւ Թամար Մանուկեան վարժարանի տնօրէնութիւնը, կարծէք, խորապէս գիտակցելով այս բացայայտ ճշմարտութեան՝ գեղեցիկ մտայղացումը ունեցած է դպրոցի կրթական ճոխ ծրագիրին մէջ աւելցնելու հայ թատրոնի ընտրովի դասընթացքը, ինչպէս նաեւ անգլերէն թատրոնի, երգի ու պարի դասերը։
Արդարեւ, հայ թատրոնի միջոցաւ հայ աշակերտը կը ծանօթանայ հայ գրականութեան գոհարներուն, անոր մէջ կը մշակուին հայերէնախօսութիւնը, յստակախօսութիւնը, հրապարակախօսութիւնը, համարձակախօսութիւնը կամ մտածումները շարժուձեւերով արտայայտելու ունակութիւնը, որոնք խիստ կարեւոր են կեանքի որեւէ ասպարէզի մէջ յաջողելու համար։
Ուրբաթ, Ապրիլ 12ին, հաճոյքը ունեցանք ներկայ ըլլալու եւ վայելելու մեր գաղութի պարծանքը հանդիսացող սոյն վարժարանի Հայ թատրոնի դասարանին կողմէ ներկայացուած հայ գրականութեան անթառամ փառքերէն՝ Երուանդ Օտեանի «Թաղականին Կնիկը» ծանօթ երգիծավէպը։
Թատերախաղը սկսելէ առաջ, թատրոնի դասարանի պատասխանատուն՝ հայերէն լեզուի մեծանուն ուսուցչուհի, Գարեգին Բ. վեհափառէն «Ս. Մեսրոպ եւ Ս. Սահակ» շքանշանի արժանացած Լորա Գույումճեանը ըսաւ. «Հայ թատրոնի ընտրովի դասարանը հինգ տարիէ ի վեր գոյութիւն ունի։ Այս դասարանին նպատակն է հայ աշակերտին ծանօթացնել թատերական աշխարհը, անոր մէջ մշակել արտայայտելու համարձակութիւնը։ Ընտրովի այս դասարանին կրնան միանալ բոլոր աշակերտները, անկախ իրենց հայերէնի մակարդակէն։ Ցարդ այս դասարանի աշակերտութիւնը ներկայացուցած է հինգ թատերախաղեր, որոնք արժանացած են հանդիսատեսներու գնահատանքին։ Ներկայացուած կտորները միշտ ալ պատշաճեցուցած ենք աշակերտներու մակարդակին ու տարիքին։ Օրինակ, այս գործը երեք արարով գրուած է, բայց մենք անիկա կը ներկայացնենք երկու արարով՝ զանց առնելով որոշ մասեր»։ Ան իր խօսքը աւարտեց շնորհակալութիւն յայտնելով դպրոցի տնօրէնութեան, ծնողական մարմինի անդամներուն, ՀԲԸՄի գեղարուեստական բաժինի տնօրէն Գրիգոր Սաթամեանին եւ բոլոր անոնց, որոնք նպաստեցին այս ձեռնարկին։
Վարագոյրը բացուեցաւ. բեմին վրայ եկեղեցւոյ տեսարան մը պատկերուած էր։ Դպրաց դասը գեղեցիկ երգեցողութեամբ Ս. պատարագէն բաժիններ կ՛երգէր։ Հոն կեցած էր Պոլսոյ հանրածանօթ մեծահարուստներէն Մարգար էֆենտիին կինը՝ Սաթեն Սասունեանը։ Պահ մը ետք, անկէ մէկ շարք առաջ աթոռ մը կը դրուի եւ հոն կու գայ ու կը բազմի եկեղեցւոյ թաղական խորհուրդի ատենապետ Պօղոս էֆենտիի կինը՝ տիկ. Շազիկը, որուն գեղեցկութիւնը անմիջապէս ներկաներուն ուշադրութիւնը կը գրաւէ՝ խորապէս սրտնեղելով տիկ. Սաթենը։ Այսպէս կը սկսի զարգանալու ողջ երգիծավէպը։
Սաթենը (Ալիսըն Քէշիշեան) բարկաճայթ, խիստ վիրաւորուած այս արարքէն՝ եկեղեցին ձգելով տուն կը վերադառնայ եւ իր ամուսնոյն՝ Մարգար էֆենտիին, (Արման Երջանեան) կը գանգատի այս վիրաւորական վարմունքին համար եւ կը պահանջէ իր մեծահարուստ ամուսինէն, որ անպայման ժամկոչը գործէն արձակէ։ Իսկ տիկ. Շազիկ (Սարին Հապէշեան), ի՛նք հրահանգած ըլլալով ժամկոչին, որ իրեն համար աթոռ մը դնէ եկեղեցւոյ դասը նստելու համար՝ կը պնդէ, որ ժամկոչը պէտք չէ գործէն հեռացուի։
Այս պարզ, անպաճոյճ դէպքէն, հանճարեղ Երուանդ Օտեան ի յայտ կը բերէ մարդկային այլատեսակ նկարագիրի տէր անձեր, որոնք, կարծէք, մեր օրերու Լոս Անճելըսի կեանքէն առնուած են։ Թատերախաղը կ՛աւարտի ժամկոչին կամաւոր մեկնումով եւ վիճաբանող կողմերու հաշտութեամբ։
Մենք խօսք չունինք նկարագրելու եւ գնահատելու համար այս գործին դերակատարները։ Արման Երջանեան (Մարգար էֆենտի), այս բազմաշնորհ եւ մեծ ապագայ խոստացող երիտասարդը, արժանի է ամէն գնահատանքի եւ գուրգուրանքի։ Այդ օրը, ան շատ բնական եւ գեղեցկօրէն ներկայացուց Մարգարը, որ իր շուարած կնոջ բարկութեան չհանդուրժելով հանդերձ, անոր ուզածը միշտ կատարել կը փորձէր:
Թաղականի ատենապետին՝ Պօղոս էֆենտիի, դերը յաջողութեամբ ներկայացուց Պարգեւ Մսրլեանը, իսկ անոր կնոջ՝ տիկին Շազիկի, դերը հոյակապ կերպով ներկայացուց Սարին Հապէշեանը: Անոր արտաքին գեղեցկութիւնը, տոկուն եւ դերին յարմար ձայնը, գեղեցկօրէն մարմնացուցին թաղականի հպարտ, ինչպէս նաեւ կեանքի տաք ու պաղ օրերէն անցած կնոջ տիպարը։
Միւս բոլոր դերասանները հոյակապ դերեր կատարեցին։
Դերասաններէն ոմանք, նորեկ ըլլալով հանդերձ, շատ յաջող էին իրենց դերերուն մէջ, իսկ քանի մը տարուան փորձառութիւն ունեցողները արդէն իսկ պատրաստ են աւելի մեծ խումբերու մաս կազմելու։
Թատերգութիւնը, իր ամբողջութեան մէջ, մարդոց փառասիրութիւնը ի յայտ բերելու, ամէն ինչ դրամով ըլլալու իրականութիւնը հաստատելու, կեղծաւորներուն, պատեհապաշտներուն, պարապ-սարապ մարդոց բամբասանքներուն պատկերն էր, զոր տուին մեր պատանի դերասանները։
æերմօրէն կը շնորհաւորենք բոլոր աշակերտները այս թատերախաղին համար, ինչպէս նաեւ՝ պատասխանատուները, տնօրէնութիւնը եւ մասնաւորաբար Լորա Գույումճեանը։
Վերջաւորութեան, դպրոցի ժրաջան, երիտասարդ տնօրէնուհի Թալին Քարկոտորեան եւ Լորա Գույումճեան, դասարանին հնգամեակի կարկանդակի հատումը կատարեցին։
Ծնողական մարմինին կողմէ պատրաստուած էր ջերմ հիւրասիրութիւն մը։
Նորանոր յաջողութիւններ ՀԲԸՄի Վաչէ եւ Թամար Մանուկեան վարժարանի հայ թատրոնի բոլոր պատասխանատուներուն:

ՊԸՐՊԵՆՔ.- Հայց. եկեղեցւոյ Հիւսիսային Ամերիկայի Արեւմտեան թեմի 86րդ Պատգամաւորական ժողովը՝ նախագահութեամբ առաջնորդ Յովնան արք. Տէրտէրեանի, Մայիս 3ին գումարուեցաւ առաջնորդարանին մէջ: Ամբողջ օրը տեւած տարեկան այս համագումարը բացառիկ առիթ մը կը ստեղծէ, որ պատգամաւորները ծանօթանան թեմի գործունէութիւններուն եւ վերարժեւորեն կատարուած աշխատանքները: Ժողովը առիթ կ՛ընծայէ ծուխերու պատգամաւորներուն՝ կիսելու իրենց մտածումներն ու թելադրութիւնները:
Առաջնորդը կատարեց բացման աղօթքը: Շուրջ 130 հոգեւորական եւ թեմական պատգամաւորներ մասնակցեցան ժողովին: Ատենապետ Ճեֆ սրկ. Հազարեանի բարի գալստեան խօսքէն ետք, Յովէլ քհնյ. Օհանեան ընթերցեց Գարեգին Բ. կաթողիկոսի պատգամը, որուն անգլերէն թարգմանութիւնը ընթերցեց Մեսրոպ քհնյ. Աշ:
Առաջնորդարանի կազմակերպութիւններէն բերանացի տեղեկագիրներ ներկայացուեցան պատգամաւորներուն: Յատուկ տեղեկագիր ներկայացուեցաւ Սարգիս Ա. քհնյ. Փեթոյեանի եւ դատաւոր Էտրիըն Գրիգորեանի կողմէ, առաջնորդարանի ամառնային ճամբարի 50ամեակին առթիւ հոն կառուցուելիք մատրան մասին, որուն յատակագիծը պատրաստած է Պապ Սիմոնեան: Ապա, առաջնորդը փոխանցեց իր պատգամը:
Երկրոդ նիստը բացուեցաւ կէսօրուան ճաշէն ետք: Օրուան հոգեւոր պատգամը փոխանցեց Վազգէն քհնյ. Մովսէսեանը, որ կը գլխաւորէ «Տաթեւ» բարեսիրական յանձնախումբը եւ պատասխանատուն է Հայոց Ցեղասպանութեան 100ամեակի ոգեկոչման ծրագիրներուն: Անոր ներկայացման խորագիրն էր՝ «100 տարուան ճամբորդութիւն՝ Արարատէն Ամերիկա»: Ապա ան խօսեցաւ հարիւրամեակի ոգեկոչման ծրագիրին մասին, որուն նպատակն է ներկայացնել հայութեան յարութիւնը Ցեղասպանութենէն:
Այնուհետեւ տեղի ունեցան ընտրութիւններ: Թեմական խորհուրդի աշխարհական նոր անդամներ ընտրուեցան Սթիւ սրկ. Էտըմզ, Սիւզի Գրիգորեան, իրաւաբան Ճեֆ Հազարեան, Սարգիս Տէր Սարգիսեան, Վահէ Իսկէնտէրեան եւ Անդրանիկ Զօրայեան: Խորհուրդին մէջ իրենց պաշտօնավարութեան շրջանը կը շարունակեն Եուրի Յակոբեան, իրաւաբան Ճան Տահլպըրկ, Պարգեւ Համալեան եւ դատաւոր Էտրիըն Գրիգորեան:
Հոգեւորական նոր անդամներ ընտրուեցան Մանուկ Ա. քհնյ. Մարգարեան, Մուշեղ Ա. քհնյ. Թաշճեան եւ Մեսրոպ քհնյ. Աշ: Իրենց պաշտօնները պիտի շարունակեն Սարգիս Ա. քհնյ. Փեթոյեան ու Խաժակ քհնյ. Շահպազեան:
Փակման խօսքը կատարեց առաջնորդը: 87րդ պատգամաւորական ժողովը պիտի հիւրընկալէ Լաս Վեկասի Հայց. եկեղեցին:
Պատգամաւորական ժողովի աւարտին, «Գալայճեան» սրահին մէջ, նախագահութեամբ Սրբոց Ղեւոնդեանց Մայր տաճարի բարերարներ տէր եւ տիկին Կրեկ եւ Սեդա æրգոյեաններու, տեղի ունեցաւ պաշտօնական ճաշկերոյթ: Առաջին անգամ ըլլալով, ճաշկերոյթը նուիրուած էր թեմի երէցկիներուն, որոնք պատուի արժանացան սրբազանի Օրհնութեան եւ գնահատութեան վկայագիրներով:
Սրբազանը, պատուելով æրգոյեանները՝ իր երախտագիտութիւնը յայտնեց անոնց:
Ապա, առ ի գնահատութիւն իրենց մատուցած նուիրեալ ծառայութեանց, սրբազանը «Արքեպիսկոպոսի մրցանակ»ով պարգեւատրեց Վարդեվառ սրկ. Սիմոնեանը, Արփի Պարսամը, Այտա Սէթեանը եւ Արշակուհի Դաւիթեանը, եւ յատուկ նուէրներ յանձնեց առաջնորդարանի վարիչ տնօրէն Յարութ սրկ. Մարգարեանի, իրաւաբան Ճեֆ սրկ. Հազարեանի եւ առաջնորդարանի տիկնանց օժանդակ մարմինի ատենապետ Սինտի Նորեանի:

ՊԸՐՊԵՆՔ.- Տասնեակ տարիներէ ի վեր Թրբանճեան ընտանիքը կը կատարէ բարեգործութիւններ: Տէր եւ տիկին Ճերըլտ եւ Փաթրիշիա Թրբանճեանները իրենց քրիստոնէական հաւատքի եւ բարերարութեան շնորհիւ յատուկ տեղ կը գրաւեն Հայց. եկեղեցւոյ հոգեւոր առաքելութեան մէջ: Ս. Էջմիածինի եւ Արեւմտեան թեմի բարերարները մասնաւոր պատիւի արժանացան Կիրակի, Մայիս 5ին, Սրբոց Ղեւոնդեանց Մայր տաճարին մէջ, առաջնորդ Յովնան արք. Տէրտէրեանի կողմէ մատուցուած Ս. պատարագին ընթացքին:
Օրուան արարողութեան մասնակցեցան Վաչէ արք. Յովսէփեան, ծուխի հոգեւոր հովիւ Խաժակ քհնյ. Շահպազեան, Սիփան Ա. քհնյ. Մխսեան եւ սարկաւագներ: Այս առթիւ, Գարեգին Բ. Ամենայն հայոց կաթողիկոսի յղած Օրհնութեան եւ գնահատանաց գիրը ընթերցեց առաջնորդը:
Պատարագի աւարտին, «Թրբանճեան» հրապարակին վրայ, Իրանահայ միութեան երգչախումբի հայրենասիրական ոգեւորիչ երգեցողութեամբ, սրբազանը առաջնորդուեցաւ դէպի առաջնորդարանի մասնաշէնքի դուռը, ուր տեղի ունեցաւ ժապաւէնի հատումը եւ քօղազերծումը «Թրբանճեան Մասնաշէնք» արձանագրութեան: Սրբազանը օրհնեց բարերարները եւ օծումը կատարեց մուտքի խաչքարին, որուն վրայ արձանագրուած է բացման թուականը: Ան իր երախտագիտութիւնը յայտնեց Թրբանճեան ընտանիքին՝ անոր մատուցած ծառայութիւններուն, բարերարութիւններուն եւ բարեսիրական ծրագիրներուն համար:

ՍԱՆ ՖՐԱՆՍԻՍՔՕ.- Գռուզեան-Զաքարեան-Վասպուրական Ազգ. վարժարանի 8րդ դասարանի աշակերտները, վարժարանի տնօրէն Կրէյս Անտոնեանի եւ դաստիարակ Մաննիկ Կոստեանի առաջնորդութեամբ, Երկուշաբթի, Ապրիլ 15ին իրենց մասնակցութիւնը բերին Քալիֆորնիոյ մայրաքաղաք Սաքրամենթոյի մէջ տեղի ունեցած Հայկական Ցեղասպանութեան ոգեկոչման ձեռնարկներուն:
Արեւմտեան Ամերիկայի Հայ Դատի յանձնախումբի նախաձեռնութեամբ, նահանգային խորհրդարանին ու Ծերակոյտին մէջ տեղի ունեցած սոյն ձեռնարկներուն կը մասնակցէին աւելի քան 200 հայորդիներ, ներառեալ՝ «Ֆերահեան», «Մեսրոպեան» եւ «Ալէք Փիլիպոս» վարժարաններէն աշակերտներ:
«Գռուզեան-Զաքարեան-Վասպուրական»ի աշակերտները առիթը ունեցան նաեւ հանդիպումներ ունենալու Ծերակոյտի անդամ Լիլընտ Եիի եւ Նահանգային խորհրդարանի անդամներ Խաչօ Աչաճեանի ու Ատրին Նազարեանի, ինչպէս նաեւ առաջնորդ Մուշեղ արք. Մարտիրոսեանի հետ:
Ծերակոյտին մէջ կայացած ոգեկոչման ձեռնարկին ընթացքին, Ծերակոյտի անդամ Լիլընտ Եի բեմէն ներկաներուն յիշեցուց, թէ իրենց մէջ կը գտնուին  հայոց պատմութեամբ մտահոգ խումբ մը աշակերտներ՝ դրուատելով անոնց ցուցաբերած հետաքրքրութիւնն ու նուիրուածութիւնը: «Իրենց նման մարդոց շնորհիւ, կրնանք վստահ ըլլալ, որ աշխարհը պիտի չմոռնայ», եզրակացուց ծերակուտականը:
Աշակերտները ներկայ եղան նաեւ նահանգային խորհուրդի ոգեկոչման յատուկ նիստին:

ՍԱՆ ՖՐԱՆՍԻՍՔՕ.- Կիրակի, Ապրիլ 21ին, Գռուզեան-Զաքարեան-Վասպուրական Ազգ. վարժարանի 5-8րդ դասարանի աշակերտները մասնակցեցան ՀԵԴ «Ռոստոմ» ուխտին կազմակերպած Հայկական Ցեղասպանութեան ոգեկոչական քայլարշաւին ու Տէյվիտսըն լերան խաչին առջեւ տեղի ունեցած համայնքային ոգեկոչման ձեռնարկին:
Սան Ֆրանսիսքոյի «Միտթաուն» զբօսայգիէն սկսած ու դէպի Տէյվիտսըն լերան խաչը՝ 1.5 մղոն քայլարշաւին ընթացքին, աշակերտները իրենց կողքին ունէին ուսուցիչներ, շրջանաւարտներ ու համայնքէն այլ ներկայացուցիչներ, որոնց ընդհանուր թիւը 150էն աւելի էր:
Ոգեկոչման ձեռնարկին ու հոգեհանգստեան արարողութեան իր մասնակցութիւնը բերաւ աւելի քան 250 հոգի: Աշակերտները ծաղկեպսակ մը զետեղեցին յուշարձանին առջեւ եւ արտասանեցին Պարոյր Սեւակի «Անլռելի Զանգակատուն» բանաստեղծութիւնը:
Չորեքշաբթի, Ապրիլ 24ին, վարժարանի 8րդ դասարանի աշակերտ Ռուբինա Կարապետեան, համագաղութային ոգեկոչման ձեռնարկին ընթացքին արտասանեց Մուշեղ Իշխանի «Հայ Լեզուն» բանաստեղծութիւնը:
Նաեւ, Ապրիլ ամսուան ընթացքին, աշակերտներ դիտեցին Հայկական Ցեղասպանութեան նուիրուած շարք մը վաւերագրական շարժապատկերներ եւ անոնց շուրջ խորհրդակցութիւններ ունեցան իրենց ուսուցիչներուն հետ:
«Հայկական Ցեղասպանութիւնը շատ կարեւոր դեր ունի հայերու կեանքին մէջ եւ յատկապէս աշակերտներուն, որոնք հասակ կը նետեն իրենց հայրենիքէն հեռու: Ցեղասպանութենէն 98 տարի ետք, մեր աշակերտները մեր ժողովուրդին դիմադրականութեան ուժին ապրող փաստերն են», կը յայտնէ վարժարանի տնօրէն Կրէյս Անտոնեան:

ՍԱՆ ՖՐԱՆՍԻՍՔՕ.- Գռուզեան-Զաքարեան-Վասպուրական Ազգ. վարժարանի 7րդ եւ 8րդ դասարանի աշակերտները Երկուշաբթի, Ապրիլ 22ին այցելեցին Սան Ֆրանսիսքոյի «Food Bank»ը՝ ուտեստեղէն տրամադրող այդ կեդրոնին կամաւոր սպասարկութիւն տրամադրելով:
Հայկական Ցեղասպանութեան ոգեկոչման օրերուն աշակերտները համայնքին կամաւոր սպասարկութեանց մղելու նպատակով, վարժարանի հայերէն լեզուի ուսուցչուհիներէն Կարինէ Փանոսեան կազմակերպած էր սոյն այցելութիւնը: Աշակերտներուն ընկերացան նաեւ անոնց ծնողները՝ օգնելով կեդրոնի անձնակազմին:
«Հայկական Ցեղասպանութեան ընթացքին մեր նախահայրերը իրենց բոլոր ստացուածքը կորսնցուցին: Այդ օրերուն, Միացեալ Նահանգներու իշխանութիւնները իրենց օգնութեան ձեռքը երկարեցին եւ առիթ ընծայեցին մեծ թիւով հայերու, որ նոր կեանք մը սկսին Ամերիկայի մէջ: Այս նախաձեռնութիւնը փոքր փորձ մըն է նպաստելու մեր երկրորդ հայրենիքին եւ անոր կարօտեալներուն», կը յայտնէ աշակերտներէն մէկը:

ՍԱՆ ՖՐԱՆՍԻՍՔՕ.- Երեքշաբթի, Ապրիլ 23ին, Գռուզեան-Զաքարեան-Վասպուրական Ազգ. վարժարանի աշակերտները՝ նախակրթարանէն մինչեւ 8րդ դասարան, այցելեցին Հայկական Ցեղասպանութեան յուշարձանի վերածուած Տէյվիտսըն լերան խաչը:
Տարեկան աւանդութեան մը վերածուծ այս այցելութեան ընթացքին, Սեւակ սրկ. Ժատոյեան, որ վարժարանի կրօնքի դասատուն է, աշակերտներուն հետ աղօթեց յուշարձանին առջեւ, ապա աշակերտները ներկայացուցին Ցեղասպանութեան զոհերուն նուիրուած յատուկ յայտագիր մը:
Դպրոց վերադարձին, աշակերտները ներկայ եղան շրջանի Ս. Գրիգոր Լուսաւորիչ եկեղեցւոյ հոգեւոր հովիւ Խորէն Ա. քհնյ. Հապէշեանի կողմէ տեղի ունեցած հերիսայի օրհնութեան, եւ մասնակցեցան Ցեղասպանութեան զոհերու յիշատակին մատուցուած հոգեճաշին:
Աշակերտներուն հրամցուած հերիսան պատրաստուած էր վարժարանի տնօրէն Կրէյս Անտոնեանի կողմէ:

ՍԱՆ ՖՐԱՆՍԻՍՔՕ.- Գռուզեան-Զաքարեան-Վասպուրական Ազգ. վարժարանի աշակերտները Մարտ եւ Ապրիլ ամիսներուն աստիճանաբար լեցուցած են վարժարանին մէջ զետեղուած՝ Արեւմտեան Ամերիկայի ՀՕՄի Շրջանային վարչութեան Ջաւախքի հիմնադրամին գանձանակները՝ գործնականօրէն ի-րենց մասնակցութիւնը բերելով Ջաւախքի վարժարաններու աշակերտներուն օժանդակութեան գործին:
Նաեւ, առաջնորդութեամբ վարժարանի 7րդ դասարանին, աշակերտները հագուստեղէնի հաւաք մը կատարեցին Օշականի մէջ իրենց քոյր վարժարանի՝ «Փայլակ Բաբգէնեան»ի աշակերտներուն համար: Աշխատանք կը տարուի, որ հագուստները այս ամառ հասցուին Օշական, որպէսզի հոն պատրաստ ըլլան բաժնուելու գալիք Սեպտեմբեր 1ին սկսող 2013-2014 դպրոցական տարեշրջանի աշակերտներուն համար:

ՍԱՐԳԻՍ ՓԱՆՈՍԵԱՆ

ՖՐԵԶՆՕ.- Կազմակերպութեամբ Ամերիկայի Հայ Դատի յանձնախումբին, Ֆրեզնոյի աւանդութիւն դարձած հայկական դրօշակի արարողութիւնը տեղի ունեցաւ Ապրիլ 24ին, առաւօտեան ժամը 9ին, ներկայութեամբ եւ մասնակցութեամբ Ֆրեզնոյի բոլոր միութիւններուն, հոգեւորականներու դասին, «Սողոմոն Թեհլիրեան» կոմիտէին, համալսարանական հայ ուսանողներուն, ՀՄԸՄ «Սասուն» մասնաճիւղի սկաուտներուն, Չարլի Քէյեան համագաղութային վարժարանի աշակերտներուն եւ շրջանիս ու արուարձաններու պետական անձնաւորութիւններուն:
Օրուան հանդիսավար Տեպի Փուչիկեան հանդիսութիւնը բացուած յայտարարեց (հայերէնով), ապա «Սասուն» մասնաճիւղի քոյրերն ու եղբայրները, Եռագոյն դրօշը ձեռքերնուն՝ հպարտ քայլուածքով մօտեցան դրօշակի սիւնին եւ Եռագոյնը միացնելով՝ զայն կամաց-կամաց բարձրացուցին ամերիկեան դրօշին համահաւասար: Անոնք երկինքի կապոյտին վրայ ամբողջ օրը ծածանեցան՝ անցորդներուն ուշադրութիւնը գրաւելով:
Ֆեթըն Քասապեան ամերիկեան քայլերգը մեկնաբանեց, իսկ Հայկօ Օհաննէսեան՝ «Մեր Հայրենիքը»:
Քաղաքապետարանի բակին մէջ հաւաքուած հայորդիները, յուզումով եւ աչքերը սեւեռած դրօշին՝ հպարտանքով իրենց հրճուանքը արտայայտեցին ծափերով:
Դրօշակի այս հանդիսութեան, իրենց սրտի խօսքն ու զգացումները արտայայտեցին, պետական անձնաւորութիւններն ու հայութեան ներկայացուցիչները՝ անգլերէն եւ հայերէն ելոյթներով:
Հայերէնով իրենց խօսքը փոխանցեցին՝ Ս. Գրիգոր Լուսաւորիչ եկեղեցւոյ հոգեւոր հովիւ Եղիա քհնյ. Հայրապետեան եւ Եդուարդ Մկրտիչեան, իսկ անգլերէնով՝ Վասիլիա գիւղաքաղաքի քաղաքապետ Էյմի Շուքլեան եւ Կլենտէլ քաղաքի քարտուղար Ատրաշէս «Արտի» Քասախեան:
Բոլոր պատգամախօսները անդրադարձան Մեծ Եղեռնի ողբերգութեան եւ այն իրողութեան, թէ հայ ժողովուրդը 98 տարիներ շարունակ, քաղաքակիրթ աշխարհէն արդարութիւն կը պահանջէ ու կը շարունակէ պահանջել:
Հանդիսութեան ընթացքին, երգերով իրենց մասնակցութիւնը բերին Չարլի Քէյեան Համագաղութային դպրոցի աշակերտները:
Իրապէս յուզիչ էր երեւոյթը, երբ խուռներամ հայորդիներ կը հեռանային քաղաքապետարանի բակէն՝ արցունքով լի աչքերը սեւեռած ծածանող Եռագոյն դրօշին, որովհետեւ տարիներ շարունակ պայքարած էին այդ դրօշին ի խնդիր: Այսօր անիկա իրականութիւն է թէ՛ Հայրենիքի եւ թէ Սփիւռքի տարածքին եւ ամէնուրեք կը ծածանի հպարտօրէն:
Երբ ես ալ կը դիմէի դէպի կանգառ, գաւազանին կռթնած ծերունի մը ձեռքով նշան ըրաւ, որ իրեն մօտենամ: Ուղղութիւնս փոխելով՝ իր կողմը շտապեցի եւ քովը կանգ առնելով յարեցի.
- Ի՞նչ կ՛ուզէք, հայրիկ:
- Եկո՛ւր տղաս, եկո՛ւր, չես կրնար երեւակայել, թէ որքա՜ ն երջանիկ կը զգամ: Կրնամ ամբողջ օրը այս դրօշին տակ նստիլ: Արդեօք պիտի տեսնե՞մ այն օրը, երբ մեր թշնամին ալ զգաստանայ եւ ընդունի իր կատարած ոճրագործութիւնը ու ներողութիւն խնդրէ:
- Պիտի գայ այդ օրն ալ, հայրիկ, պիտի գայ: 100ամեակի սեմին ենք, ամբողջ հայ ժողովուրդը զօրաշարժի ենթարկուած է, արդէն մեր վեհափառ կաթողիկոսները պաշտօնական յայտարարութեամբ մեր եկեղեցիներն ու կալուածները կը պահանջեն թուրք պետութենէն,- ըսելով հեռացայ:
Ամբողջ ճանապարհին, այդ ծերունիին խօսքերը կ՛ալեկոծէին սիրտս ու հոգիս: Որքա՜ ն ծերունի հայրերու եւ մայրերու սրտերուն ու հիգիներուն մէջ թաքուն կը մնան պապենական տունն ու երդիքը: Քանի հայ ժողովուրդը ունի դեռ նման հայրեր ու մայրեր, վստահ եղիր, սիրելի հայրիկ, որ մենք՝ «Պիտի հասնինք սրբազան լերան կատարին»:
Աւանդութիւն դարձած է Վարդանանց հերոսներուն եւ Ապրիլ 24ի նահատակներու ոգեկոչման նշումները միասնաբար կատարել շրջանիս եկեղեցիներէն մէկուն մէջ: Այս տարի, Ապրիլ 24ի յիշատակումը տեղի ունեցաւ Պանդխտաց Ժողովական Հայ եկեղեցւոյ մէջ, ներկայութեամբ եկեղեցիներու հոգեւորականներուն, դպրաց դասերուն եւ մեծ թիւով հայորդիներու:
Պանդխտաց Ժողովական Հայ եկեղեցւոյ վերապատուելի Արա Կէօքէզեան բացման խօսքին մէջ շնորհակալութիւն յայտնեց ներկաներուն, որոնք եկած էին միասնաբար ոգեկոչելու մէկ ու կէս միլիոն նահատակներուն յիշատակը: Շարունակելով իր խօսքը՝ ան ըսաւ. «Այսօր մեր մէջ կը գտնուի նաեւ Ամերիկայի մօտ Հայաստանի նախկին դեսպան Ճան Էվընզը: Ան իր պաշտօնէն հեռացուեցաւ, որովհետեւ ընդունեց Ցեղասպանութիւնը: Ան սիրայօժար ընդառաջեց մեր հրաւէրին եւ իր յարգանքի տուրքը մատոյց՝ ծաղկեպսակ մը զետեղելով «Արարատ-Մասիս» գերեզմանատան մէջ հանգչող անծանօթ հայու աճիւնի հողակոյտին վրայ, եւ այսօր ան եկած է իր զգացումները փոխանցելու բոլորիս»:
Տեղի ունեցաւ հոգեհանգստեան արարողութիւն: Հոգեւորականներու կողքին, իր մասնակցութիւնը բերաւ միացեալ դպրաց դասը: Անգլերէնով աղօթքը կատարեց պատուելի Փօլ Ըրուին. վերապատուելի Մայք Մկրտիչեան հայերէնով իր մտածումները փոխանցեց, իսկ հիւր բանախօսը հանգամանօրէն անդրադարձաւ Մեծ Եղեռնի երեւոյթին եւ ներկայիս տարուող աշխատանքներուն՝ բոլորին լսելի դարձնելու համար 1915ին կատարուած պատմական երեւոյթը: Յուշատօնին անմիջապէս յաջորդեց հիւրասիրութիւն:

ՍԱՐԳԻՍ ՓԱՆՈՍԵԱՆ

ՖՐԵԶՆՕ.- Կազմակերպութեամբ շրջանիս «Սողոմոն Թեհլիրեան» կոմիտէին, Կիրակի, Ապրիլ 28ին, «Արարատ-Մասիս» գերեզմանատան մէջ, Սողոմոն Թեհլիրեանի յուշարձանին դիմաց տեղի ունեցաւ հոգեհանգստեան արարողութիւն եւ ոգեկոչման հանդիսութիւն, մասնակցութեամբ ՀՕՄի «Սոֆիա» մասնաճիւղի Շաբաթօրեային, ՀՄԸՄ «Սասուն» մասնաճիւղի սկաուտներուն, Եղիա քհնյ. Յակոբեանին, Ս. Երրորդութիւն եկեղեցւոյ դպրաց դասին եւ մեծ թիւով ներկաներու:
«Սողոմոն Թեհլիրեան» կոմիտէի անդամ Սեւակ Ճիյէրեան, ոգեկոչման հանդիսութիւնը բացուած յայտարարելէ ետք՝ շնորհակալութեան խօսք ուղղեց ներկաներուն, ապա սկաուտները դրօշակներով եւ հպարտ քայլերով եկան եւ յուշարձանին շուրջ շրջանակ կազմած՝ դրօշակի արարողութիւն կատարեցին: Բոլորը միասին երգեցին «Մեր Հայրենիք»ը, որուն յաջորդեց հոգեհանգստեան արարողութիւն՝ առաջնորդութեամբ Եղիա քհնյ. Հայրապետեանի եւ դպրաց դասին:
Յուշարձանին դիմաց կատարուեցաւ պատշաճ յայտագիր, որուն իրենց երգերով եւ արտասանութիւններով մասնակցութիւն բերին Շաբաթօրեայ դպրոցն ու սկաուտները:
Հանդիսավար Սեւակ Ճիյէրեան օրուան պատգամաբեր փրոֆ. Սերճիօ լա Փորթան հրաւիրեց, որ իր սրտի խօսքն ու տպաւորութիւնները ներկաներուն փոխանցէ: Յարգելի հիւրը հանգամանօրէն արտայայտուելով Մեծ Եղեռնի եւ հայ ժողովուրդի միասնական պայքարին մասին՝ ըսաւ, թէ ներկաները, 98 տարիներու պայքարէն ետք, այսօր հաւաքուած են վրիժառու հայորդիի յուշարձանին դիմաց՝ իրենց ուխտը վերանորոգելու:
Ոգեկոչման հանդիսութիւնը վերջ գտաւ «Վէրքերով լի» երգով:
Սիրելի հայորդի, 2013ին հայ ժողովուրդը կը կանգնի Մեծ Եղեռնի 100ամեակի սեմին եւ ուժգնօրէն կը թակէ քաղաքակիրթ եւ արդարամիտ նկատուող պետութիւններուն դարպասները. մօ՛տ է, սիրելիս, հայ ժողովուրդին «Վարդահեղեղ Արշալոյսը»:

ՍԱՐԳԻՍ ՓԱՆՈՍԵԱՆ

ՖՐԵԶՆՕ.- Ուրախալի երեւոյթ է երիտասարդներուն ներկայութիւնն ու մասնակցութիւնը շրջանիս մէջ կազմակերպուած բոլոր ձեռնարկներուն: Այս տարի, Ապրիլ 24ի առիթով, շրջանիս մէջ բազմաթիւ ոգեկոչումներ տեղի ունեցան, զանազան վայրերու մէջ, խուռներամ երիտասարդ-երիտասարդուհիներու եւ մեծ թիւով հայորդիներու ներկայութեամբ:
Ֆրեզնոյի համալսարանի հայ ուսանողները, իրենց մասնակցութիւնը բերելէ ետք քաղաքապետարանին դիմաց Եռագոյն դրօշի հանդիսաւոր արարողութեան, յետմիջօրէի ժամը 1ին համալսարանին մէջ իրականացուցին Ապրիլ 24ի նուիրուած ոգեկոչման հանդիսութիւն, ներկայութեամբ համալսարանի Հայագիտական ամպիոնի ուսուցչապետ փրոֆ. Պարլօ Տէր Մկրտիչեանի, ՀՄԸՄ «Սասուն» մասնաճիւղի սկաուտներուն, Չարլի Քէյեան Համագաղութային վարժարանի աշակերտներուն, Ֆրեզնոյի «Արաքս» պարախումբին, համալսարանի Հայ ուսանողական միութեան անդամներուն եւ մեծ թիւով հայորդիներու:
Փրոֆ. Պարլօ Տէր Մկրտիչեան յուշատօնի բացումը կատարելով՝ շնորհակալութիւն յայտնեց բոլոր ներկաներուն, ապա անդրադարձաւ 1915ի Ապրիլ 24ին սկսած հայ ժողովուրդի տարագրութեան:
Հայ ուսանողներու միութեան ատենապետ Յակոբ Օհաննէսեան բեմ ներկայանալով՝ պատշաճօրէն վարեց յայտագիրը, որուն իրենց մասնակցութիւնը բերին համալսարանի ուսանողներէն Բենիամին Դանիէլեան, Քնարիկ Գազանճեան եւ Լիլիթ Գրիգորեան՝ ներկայացնելով Ապրիլ 24ի մասին օտար հեղինակներու վկայութիւններ: Իրենց երգերով յայտագիրը ճոխացուցին Գէորգ Աճէմեանը, Ռուզաննա Օրքուզեանը, Տաթեւիկ Յովհաննէսեանը եւ Էմմա Շալճեանը, կիթառի ընկերակցութեամբ՝ Արամայիս Օրքուզեանի: Ներկաները իրենց գնահատանքը ծափերով արտայայտեցին, իսկ «Արաքս» պարախումբը, հեզաճկուն շարժումներով ներկայացուց «Արտաշատի պար»ը՝ արժանանալով ներկաներուն բուռն ծափահարութիւններուն:
Չարլի Քէյեան Համագաղութային վարժարանի աշակերտները իրենց մասնակցութիւնը բերին «Հայ Ենք Մենք» եւ «Պիտի Գնանք» երգերով:
Այս սրտապնդիչ ձեռնարկէն ետք, փափաքեցանք մեր ընթերցողներուն ծանօթացնել Հայ ուսանողական միութեան գործունէութիւնը՝ հարցազրոյց մը կատարելով միութեան ատենապետ Յակոբ Օհաննէսեանի հետ: Ան սիրով պատասխանեց մեր հարցումներուն:

ՍԱՐԳԻՍ ՓԱՆՈՍԵԱՆ.- Ե՞րբ կազմուած է Հայ ուսանողական միութիւնը. որո՞ւ հովանիին տակ կը գործէ եւ ի՞նչ է անոր նպատակը:
ՅԱԿՈԲ ՕՀԱՆՆԷՍԵԱՆ.- Միութիւնը կազմուած է 1974ին ու կը գործէ Հայագիտական ամպիոնի վարիչ եւ տնօրէն փրոֆ. Պարլօ Տէր Մկրտիչեանի անմիջական հովանիին տակ: Միութեան նպատակն է հայկական մշակոյթը ծանօթացնել եւ զայն տարածել նորահաս սերունդին մէջ:

ՍԱՐԳԻՍ ՓԱՆՈՍԵԱՆ.- Ձեր նպատակը իրագործելու համար ի՞նչ ձեռնարկներ կը կատարէք:
ՅԱԿՈԲ ՕՀԱՆՆԷՍԵԱՆ.- Կը կատարենք ներքին եւ արտաքին ձեռնարկներ: Ներքին ձեռնարկները ընդհանրապէս աշակերտներուն համար են եւ գիտական բնոյթ կը կրեն, իսկ արտաքինին կը հրաւիրենք նաեւ ժողովուրդը: Փրոֆ. Պարլօն արտասահմանէն եւ Ամերիկայի զանազան նահանգներէն արուեստագէտներ եւ գիտնականներ կը հրաւիրէ, որպէսզի աշակերտներուն ծանօթութիւնը ըլլայ այլազան եւ ընդհանրական: Ան երկու տարին անգամ մը դէպի Հայաստան պտոյտներ կը կազմակերպէ, որպէսզի մենք ծանօթանանք մեր երկիրին եւ անոր տեսարժան վայրերուն:

ՍԱՐԳԻՍ ՓԱՆՈՍԵԱՆ.- Ուսանողական միութիւնը կը մասնակցի՞ Շաբաթ օրուան ռատիօժամի ձայնասփռումներուն, ինչպէս նաեւ «Հայ Շարժում» թերթին:
ՅԱԿՈԲ ՕՀԱՆՆԷՍԵԱՆ.- Շաբաթ օրուան ձայնասփռումները կը կատարեն միութեան երկու անդամուհիները՝ Վարդուշ Մեսրոպեան եւ Մարինէ Վարդանեան: Ինչ կը վերաբերի «Հայ Շարժում» թերթին, ապա ուսանողները, եթէ փափաքին, կրնան գրել անոր մէջ:

ՍԱՐԳԻՍ ՓԱՆՈՍԵԱՆ.- Շրջանիս տօնակատարութիւններուն կը մասնակցի՞ք:
ՅԱԿՈԲ ՕՀԱՆՆԷՍԵԱՆ.- Այո՛: Այս տարի Ապրիլ 24ի բոլոր ձեռնարկներուն մեր մասնակցութիւնը բերինք, ինչպէս նաեւ՝ այլ ձեռնարկներու:

Շատ շնորհակալ ենք, Յակոբ Յովհաննէսեան, ձեր տուած տեղեկութիւններուն համար: Մեր սիրելի ուսանողներուն կը ցանկանք յաջողութիւն՝ հայ ժողովուրդին լաւապէս ծառայելու, իսկ ձեզի՝ փրոֆ. Պարլօ, ուժ եւ առողջութիւն՝ լաւապէս առաջնորդելու համար ձեզի յանձնուած հայոց ազգի պարման-պարմանուհիները:

ԹԵԼ ԱՒԻՒ, «Ռոյթըրզ».- Իսրայէլի պատկերասփիւռի 10րդ կայանը Ուրբաթ, Մայիս 17ին հաղորդեց, թէ Իսրայէլ «Սի.Այ.Էյ.»ի տնօրէնին ճամբով Սուրիոյ փոխանցած է սպառնական պատգամ մը, թէ մինչեւ այն ատեն, որ դէպի Լիբանան զէնքի մաքսանենգումը կը շարունակուի, Իսրայէլի կողմէ Սուրիոյ ռմբակոծումը պիտի շարունակուի:
«Սի.Այ.էյ.»ի տնօրէն Ճան Պրենըն Ուրբաթ օր անակնկալ այցելութեամբ մը Իսրայէլ ժամանած էր՝ քննելու համար Սուրիոյ տագնապը:
Միւս կողմէ, Ռուսիոյ արտաքին գործոց նախարար Սերկէյ Լաւրով Ուրբաթ օր յայտարարեց, թէ Ռուսիա Սուրիոյ կը տրամադրէ հակաօդային պաշտպանութեան զէնքեր, որոնք ոչ մէկ ձեւով պիտի խախտեն տարածաշրջանի մէջ ուժերու հաւասարակշռութիւնը՝ հակադարձելով Սուրիոյ զէնք մատակարարելու մասին արեւմտեան քննադատութեանց:
Նաեւ, «Նիւ Եորք Թայմզ» օրաթերթը Մայիս 17ին տեղեկացուցած է, թէ Քաթարի իշխանութիւնները անցնող երկու տարիներուն ընթացքին սուրիական ընդդիմութեան տրամադրած են մօտաւորապէս 3 միլիառ տոլարի օժանդակութիւն:
Հինգշաբթի օր, ուշադրութիւն սեւեռուած էր Սպիտակ տան վրայ, ուր կայացաւ նախագահ Պարաք Օպամայի եւ Թուրքիոյ վարչապետ Ռեչեփ Թայիփ Էրտողանի հանդիպումը, որ յատկանշական արդիւնք մը չտուաւ, յատկապէս Սուրիոյ հարցով՝ Թուրքիոյ ակնկալիքներուն կապակցութեամբ:
Էրտողանի ու Օպամայի հանդիպումը կայացաւ նախ պատուիրակութիւններու ընդլայնուած կազմով, ուր ընդհանրապէս երկկողմանի յարաբերութիւնները քննուեցան։ Այնուհետեւ զրոյցը շարունակուեցաւ գլուխ գլխի։ Սեղանին վրայ դրուած էին Սուրիոյ ճգնաժամին, հիւսիսային Իրաքի վարչակազմին հետ քարիւղի համաձայնագիրին ու Միջին Արեւելքի հաշտութեան գործընթացին նման կարեւոր հարցեր։ Քննուեցաւ նաեւ Էրտողանի Կազա այցելութեան հարցը, որուն շուրջ անհաճոյ կացութիւն մը ստեղծուած էր արտաքին գործող նախարար Ճան Քերիի յայտարարութեան պատճառով։ Արդարեւ, Քերի Պոլսոյ մէջ յայտարարած էր, թէ այս ժամանակաշրջանին, երբ Իսրայէլ կը փորձէ Թուրքիոյ հետ յարաբերութիւնները բարելաւել «Կապոյտ Մարմարա» նաւուն միջադէպէն ետք, ճիշդ պիտի չըլլար, որ վարչապետ Էրտողան այդ միջադէպի տարելիցին օրը Կազա այցելէր ու քաղաքական նոր թնճուկ մը ստեղծէր Իսրայէլի հետ։
Օպամա եւ Էրտողան համատեղ մամլոյ ասուլիսին ընթացքին յայտարարութիւններ կատարեցին Սուրիոյ մասին: Օպամա յայտարարեց, թէ այդ հարցին «կախարդական» լուծում մը չկայ ու շեշտը դրաւ Ռուսիոյ հետ գոյացած քաղաքական համաձայնութեան վրայ: Ան կրկնեց, թէ Սուրիոյ նախագահ Պաշշար Ասատ որքա՛ն կանուխ հեռանայ քաղաքական հրապարակէն, այնքա՛ն լաւ պիտի ըլլայ Սուրիոյ ժողովուրդին համար։ Հարցն այն է, թէ ինչպէ՞ս պիտի կատարուի այդ հեռացումը։ «Մենք պիտի ջանանք յաւելեալ միջազգային ճնշում բանեցնել ու ընդդիմութիւնը զօրացնել։ Յառաջիկայ օրերուն հանդիպում մը պիտի կայանայ Սուրիոյ հարցով ու կը յուսամ, որ այդ հանդիպումը ի վերջոյ արդիւնք մը տայ։ Բայց մինչ այդ, պիտի շարունակենք օգնել ընդդիմութեան ու Սուրիոյ ժողովուրդին», յայտարարեց Օպամա։
Օպամա նաեւ նշեց, թէ Ուաշինկթըն կը զօրակցի Թուրքիայէն քիւրտ զինեալներու հեռացման առաջնորդած նախաձեռնութեան:
Իր կարգին, Էրտողան ըսաւ, որ Թուրքիա Սուրիոյ ընդդիմութեան կողքին է, սակայն չի փափաքիր, որ Սուրիա ահաբեկչական կազմակերպութիւններու համար գործունէութեան ազատ դաշտ մը դառնայ: Ան նշեց, որ սուրիացիներուն տրամադրուած Թուրքիոյ մարդասիրական օգնութիւնը հասած է 1.5 միլիառ տոլարի:
Թուրքիոյ Վարչապետը նաեւ շեշտեց, որ Կազա այցելութիւնը պիտի կայանայ Յունիս ամսուն։
Էրտողան աւելի ուշ հանդիպումներ ունեցաւ նաեւ փոխնախագահ Ճօ Պայտընի ու արտաքին գործոց նախարար Ճան Քերիի հետ: Անոր այցելութիւնը գրեթէ անտեսուեցաւ ամերիկեան լրատուամիջոցներուն կողմէ, որոնք մամալոյ ասուլիսին մասին տեղեկատուութեանց ընթացքին շեշտը դրին Օպամայի վարչակարգին դիմագրաւած գայթակղութեանց, նոյնիսկ՝ մամլոյ ասուլիսին ընթացքին տեղացած անձրեւին վրայ, անտեսելով Սուրիոյ հարցով ամերիկեան առաւել կտրուկ քաղաքականութեան մը որդեգրման միտող Էրտողանի փորձերը:
Նշենք, որ ՄԱԿի Ընդհանուր ժողովը Մայիս 16ին որդեգրեց բանաձեւ մը, ըստ որուն՝ Սուրիոյ ընդդիմադիր ուժերը կ՛ընդունուին իբրեւ սուրիացի ժողովուրդի «օրինական ներկայացուցիչներ»: ՄԱԿի անդամ 193 երկիրներէն միայն 12ը բանաձեւին դէմ քուէարկեցին:

ՊԷՅՐՈՒԹ.- Նախաձեռնութեամբ եւ կազմակերպութեամբ Համազգայինի Լիբանանի Շրջանային վարչութեան, Ուրբաթ, 10 Մայիսի երեկոյեան տեղի ունեցաւ յիշատակի երեկոյ նուիրուած վաստակաւոր կրթական մշակ, ազգային հասարակական գործիչ Գէորգ Գանտահարեանին:
«Ազդակ»ի «Փիւնիկ» սրահին մէջ տեղի ունեցած յիշատակի այս երեկոյին բացումը կատարուեցաւ Համազգայինի Լիբանանի Շրջանային վարչութեան անդամ Սիլվա Քիւրքճեանի կողմէ Դանիէլ Վարուժանի «Դաստիարակ» ոտանաւորէն հատուածի մը ասմունքով: Ապա Համազգայինի Լիբանանի Շրջանային վարչութեան անունով բանաստեղծ Սարգիս Կիրակոսեան ողջունեց ներկաները՝ նշելով, որ Համազգայինի եւ գաղութային գործունէութեան վրայ իրենց անջնջելի մատնահետքերը դրոշմած, շունչ ու ոգի սպառած եւ պատմութիւն կերտած Գրիգոր Շահինեանէն ու տոքթ. Բաբգէն Փափազեանէն ետք, եկած ենք մեծարելու նոյնքան նուիրեալ, երախտաշատ ու անձնամոռ այլ համազգայնական մը՝ Գէորգ Գանտահարեանը:
Ապա ան վեր առաւ Գ. Գանտահարեանի նկարագրային յատկանիշները՝ ընդգծելով, որ Գանտահարեան ուսուցիչ էր նոյնիսկ կուսակցական ժողովներու մէջ եւ գաղափարապաշտ զինուորէ մը աւելի խստապահանջ ու կարգապահ, անզիջող ու տեսլապաշտ՝ Հայաստանեայց առաքելական եկեղեցւոյ կամարներուն ներքեւ: «Ուր որ ալ գտնուէր, ան նահատակներու կտակին աւանդապահ ժառանգորդն ու անկեղծ զինուորը, համեստ, նուիրեալ, անձնուրաց եւ ամբողջական հայու քաղցրօրէն ամբողջական դպիրն ու պատարագիչն էր», ըսաւ Կիրակոսեան եւ աւելցուց. «Իր մեծ ուսուցիչներէն՝ Շահան Պէրպէրեանէն ու Եդուարդ Տասնապետեանէն ժառանգած հայ գրականութեան եւ հոգեւոր ու դասական երաժշտութեան սէրն ու պաշտամունքը՝ տարածեց ամէնուրեք: Հիմնեց ու խմբավարեց այլանուն երգչախումբեր, «Զուարթնոց» ու «Կոմիտաս», «Կանաչեան» ու «Շնորհալի» եւ համակեց բոլորը իբրեւ եզակի դաստիարակ»: Ապա Կիրակոսեան մէջբերեց Գանտահարեանի խօսքերէն, թէ՝ «առանց քրտինքի, առանց տքնութեան կարելի չէ նուաճում կատարել: Աշխատանքը ոչ միայն մեր ինքնութեան արտաբերումն է գործի ընթացքին, այլեւ ազնուական մակարդակի կը հասցնէ մարդ արարածը: Ծուլութիւնը մայրն է ամենայն թշուառութեանց: Մեռելները միայն չեն աշխատիր: Աշխատանքը կեանքի գրաւական է, իսկ ծուլութիւնը՝ մահուան»:
Ապա ներկայացուեցաւ «Երկիր Մեդիա» պատկերասփիւռի կայանին պատրաստած մէկ վաւերագրական ժապաւէնը Գէորգ Գանտահարեանի կեանքին ու գործունէութեան մասին: Եղեռնէն ճողոպրած Գանտահարեան ընտանիքը 1925ին նախ Դամասկոս, ապա Լիբանան կը հաստատուի: Պատանի Գէորգ Գանտահարեան նախ կը յաճախէ Հայ աւետարանական Կերթմենեան վարժարան, ապա Հայ աւետարանական քոլեճ, որմէ ետք ուսումը կը շարունակէ Հալէպի «Կրթասիրաց»ին մէջ ու կը վերադառնայ դպրեվանք: 35 տարուան իր կրթական գործունէութեան ընթացքին դասաւանդած է Ն. Փալանճեան, ապա Մ. եւ Հ. Արսլանեան ճեմարանին, Հայկազեան համալսարանին եւ Համազգայինի հայագիտական բարձրագոյն հիմնարկին մէջ: Ան մէկէ աւելի առիթներով պարգեւատրուած է հայրենիքի թէ Սփիւռքի, յատկապէս Լիբանանի մէջ եւ արժանացած Մեծի Տանն Կիլիկիոյ Գարեգին Բ. եւ Արամ Ա. զոյգ կաթողիկոսներու գնահատանքին:
Ապա խօսք առաւ Գ. Գանտահարեանի տարիներու պաշտօնակից, ապա Համազգայինի Մ. եւ Հ. Արսլանեան ճեմարանի տնօրէն Տիգրան Ճինպաշեան, որ հանգամանօրէն ներկայացուց Գէորգ Գանտահարեան ազգային-կուսակցական գործիչը:
Թուելով այլազան մարզերու մէջ Գ. Գանտահարեանի տարած գործունէութիւնը՝ Ճինպաշեան կեդրոնացաւ Լիբանանի մէջ անոր իրագործած քայլերուն, յատկապէս Անթիլիասի «Աղբալեան» խումբի, դաշնակցական բջիջի հիմնումին վրայ, որ հետզհետէ ծաւալելով դարձաւ կեդրոն եւ ծնունդ տուաւ զոյգ կոմիտէութիւններու: Ճինպաշեան ապա անդրադարձաւ լիբանանեան պատերազմի օրերուն Գանտահարեան «ղեկավար»ի համբերատար, հաշտարար ու ամբասիր նկարագիրով գործիչին: «Ան եղաւ իրա՛ւ մարդ ու ճշմարիտ դաշնակցական», ընդգծեց Ճինպաշեան:
Այս առիթով խօսք առաւ նաեւ յատուկ Յունաստանէն ժամանած Միհրան Քիւրտօղլեան, որ ներկայացուց Գանտահարեան մարդը եւ ուսուցիչը:
Ան իր խօսքը սկսաւ մէջբերելով Գէորգ Գանտահարեանի խօսքերը, զորս արտասանած էր 1968ին Կանաչեանին հրաժեշտի ձեռնարկին առիթով: Շեշտելով Գանտահարեանի նկարագրային, մարդկային յատկանիշները՝ Քիւրտօղլեան ընդգծեց երեք կէտեր.
Ա.- Գ. Գանտահարեան 1950ական թուականներու կէսերուն հայ կեանքը պղտորած եկեղեցական խառնաշփոթ օրերուն կու գայ դպրեվանք իբրեւ տեսուչ եւ անոր յաջորդական սերունդներուն ցոյց կու տայ ճանապարհը: Ուսանողներուն հետ էր՝ միշտ պատնէշի վրայ:
Բ.- 50-60 տարիներ առաջ, երբ թրքաոճ ու թրքական երգեր կը լսուէին հայաբնակ թաղերէն, ան կը լծուի հայկական երգչախումբերու կազմութեան՝ հայ երգն ու անոր փառքը կը կամարէ անցեալը ներկային:
Գ.- Թէեւ ան ֆիզիքապէս ներկայ էր ու կը գործէր Լիբանանի եւ Սուրիոյ մէջ, բայց անոր շունչը տարածուած էր համայն աշխարհի բոլոր թեմերուն մէջ:
Ապա Քիւրտօղլեան շեշտեց Գանտահարեանի նկարագրային յատկանիշները՝ կեդրոնանալով անոր պարզութեան ու համեստութեան վրայ: Ան թուեց Գանտահարեան «մարդ»ու դաստիարակիչ ու հաշտարար յատկանիշները՝ մէջբերելով դպրեվանքին մէջ պատահած ու ապա իր՝ Քիւրտօղլեանի պատանեկութեան օրերուն եղած դէպքերէն օրինակներ, որոնք խոր տպաւորութիւն ձգած են իր թէ դպրեվանեցիներու նկարագիրին վրայ:
Նաեւ Մեծի Տանն Կիլիկիոյ կաթողիկոսութեան անունով խօսք առաւ Նարեկ արք. Ալեէմեզեան, որ երկարօրէն անդրադարձաւ Գէորգ Գանտահարեանի գործունէութեան, յատկապէս դպրեվանքի մէջ անոր ապրած ու վարակած դաստիարակիչ պահերուն՝ մէջբերելով անոր տեսչութեան օրերուն պատահած դէպքերէն օրինակներ:
Այս առիթով Ալեէմեզեան սրբազան Գ. Գանտահարեանի կնոջ՝ Մարօ Գանտահարեանին, նուիրեց դպրեվանքի խաչը կրող զինանշան մը:
Գործադրուեցաւ նաեւ գեղարուեստական յայտագիր մը, որուն ընթացքին ելոյթ ունեցան դպրեվանքի «Շնորհալի» երգչախումբը՝ ղեկավարութեամբ Թորգոմ վրդ. Տօնոյեանի եւ Համազգայինի «Գուսան» երգչախումբը՝ ղեկավարութեամբ Գրիգոր Ալլոզեանի:

Միացեալ Նահանգների դաշնային նախահաշուի պակասորդը աւելի քիչ է, քան նախատեսւում էր 2013 թուականի ֆինանսական տարուայ համար: Այսպիսի յուսադրիչ սահմանում է կատարուել երկրի Կոնգրեսի նախահաշուային յատուկ յանձնաժողովի կողմից: Պարզւում է, թէ նախատեսուած 845 միլիարդ դոլարի նախահաշուային բացի փոխարէն ընթացիկ ֆինանսական տարին կ՛ունենայ 642 միլիարդ դոլարի բաց: Մօտաւորապէս 200 միլիարդ դոլարի խնայողութիւնը շատերի աչքին չնչին գումար կը թուայ՝ երկրի մասշտաբով, սակայն սա զգալի առաջխաղացում է համարւում, նկատի ունենալով համաշխարհային տնտեսական ճգնաժամի ընթացիկ տնտեսական «աւերիչ» հետեւանքները: Այսպիսի արդիւնքը հետեւանք է մի քանի պատճառների:
Նախ՝ հարկերի մուտքը այս տարի շատ աւելի էր, քան սպասւում էր: Անհատ եւ կորպորատիւ (ընկերութիւնների-Խմբ.) հարկերը գերազանցել են երեք ամիս առաջ կանխատեսուած ցուցանիշը աւելի քան 105 միլիարդ դոլարով: Իրավիճակը աւելի բարւոք է համարւում «Մեդիքեր», «Մեդիքէյդ» եւ «Սոցիալական ապահովագրութիւն» ծրագրերի սահմաններում, քանի որ աւելի քիչ թուով անձիք են նախատեսւում ներգրաւուել այս ծրագրերում:
«Ֆենի Մէյ» եւ «Ֆրեդի Մեք» կալուածքի առեւտրով զբաղուող պետական ընկերութիւնների հաշուապահութեան բարեփոխումների արդիւնքում երկրի գանձարանը համալրուել է լրացուցիչ գումարներով, որ սպասուածից աւելի էր:
Այս եւ մի քանի այլ պատճառներով 2014ից 2023 թուականների նախահաշուային ընդհանուր բացը կը կազմի մօտաւորապէս 6,3 տրիլիոն դոլար, որը մօտաւորապէս 618 միլիարդ դոլարով աւելի պակաս է, քան նախատեսւում էր ընդամէնը մի քանի ամիս առաջ: Ինչպէս ասացի, պատկերը յուսադրող է, սակայն ամէն ինչ կարող է գլխիվայր շուռ գալ, եթէ երկրի ու միջազգային տնտեսութեան վիճակը վատթարանայ, մի բան՝ որ ոչ ոք ստոյգ կանխատեսել չի կարող: Յանձնաժողովի տուեալների համաձայն, առաջիկայ երկու տարիների ընթացքում նախահաշուի կանխատեսուած բացը կը նուազի, իսկ 2015 թուականից սկսեալ այն նոր թափ կը հաւաքի, դժուարացնելով իրավիճակը: Այս հանգամանքը հիմնականում կապում են այսպէս կոչուած «բէյբի բումըրներ»ի զանգուածային հանգստի կոչուելու հանգամանքով, որի հետ կ՛աւելանան առողջապահական ծախսերն ու պետութեան կողմից ստանձնած պարտաւորութիւնները: Սակայն հնարաւոր է, որ աւելի վառ պատկեր տեսնենք, եթէ ամերիկեան տնտեսութիւնը սպաս-ուածից աւելի լայն թափով զարգանայ: Բանն այն է, թէ համաշխարհային տնտեսութիւնը նկատելի ու աննկատ թելերով կապուած է, ու մի երկրի տնտեսութեան թէկուզ եւ ժամանակաւոր խափանումը կարող է իր հետ ջուրը նետել մի քանի այլ երկրների նկրտումները իրավիճակը բարելաւելու առումով: Օրինակ, այս շաբաթավերջին տեղեկացանք, որ Եւրոպայի երկրորդ ամենախոշոր տնտեսութիւնը, ֆրանսիականը, պաշտօնապէս նոր ճգնաժամի մէջ է յայտնուել, քանի որ այն հետընթաց է գրանցել: Սա բօթաբեր լուր է առաջին հերթին եւրոպական երկրների համար, եւ կարող է ազդել նաեւ Միացեալ Նահանգների եւ Չինաստանի տնտեսական աճի վրայ, քանի որ վերջին երկու երկրները իրենց ապրանքներն իրացնում են հիմնականում Եւրոպայում:
Գնողունակութեան նուազումը Եւրոպայում անպայմանօրէն իր բացասական հետեւանքները կ՛ունենայ աշխարհի առաջին եւ երկրորդ տնտեսութիւնների զարգացման վրայ, ուղղակիօրէն ազդելով մեր կենսամակարդակի վրայ: Եւրոպական ամենահզօր տնտեսութիւնը՝ գերմանականը, նոյնպէս ետընթաց է գրանցել: Իտալիան եւ Իսպանիան օրհասական վիճակում են այս առումով: Միակ խոշոր տնտեսութիւնը, որ դրական արդիւնք է գրանցել Եւրոպայում՝ Մեծ Բրիտանիայի տնտեսութիւնն է: Անգլիացիների «հեռատեսութիւնը»՝ հեռու մնալ եւրագօտու ընդհանուր տնտեսութիւնից իր արդիւնքներն է տալիս ներկայումս: Ինչպէս բազմիցս նշել եմ, տնտեսական պատկերը ուղիղ համեմատականօրէն կապուած է քաղաքական զարգացումների հետ: Եւրոպայի համեմատաբար դժգոյն պատկերի կողքին «փայլում է» թրքական տնտեսութեան զարգացման հեռանկարը: Ամերիկեան հեղինակաւոր «Մուդիս» վարկանիշային ընկերութիւնը մէկ աստիճանով բարձրացրել է Թուրքիայի տնտեսական վարկանիշը, որ կարող է գրաւել ներդնողներին: Այս շաբաթուայ ամերիկայի եւ թուրք նախագահների հանդիպման ընթացքում նախագահ Օբաման յայտարարել է, թէ բարձրագոյն մակարդակով մի յանձնաժողով է ստեղծուելու, Միացեալ Նահանգների եւ Թուրքիայի առեւտուրը աշխուժացնելու պատրուակով: Վերջին 4 տարիների ընթացքում Միացեալ Նահանգները կրկնապատկել է ապրանքների արտահանումը Թուրքիա: 10 տարի առաջ Թուրքիայի հետ կատարուած առեւտուրը կազմում էր 8 միլիարդ դոլար, այսօր այն կազմում է մօտաւորապէս 20 միլիարդ դոլար, եւ նախագահները պայմանաւորուել են աւելի հուժկու թափով զարգացնել առեւտրի ծաւալը: Մօտաւորապէս 90 մարդուց բաղկացած շքախմբով Թուրքիայի նախագահը պատրաստւում է այցելել Կալիֆորնիայի Սիլիկոն Հովիտը, որն աշխարհում յայտնի է որպէս նոր տեխնոլոգիաների ստեղծման օրրան: Հաճոյախօսութիւններից հեռու չի մնացել նաեւ æոն Քերին, ով կարեւորել է այն հանգամանքը, թէ հազարաւոր թուրք ուսանողներ են այսօր սովորում Միացեալ Նահանգներում, եւ նրանց թիւը գնալով աճում է: Նա նոյնիսկ կատակեց, թէ իր հարազատ Բոստոնը շատերն անուանում են Բոստոնբուլ (համահնչիւն՝ Ստամբուլի հետ), քանի որ հէնց այստեղ են տեղակայուած ամերիկեան բազմաթիւ նշանաւոր համալսարաններ, եւ այնտեղ սովորող բազմաթիւ թուրք ուսանողներ են ապրում: Քերին աւարտեց իր խօսքը թրքերէնով՝ «Dag daga kavusmaz, insan insana kavusur», որ նշանակում է՝ սարը սարին չի միանում, մարդը մարդուն միանում է, որ հաւանաբար մօտ է հայկական տարբերակին՝ սարը սարին չի հանդիպում, մարդը մարդուն հանդիպում է: Տեսնո՞ւմ էք, թէ որ ուղղութեամբ է շարժւում իրադարձութիւնների յորձանուտը Ցեղասպանութեան Հարիւրամեակին ընդառաջ: Ինչպիսի՞ մարտավարութիւն կամ ծրագրեր են իրականացնելու հայրենի եւ սփիւռքեան քաղաքական եւ տնտեսական շրջանակները՝ մեր Դատին տէր կանգնելու համար:

ԳՐԻԳՈՐ Ծ. ՎՐԴ. ՉԻՖԹՃԵԱՆ

Նաֆթի հանքերէ արտահանուած հում նիւթը տեղափոխելու համար կ՛օգտագործուին մեծ տակառներ, որոնք նաւերու վրայ դրուելով, կամ տարբեր փոխադրամիջոցներով տեղէ-տեղ կը տարուին:
Թիթեղագործ ընկերութիւններ յատուկ ապսպրանքներով, տարբեր չափի ու տեսակի տակառներ կը պատրաստեն, մէջը դրուելիք նիւթին համապատասխան տոկունութեամբ: Այսպէս, նաֆթի հում նիւթին համար աւելի հաստ թիթեղով տակառներ, իսկ զտուած ու հեղուկ վիճակի մէջ եղող քարիւղի տեսակներուն համար՝ աւելի բարակ:
Մինչեւ այսօր, Արեւելեան շուկայ ունեցող քաղաքներու մէջ կան թիթեղագործներ, որոնց խանութին առջեւէն անցած պահուն, յատուկ «երաժշտութիւն» կը լսէ մարդ, երբ տարբեր չափի մուրճերով տարբեր ուժգնութեամբ հարուածներ կու տան վարպետներ կիսաթանկարժէք դեղին մետաղին: Պղնձեայ ամաններու, ափսէներու եւ այլ զարդեղէններու վրայ քանդակուած գեղեցիկ զարդանախշերը ինչպէս նաեւ յիշատակագրութիւնները՝ տարբեր առիթներու մասին յուշող, մասնաւոր վարպետութեամբ կը դրոշմուին անոնց վրայ, երբեմն տուեալ լեզուն չիմացող արհեստաւորին ձեռքով:
Պղնձագործներուն այս «հաճելի երաժշտութեան» հակառակ, տակառագործներուն հանած ձայները շատ աւելի տհաճ «երաժշտութիւն» կ՛արտաբերեն, երբ մանաւանդ «նուագարան»ները աւելի կոշտ են ու մեծկակ: Անցեալին մեծ մուրճերով տրուած հարուածները ճիշդ է որ այսօր հսկայ մեքենաներու արագ ու լախտի հարուածներով փոխարինուած են, սակայն դարձեալ խլացնող աղմուկը չի թողուր նոյնիսկ մէկ բառ փոխանակել այդ գործարանին մէջ:
Անախորժ այս աղմուկին փոխաբերական իմաստով գործարանը, մեր աշխարհը դարձած է այսօր: Մուրճը ձեռք առնողը վարպետ հռչակուելով, սկսած է հարուած տալու ձեռքը անցած տակառին: Չնայած իր հասակին, չափին, գոյնին կամ տեսակին, ամէն մարդ հարուածային գործիքներու նուագող դարձած է, սակայն ո՛չ թէ իսկապէս թմբուկներու տալով այդ հարուածները, այլ ուղղակի տակառին: Այդ «տակառ»ն ալ մարդը ի՛նք է:
Աշխարհի մէջ ձայն հանելու համար, սակայն, պարտաւոր չէ՛ մարդ իր անձը տակառի վերածելու: Այլ միջոցներ ալ կան ձայն հանելու, օրինակ՝ երգեցողութիւնը, որ փոխաբերական իմաստով դրական աշխատանքի ձայնն է: Ատիկա նոյնիսկ ոճրագործները յաջողած է դարձի բերել, կամ հալածանքներ կասեցնել եւ զղջումի հրաւիրել դաւաճաններ:
Դեռ ընդ երկա՜ր պիտի կրկնուի անարժէք մարդոց տրուած այն կոչումը, որ ո՛չ միայն գիտութեան պակասի հետեւանքով «կը շնորհուի» անոնց, այլ նաեւ այն պատճառով, որ իսկապէս արժանի են այդ կոչումին.
_ Պարապ տակառ:
Անարգական արտայայտութեան հետ մէկտեղ, սոյն կոչումը շատ յաճախ ճշմարտութեան բարացուցիչ կը դառնայ:
Երրորդ աշխարհեան երկիրներու մէջ, ուր բնական կազը ենթակառուցային ցրւումի արդիական միջոցներով չի հասնիր բնակավայրերէ ներս, յատուկ երկաթեայ տակառներու մէջ դրուած ու ամուր փակուած կը վաճառուի: Երբեմն բեռնատառներու վրայ կանոնաւոր շարուած այս երկաթեայ շիշերը ամբողջ փողոցին մէջ իւրայատուկ աղմուկի պատճառ կը դառնան: Վաճառողներ երբեմն թաղերու մէջ պոռալով իրենց ապրանքը ծախելու փոխարէն, երկաթի փոքր կտորով այդ տակառներուն վրայ թեթեւ հարուածներով «կը նուագեն», իրենց ներկայութիւնը հաստատելու համար: Պատշգամներէն ու շէնքերու պատուհաններէն իրենց գլուխները դուրս կախելով, գնորդներ ապսպրանքներ կը կատարեն: Ասիկա շատ սովորական մէկ պատկեր է երրորդ աշխարհեան երկիրներու թաղերուն մէջ:
Փողոցներուն մէջ հնչող այս «երաժշտութիւն»ը, սակայն, ունի իր ձայնային տարբեր հնչեղութիւնները, որովհետեւ երբ տակառը պարապ է, շատ աւելի բարձր ձայն կու տայ: Իսկ երբ դեռ նոր է ու լեցուն՝ տարբեր ձայն…:
Ի՞նչ տարբերութիւն պարապ տակառներու եւ պարապ ուղեղով մարդոց միջեւ, եւ ի՞նչ տարբերութիւն լեցուն տակառներու եւ «լեցուն» մարդոց միջեւ: Պատկերը ամբողջութեամբ նոյնն է:
Զարգացած ու դեռ աւելի յառաջդիմող աշխարհին մէջ այսօր, մարդ խաբելը ամէնէն դժուար գործերէն մէկը կը համարուի: Կրթուած սերունդը բնաւ չի՛ հանդուրժեր տգիտութեան: Ուրիշ խօսքով, «տակառ»ին ձայնը անպայման լսելի պիտի դառնայ աշխարհի ականջին: Եթէ այսօր չլսուի այդ անախորժ ձայնը, վաղը անպայման պիտի լսուի, որուն դիմաց իրենց ականջները պիտի փակեն իմաստուն մարդիկ:
«Պարապ տակառներ»ուն մէկ ուրիշ ցաւալի իրավիճակն ալ այն է, որ զիրենք ծախողներուն ոտքերուն առջեւէն գլտորուելով երթալու անպատիւ վազքին կ՛արժանանան, մրցանակը շահած կարծելով սակայն…:
Վերոյիշեալ պատկերը դարձեալ հասարակ երեւոյթ է երրորդ աշխարհեան երկիրներու մէջ, ուր բնական կազի մատակարարումի համար օգտագործուող երկաթեայ շիշեր ծախող մարդիկ, փոխանակ ծանրութիւնը իրենց ուսերուն շալկելու, սովորութիւն դարձուցած են իրենց առջեւէն ոտքի թեթեւ հարուածներով գլտորել այդ տակառները:
«Պարապ տակառ»ները ճիշդ այդ շիշերուն նման ուրախութեամբ «կը վազեն» վաճառորդներուն առջեւէն, ուրախանալով որ «բարձր ձայն» կը հանեն, ու մանաւանդ հրճուելով զիրենք դիտող անցորդներուն ուշադրութիւնը գրաւելուն համար: Սակայն «պարապ տակառներ» ըլլալնուն, չեն կրնար մտածել այն անպատիւ երթին մասին, զոր կը կատարեն իրենք թաղերու մէջէն թէ հրապարակներու կողքէն: Մայթերու վրայէն կամ պատերուն տակէն բնաւ չեն քալեր անոնք, ճիշդ նման այդ տակառներուն, զորս կարելի չէ՛ մայթերուն վրայէն գլտորել կամ պատերուն տակէն քշել տանիլ, որովհետեւ կրնան վար իյնալ եւ կամ պատերուն քսուելով թափել անոնց ներկը: Ուրեմն զիրենք յառաջ քշողը զգուշութեամբ աջ ու ձախ կողմերէն տալով ոտքի հարուածները, կը փորձէ միշտ պահել անոնց յառաջընթաց ուղղութիւնը, փողոցին ճիշդ կեդրոնէն: Ասիկա ալ անոնց սին ինքնահաւանութեան փոխաբերական պատկերն է: Երբեմն նուազագոյն կայծը տալու հնարաւորութիւն չունեցող դատարկ շիշը, վաճառողին ոտքերուն դիմաց գլտորուելով ի՜նչ մեծ աղմուկ կը հանէ:
Իսկ այս շիշերը պայթելու պարագային… ի՜նչ մեծ աւերներ կրնան գործել…: Մինչեւ իսկ մշակութային ու պատմական արժէք ներկայացնող շէնք կրնան փուլ բերել իրենց «խտացած ճնշում»ով, որ դարձեալ փոխաբերական իմաստով մարդոց զգացած ներքին նախանձն է: Այս դժբախտ զգացումին արդիւնքը միայն ինք-նասպանութիւն չէ՛ սակայն, այլ՝ նաեւ իր շրջապատին քանդումը, նման երկաթեայ այն շիշերուն, որոնց պայթումով միայն իրենց երկաթը չի՛ փճանար, այլ ամբողջ շրջապատը աւերածութեան կը վերածուի:
Ձայնաւոր այս տակառները ինչ չափի կամ ձեւի ալ ըլլան, կամ ինչ հեղուկ ալ պարփակած ըլլան իրենց մէջ նախապէս, իրենց տակառութենէն չեն կրնար խուսափիլ: Ուստի իրենց բնութիւնը իրագործած ըլլալու համար, նախ զիրենք ծախու հանած անձին առջեւէն կը վազեն ուղիղ, ապա բարձր ձայն հանելով կը կարծեն հեղինակութիւն շահած ըլլալ, իսկ ամէնուն վրայ ալ՝ յաղթանակ…:

ԵՐԵՒԱՆ, «Փանորամա».– Նշանաւոր երաժշտահան Արամ Խաչատրեանի 110ամեակին նուիրուած նախաձեռնութիւնները արդէն ընթացք առած են. կ՛ակնկալուին տարբեր տեսակի հետաքրքրական այլ ձեռնարկներ եւս։ Այս մասին լրագրողներուն ըսած է Արամ Խաչատրեանի անուան տուն–թանգարանի տնօրէն, Խաչատրեանի անուան եռեակի դաշնակահար, երաժշտանոցի փրոֆեսէօր Արմինէ Գրիգորեանը։
Ան փոխանցած է, որ Սեպտեմբերին պիտի կայանայ «Արամ Խաչատրեանը եւ արդի աշխարհը» խորագիրով գիտաժողով՝ մշակոյթի նախարարութեան աջակցութեամբ։ Տարբեր երկիրներէ մասնագէտներ պիտի մասնակցին ժողովին։
Ըստ Գրիգորեանի, «Ոսկէ ծիրան» փառատօնի ծիրին մէջ պիտի կատարուի Արամ Խաչատրեանի երաժշտական ժապաւէններու ցուցադրութիւն։
Յառաջիկայ ամիս Ա. Խաչատրեանի տուն–թանգարանի հրաւէրով Հայաստան պիտի այցելէ Ա. Խաչատրեանի աշակերտներէն Գէորգի Սպելեցիսը։ Հեղինակային երեկոյին ընթացքին ան պիտի կատարէ Խաչատրեանի ստեղծագործութիւնները, պիտի պատմէ իր յուշերը։
Հանդիսութիւններուն ընթացքին պիտի հնչեն նաեւ ցարդ չներկայացուած կամ շատ քիչ ներկայացուած ստեղծագործութիւններ։
Ա. Խաչատրեանի նուիրուած նախաձեռնութիւններ պիտի կազմակերպուին նաեւ Հայաստանէն դուրս եւ օտար հանրութեան։

ԵՐԵՒԱՆ, «Փան Արմինիըն».– «Դինամօ» մարզադահլիճին մէջ 17 Մայիսին սկսած են հայկական առաջին փոխպատուաստման (թրանսփլենթ) խաղերը, որոնց ընթացքին ելոյթ պիտի ունենան փոխպատուաստուած օրկաններով մարդիկ:
ԱՊՀի մէջ Հայաստանը առաջին երկիրն է, ուր կը կայանան նմանատպ խաղեր: Այս խաղերով հայ մարզիկները կարելիութիւն պիտի ունենան մասնակցելու Համաշխարհային թրանսփլենթ խաղերուն, որոնք առաջին անգամ տեղի ունեցած են Լոնտոնի մէջ 1978 թուականին:
Խաղերուն կը մասնակցին 18 մարզիկներ: Պիտի կայանան փինկ–փոնկի, լողի, պոլինկի, թենիսի եւ վազքի մրցումներ: Բացման արարողութեան ընթացքին Հայաստանի մէջ Փոխպատուաստման ծրագիրի ղեկավար, փրոֆ. Արա Բաբլոյան դիտել տուած է, որ այս խաղերը շատ կարեւոր իրադարձութիւն են ողջ Հայաստանի համար:
«Սա շատ մեծ ձեռքբերում է, քանի որ մենք ծանր ճանապարհ ենք անցել մինչեւ սկսել ենք Հեաաստանում իրականացնել փոխպատուաստման ծրագիրը: Ոչ ոք չէր հաւատում, որ մենք կը կարողանանք այն կեանքի կոչել», յայտնած է Արա Բաբլոյեանը: Կ՛ակնկալուի, որ այս խաղերուն մասնակցութիւնը եւ հետագայ մարզումները նպաստեն Հայաստանի մէջ ապրող փոխպատուաստուած օրկանով մարդոց կեանքի որակի, անոնց ֆիզիքական եւ հոգեկան վիճակի բարելաւման:
Նշենք, որ խաղերու փակումը տեղի պիտի ունենայ 18 Մայիսին։

ԹԱՐԶԱՆԱ, Քալիֆորնիա.- Արեւմտեան Սան Ֆերնանտօ հովիտի ու Հոլիվուտի հայութեան համագործակցութեամբ, Շաբաթ, Մայիս 11ին, Թարզանայի մէջ տեղի ունեցաւ Լոս Անճելըսի քաղաքապետի պաշտօնին թեկնածու Էրիք Կարսեթիի ընտրապայքարին ի նպաստ դրամահաւաքի ձեռնարկ մը, որուն ընթացքին կարելի եղած է գրեթէ 50,000 տոլար գոյացնել՝ վերջին երկու շաբաթներուն Էրիք Կարսեթիի ընտրապայքարին ի նպաստ հայութեան գոյացուցած

ընդհանուր գումարը 100,000 տոլարի հասցնելով:
Համայնքի աւելի քան 100 ղեկավարներ ու համակիրներ ներկայ էին Մայիս 11ին, տէր եւ տիկին Ռաֆֆի ու Մարալ Սարգիսեաններու բնակարանին մէջ կայացած դրամահաւաքի ձեռնարկին, որ առիթ մը եղաւ Ամերիկայի Հայ Դատի յանձնախումբին, ՀՕՄին, ՀՄԸՄին, ՀԵԴին, Միացեալ հայ երիտասարդներ կազմակերպութեան ու շարք մը այլ կազմակերպութեանց անդամներու, շնորհակալութիւն յայտնելու հայութեան ի նպաստ Կարսեթիի տարած աշխատանքին համար, միաժամանակ՝ գործնականապէս նեցուկ կանգնելու անոր ընտրապայքարին:
Հիւրընկալութեանց իրենց մասնակցութիւնը բերին Հոլիվուտէն մինչեւ Ուուտլընտ Հիլզի հայութեան ներկայացուցիչներ, ներառեալ՝ Սիլվիա Մինասեան, Յարութ եւ Օժէն

Բրուտեաններ, Ռաֆֆի եւ Մարալ Սարգիսեաններ, Քրիսթին Ճերեան-Խարմանտալեան, Լուիս Մարտիրոսեան-Կիլ եւ Նարեկ Կիցինեան:
Էրիք Կարսեթիի նեցուկ կանգնող ընտրեալ պաշտօնատարներ եւս ներկայ էին սոյն հաւաքին. անոնց շարքին էին Քալիֆորնիոյ նահանգային խորհրդարանի անդամ Ատրին Նազարեան, ինչպէս նաեւ Լոս Անճելըսի քաղաքապետական խորհուրդի անդամներ Փօլ Գրիգորեան եւ Փօլ Քորեց:
Նշեալ պաշտօնատարներէն իւրաքանչիւրը արտայայտուեցաւ Կարսեթիի հետ իր ունեցած սերտ յարաբերութիւններուն մասին՝ միաժամանակ շեշտելով, թէ Կարսեթի շարունակաբար առաջ մղած է եւ քաջալերած Հայաստանի եւ Լոս Անճելըսի հայութեան նպաստաւոր նախաձեռնութիւններ:
Հիւրընկալ Ռաֆֆի Սարգիսեան, իր կարգին, շեշտը դրաւ այն իրողութեան վրայ, որ Կարսեթի արդէն իսկ համայնքէն ներս իր ընտրապայքարին աջակցողներու յատկանշական փաղանգ մը կրցած է գոյացնել, եւ աւելցուց. «Մեր համայնքին ներկայացուցիչները կ՛ուզեն համագործակցիլ՝ Էրիք Կարսեթին Լոս Անճելըսի քաղաքապետ ընտրելու համար: Էրիք շարունակաբար նեցուկ կանգնած է Լոս Անճելըսի տարբեր շրջաններու մէջ ապրող հայկական համայնքներուն, եւ ուրախ ենք, որ այդ համայնքներուն ներայացուցիչները որոշած են այսօր գործնականապէս աջակցիլ Կարեսթիին ու անոր ընտրապայքարին»:
Ապա ելոյթ ունեցաւ Կարսեթի՝ շեշտելով, թէ Լոս Անճելըսի հայութիւնը որոշիչ դերակատարութիւն ունի այս տարուան ընտրութեանց մէջ: «Ցարդ գործակցելու շատ առիթներ ունեցած ենք, ըլլայ ատիկա ովկիանոս մը անդին, Արարատ լերան շուքին տակ, կամ հոս՝ Հոլիվուտի լերան ստորոտին: Ամէն առիթով, մենք կրցած ենք ցոյց տալ աշխարհին, թէ մեր համագործակցութեան արդիւնքը կրնայ ըլլալ արդարութեան, առիթներու եւ յիշողութեան աշխարհ մը, այնպիսի աշխարհ մը, որ մեզի կը դնէ ճշգրիտ ուղիին վրայ», աւելցուց Էրիք Կարսեթի:
Ան նաեւ յատկանշական նկատեց, որ հաւաքին ներկայ են մեծ թիւով կազմակերպութեանց ներկայացուցիչներ, որոնց հետ ինք անցեալին առիթ ունեցած է գործակցելու, եւ այդ գործակցութեան շնորհիւ կարելի եղած է տարբեր ձեւի սպասարկութիւններ ապահովել շրջանի հայութեան:
Աւարտին, ան յատուկ շնորհակալութիւն յայտնեց իր անձնակազմի այն անդամներուն, որոնք իր գրասենեակին ու շրջանին միջեւ կամուրջ մը հանդիսացած են՝ կենսական ծառայութիւններ ապահովելով հայութեան: Ան մատնանշեց յատկապէս Քրիսթին Ճերեանի, Արսէն Մելիքեանի ու Պայծառ Թովմասեանի ներդրումները:
Յայտնենք, թէ Էրիք Կարսեթի չորս առիթներով ընտրուած է Լոս Անճելըսի քաղաքապետական խորհուրդի նախագահ՝ այդ պաշտօնին վրայ մնալով 2006էն մինչեւ 2012: Ան ներկայիս եւս անդամ է Լոս Անճելըսի քաղաքապետական խորհուրդին՝ ներկայացնելով անոր 13րդ ընտրաշրջանի ժողովուրդը, որուն սահմաններէն ներս կ՛ապրի նաեւ Փոքր Հայաստանի հայութիւնը:
Կարսեթիի ընտրապայքարին նեցուկ կանգնողներէն մէկն է «Լոս Անճելըս Թայմզ» թերթը, որ գրած է, թէ «13րդ ընտրաշրջանին մէջ Կարսեթիի կատարած իրագործումները պէտք է օրինակ ըլլան ուրիշներուն»:

Էրիք իր պաշտօնավարութեան ընթացքին հայութեան ի նպաստ շարք մը քայլեր առած է: Օրինակի համար, ան Հայաստան այցելած է՝ Երեւանն ու Լոս Անճելըսը քոյր քաղաքներ դարձնելու ծրագիրը իրականացնելու նպատակով. շարունակաբար կոչ ըրած է Միացեալ Նահանգներու գործադիր իշխանութիւններուն, որ պաշտօնապէս ճանչնան Հայկական Ցեղասպանութիւնը, ինչպէս նաեւ Արցախի անկախութիւնը: Կարսեթի նաեւ Ծիծեռնակաբերդ այցելած է՝ ծաղկեպսակ մը զետեղելով ի յիշատակ Հայոց Ցեղասպանութեան

զոհերուն:
Լոս Անճելըսի քաղաքապետական խորհուրդի ծիրէն ներս, ան նեցուկ կանգնած է քուէաթղթիկներուն վրայ հայերէնով բացատրականներ դնելու գաղափարին, ինչպէս նաեւ համահովանաւորած է Փոքրիկ Հայաստանի մէջ Հայաստանի անկախութեան օրուան տարեկան փառատօները, որոնք տեղի կ՛ունենան Հոլիվուտի մէջ: Ան նաեւ աշխատանք տարած է աջակցութիւն ապահովելու ՀՕՄի Ընկերային սպասարկութեան կեդրոններուն, ինչպէս նաեւ մասնակցութիւն բերած է ՀԵԴի գլխաւորութեամբ տեղի ունեցող Փոքրիկ Հայաստանի մաքրութեան արշաւներուն: Կարսեթի աջակցութիւն տրամադրած է նաեւ Հայ ոսկրածուծի նուիրատուներու հիմնադրամին ու Հոլիվուտի Հայ Դատի յանձնախումբի գործունէութեան:
Էրիք Կարսեթի հասակ նետած է Սան Ֆերնանտօ հովիտին մէջ եւ իր Պսակաւոր ու Մագիստրոս արուեստից վկայակնները ստացած է «Քոլոմպիա» համալսարանէն: «Ռոտզ» կրթանպաստով, Կարսեթի ուսումը շարունակած է «Օքսֆորտ» ու Լոնտոնի Տնտեսութեան համալսարաններուն մէջ, որմէ ետք դասաւանդած է «Օքսիտենթըլ» եւ Հարաւային Քալիֆորնիոյ համալսարաններուն մէջ: Ան չորրորդ սերունդի լոսանճելըսցի մըն է ու ներկայիս կ՛ապրի Սիլվըր Լէյք, իր կնոջ ու մէկ տարեկան աղջնակին հետ: Ան նաեւ ամերիկեան ծովուժին մէջ պահեստի զինուոր, դաշնակահար ու լուսանկարիչ է:
Յաւելեալ տեղեկութեանց համար, դիմել Շանթ Յակոբեանին՝ (818) 533-1918 թիւով:

ԵՐԵՒԱՆ, «Արմէնփրէս».–  Արցախի Հանրապետութեան արտաքին գործոց նախարարութեան պատուիրակութիւնը՝ Լեռնային Ղարաբաղի Հանրապետութեան արտաքին գործոց նախարար Կարէն Միրզոյեանի գլխաւորութեամբ, կը մասնակցի Աբխազիոյ Հանրապետութեան արտաքին քաղաքական նախարարութեան ստեղծման 20րդ տարեդարձին

նուիրուած ձեռնարկներուն:
Լեռնային Ղարաբաղի արտաքին գործոց նախարարութեան մամլոյ ծառայութեան կողմէ փոխանցուած լուրերուն համաձայն, Միրզոյեանը ելոյթ ունեցած է 17 Մայիսին  կայացած հանդիսաւոր նիստին ընթացքին. ան շնորհաւորած է աբխազ գործընկերները՝ յոբելեանի առիթով եւ նշած, որ Արցախի մէջ մեծ ուշադրութեամբ կը հետեւին Աբխազիոյ մէջ տեղի ունեցող իրադարձութիւններուն՝ ուրախանալով արձանագրուած յաջողութիւններուն համար:
«Վերջին տարիներին աշխարհում տեղի ունեցող իրադարձութիւնները ապացուցում են, որ ժողովրդի ինքնորոշման իրաւունքի իրականացումը շարունակում է մնալ միջազգային վէճերի լուծման ամենաօպտիմալ միջոցը», յայտնած է նախարարը: Հարաւային Կովկասում կայունութեան կարելի է հասնել տարածաշրջանային համագործակցութեան միջոցով», յայտարարած է ան։
Իր խօսքին մէջ Միրզոյեան ընդգծած է, թէ խաղաղ կարգաւորումը ընդհանուր գերակայութիւն է երկու հանրապետութիւններուն համար: «Մենք շահագրգռուած ենք, որ Հարաւային Կովկասը լինի կանխատեսելի, կայուն, բարեկեցիկ, իսկ դա կարող է լինել տարածաշրջանային համագործակցութեամբ՝ հիմնուած ներգրաւման, այլ ոչ բացառման սկզբունքի վրայ: Ազգային վերածննդի շարժումը, որ միաւորում է Աբխազիայի եւ Ղարաբաղի ժողովուրդներին ընդհանուր իդէալների եւ սկզբունքների շուրջ, աւարտուեց անկախութեան ձեռքբերմամբ», յայտնած է Միրզոյեան։
Նախարարը նկատել տուած է, թէ այսօր արտաքին քաղաքական դաշտին մէջ Լեռնային Ղարաբաղի եւ Աբխազիոյ դիմաց կայ առանցքային խնդիր մը՝ միջազգային հանրութեան կողմէ հասնել ճանաչման եւ դառնալ անոր լիիրաւ անդամը:
Նոյն օրը Արցախի պատուիրակութիւնը հանդիպում ունեցած է Աբխազիոյ արտաքին գործոց նախարար Վեաչեսլաւ Չիրիկպայի հետ. կողմերը քննարկած են երկու երկիրներու արտաքին քաղաքական նախարարութիւններու հետագայ փոխգործակցութեան հեռանկարները եւ փոխադարձ հետաքրքրութիւն ներկայացնող հարցեր:
Յոբելեանի ծիրին մէջ տեղի ունեցած է Արցախի, Աբխազիոյ, Հարաւային Օսեթիոյ եւ Մերձտնեսթրի արտաքին գործոց նախարարներու նիստ, որուն ընթացքին քննարկուած են երկկողմանի եւ բազմակողմանի համագործակցութեան զարգացման ու ամրապնդման առնչուող հարցեր:
Այցելութեան ընթացքին կայացած է նաեւ արցախեան պատուիրակութեան հանդիպումը Աբխազիոյ հայկական համայքի ներկայացուցիչներուն հետ:

ԵՐԵՒԱՆ, «Նիուզ».- ԵԱՀԿ Մինսկի խմբակի համանախագահները Ուրբաթ, Մայիս 17ին, Քրաքով քաղաքին մէջ հանդիպում մը ունեցած են Հայաստանի եւ Ատրպէյճանի արտաքին գործոց նախարարներ Էդուարդ Նալբանդեանի եւ Էլմար Մամետեարովի հետ:
Ժագ Ֆոր (Ֆրանսա), Իկոր Փոփով (Ռուսիա), Իան Քելի (Միացեալ Նահանգներ) եւ ԵԱՀԿի գործող նախագահի անձնական ներկայացուցիչ Անճէյ Քասփըրչիք նախարարներուն հետ քննած են բանակցութիւնները առաջ մղելու կարելիութիւնները:
Նախարարները միտքեր փոխանակած են ընթացիկ իրավիճակին վերաբերեալ եւ վերահաստատած են իրենց հաւատարմութիւնը խաղաղութեան գործընթացին նկատմամբ:
Համանախագահները դարձեալ յայտարարած են, թէ լարուածութիւնը սրող կամ խաղաղ գործընթացին վնասող գործողութիւններէն կամ հռետորաբանութենէն պէտք է հեռու մնալ: Միջնորդները քննարկած են նաեւ վստահութեան ամրապնդման շարք մը միջոցներ, որոնք կրնան նպաստել բարենպաստ մթնոլորտի ստեղծման: Համանախագահները Մայիսի վերջաւորութեան դարձեալ պիտի այցելեն տարածաշրջան, Հայաստանի եւ Ատրպէյճանի նախագահներուն հետ քննելու համար Արցախի տագնապը:

ԵՐԵՒԱՆ, «Սիվիլնեթ».– Հայ համայնքը լաւատես է Սուրիոյ ապագային նկատմամբ։ «Սիվիլնեթ»ի հետ ունեցած զրոյցին ընթացքին այս հաստատումը կատարած է Բերիոյ թեմի ազգային առաջնորդարանի բանբեր Ժիրայր Ռէյիսեանը՝ աւելցնելով, թէ հայ համայնքը պատրաստ է դիմակայելու բոլոր դժուարութիւններն ու վատ զարգացումները:
Խօսելով հայաշատ թաղամասերուն մէջ տիրող իրավիճակին մասին՝ Ռէյիսեան յայտնած է, որ իրավիճակը հիմնականին մէջ կը շարունակէ մնալ նոյնը։
«Քաղաքի տարբեր շրջաններու մէջ զինուորական գործողութիւններ կը կատարուին, սակայն հայաշատ թաղամասերուն մէջ բախումները քիչ են ընդհանրապէս», դիտել տուած է Ռէյիսեան՝ չբացառելով սակայն զինուորական գործողութիւններու տարածման հաւանականութիւնը:
Պատասխանելով այն հարցումին, որ աշխատանք չունեցող մարդիկ ինչպէս կրնան գոյատեւել առանց եկամուտի՝ Ռէյիսեան յայտնած է, որ ժողովուրդի տնտեսական ընդհանուր վիճակը վատ է, սակայն այն քաղաքացիները, որոնք ընկերային շատ ծանր պայմաններու մէջ կ՛ապրին, կը դիմեն Հալէպահայ օգնութեան մարմինին, որ իր կարելիութեան սահմաններուն մէջ կ՛օգնէ անոնց։
Ռէյիսեան համաձայն չէ եղած այն գաղափարին, թէ առաջնորդարանը, եկեղեցին եւ հայ համայնքի ղեկավարութիւնը կը քաջալերեն հայերը՝ Սուրիոյ մէջ մնալու. ան յայտնած է, թէ ոեւէ մէկուն չի պարտադրուիլ մնալ Սուրիոյ մէջ, սակայն բոլորին աջակցութիւն կը ցուցաբերուի կարելիութեան սահմաններուն մէջ։
«Դպրոցներուն մէջ աշակերտներու թիւի նուազում կայ, սակայն ատիկա կարելի է բացատրել միայն արտագաղթով, որովհետեւ տեղի կ՛ունենան նաեւ քաղաքէ քաղաք տեղափոխութիւնները», բացատրած է Ռէյիսեան։

Շիֆ եւ Կրիմ

ՈՒԱՇԻՆԿԹԸՆ.- Ամերիկայի Հայ Դատի յանձնախումբը կը տեղեկացնէ, թէ մինչ Թուրքիոյ վարչապետ Ռեչեփ Թայիփ Էրտողան Հինգշաբթի, Մայիս 16ին Միացեալ Նահանգներ կ՛այցելէր, Քոնկրեսի հանրապետական եւ դեմոկրատ խումբ մը անդամներ «Հայկական Ցեղասպանութեան ճշմարտութիւնն ու արդարութիւն» բանաձեւը ներկայացուցին:
Բանաձեւը կոչ կ՛ընէ Միացեալ Նահանգներու նախագահին, որ ամերիկեան իշխանութեանց կողմէ Հայկական Ցեղասպանութեան ճանաչման վրայ հիմնուելով՝ բարելաւէ Հայաստան-Թուրքիա յարաբերութիւնները, երաշխաւորելով Թուրքիոյ կողմէ Ցեղասպանութեան իրականութեան ամբողջական ճանաչումն ու վնասուց հատուցումը:
«Կ՛ողջունենք սոյն բանաձեւին ներկայացումը Քոնկրես: Սոյն նորարար նախաձեռնութիւնը, որ հիմնուած է ամերիկեան նախկին իշխանութեանց կողմէ Հայկական Ցեղասպանութիւնը ճանչցող որոշումներուն վրայ եւ կոչ կ՛ընէ նոր մօտեցում որդեգրելու Հայաստանի եւ Թուրքիոյ միջեւ յարաբերութիւնները բարելաւելու գործընթացին համար, ինչ որ արտացոլացումը պիտի ըլլայ ամերիկեան արժէքներուն, ու նաեւ կը գիտակցի, թէ ամերիկեան ազգային շահերը կը պահանջեն, որ վերջ դրուի Թուրքիոյ ուրացման քաղաքականութեան: Այս բոլորին շնորհիւ կարելի պիտի ըլլայ արդարութեան, ճշմարտութեան ամբողջական լուծում մը գտնել Հայկական Ցեղասպանութեան հարցին», կը յայտնէ Ամերիկայի Հայ Դատի յանձնախումբի գործադիր վարիչ Արամ Համբարեան:
Սոյն բանաձեւը Ներկայացուցիչներու տան ներկայացուեցաւ Մայքըլ Կրիմի, Էտըմ Շիֆի, Տէյվիտ Վալտանոյի ու Ֆրենք Փալոնի կողմէ:
Անոր մէջ կը յիշուի, թէ Արդարադատութեան միջազգային ատեանին յղուած եւ Մայիս 28, 1951 թուակիր նամակի մը մէջ, Միացեալ Նահանգներու կառավարութիւնը ցեղասպանութիւն նկատած է Հայկական Ցեղասպանութիւնը: Այդ նամակը մաս կը կազմէր Ցեղասպանութեան ոճիրը կանխարգիլելու եւ պատժելու դաշինքին շուրջ կայացած քննարկումներուն:
Բանաձեւին մէջ նաեւ կը նշուի, թէ Ապրիլ 22, 1981ին, Միացեալ Նահանգներու նախագահ Ռանըլտ Ռիկըն եւս ճանչցած է Հայկական Ցեղասպանութիւնը, իսկ Միացեալ Նահանգներու Քոնկրեսը՝ 1975ին ու 1984ին: