Թուրքիոյ Լրագրողներու Միութեան Նախագահը Կը Բացայայտէ Հայկական Իր Ծագումը

ՓԱՆՈՐԱՄԱ.- Թրքական «Հիւրրիյէթ Տէյլի Նիուզ»ը կը հաղորդէ, որ Թուրքիոյ լրագրողներու միութեան նախագահ Ահմեթ Ապաքա գրած է գիրք մը, որուն մէջ նշած է, որ 82 տարեկանին մահացած իր մայրը՝ Հօշանան ունեցած է հայկական արմատներ:


Ան նշած է, որ 1915ի դէպքերուն, իր մօրը լքած են ալեւի ընտանիքի մը դռան առջեւ: Ահմեթ Ապաքա իր մօր պատմութեան մասին գրած է «Հօշանայի վերջին բառերը» գիրքին մէջ: Ապաքա նաեւ կը նշէ, որ իր մայրը այդ մասին պատմած է մահանալէ շաբաթներ առաջ միայն:
«Մայրս այս պատմութիւնը պատմած է 13 տարի առաջ եւ ատկէ քիչ ժամանակ ետք մահացած է: Ես ատոր մասին կրցած եմ գրել միայն 10 տարի ետք, որովհետեւ ես կը վարանէի: Ես հազիւ կրցած եմ գրել, արցունքները աչքերուս կը գրէի այդ մասին: Ես չէի պատկերացներ, որ ատիկա ինծի այդքան ցաւ պիտի պատճառէ», նշած է Ահմեթ Ապաքա «Հիւրրիյէթ Տէյլի Նիուզ»ի հետ զրոյցի ընթացքին:
«82 տարուայ գաղտնիք»՝ այս խորագիրը կը կրէ Ապաքայի եւ իր մօր հետ զրոյցի մանրամասնութիւնները: «Մայրս ինծի ստիպեց խոստանալ, որ ես անոր պատմութիւնը չեմ պատմեր ո՛չ կնոջս, ո՛չ աղջկաս կամ ալ անոր քոյրերուն, մինչեւ այն ատեն, որ ան ողջ է: Ես այս մասին խօսեցայ այն ժամանակ, երբ ան մահացաւ, գիտնալու թէ արդէօ՞ք այլ գաղտնիքներ ալ կան, որ պէտք է բացայայտել: Քոյրս ինձմէ խնդրեց չբացայայտել այդ մասին, որովհետեւ ես լրագրող եմ եւ կրնայ տեղի ունենալ այն, ինչ տեղի ունեցաւ Հրանդ Տինքին: Բարեկամներէս շատերը չեն կարողանար իրենց ինքնութիւնը ընդունիլ», նշած է Ապաքա:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top