Պատերազմի Ու Ցեղասպանութեան Երանգները Մեր Մասունքներում

0420SHE LOVES3

0420SHE LOVES1

Պատրաստեց՝ Անի Թադեւոսեանը

SHE LOVES կին նկարիչների խումբը Հայոց Ցեղասպանութեան յիշատակութեան օրերին ընդառաջ ներկայանում է MY RELIC «փոփ ափ» ցուցադրութեամբ, ուր մեր հաւաքական յիշողութիւնն է` ցասումն` ընդդէմ պատերազմի եւ կեանքի յարատեւութեան ապացոյցը: Համավարակի սահմանափակութեան շրջանակներում կազմակերպիչները հետաքրքիր լուծում են գտել` ցուցանմուշները տեղադրելով ցուցափեղկից այն կողմ, որը տեսանելի է օրուայ բոլոր ժամերին, դիտորդների կամ պարզապէս անցորդների համար:

Արցախեան վերջին պատերազմի մեր կորուստներն ու ցաւը աւելացրին Ցեղասպանութեան յիշատակութեան Ապրիլ ամսի մեր խոնարհումի չափաբաժինը: Եւ ինչքան էլ հեռու լինենք մեր հայրենիքից, միեւնոյն է, Գլենդելում Արցախ փողոց ենք ունենալու ու այնտեղ լաւաշով պատուած սենեակ ենք սարքելու, ապացուցելու, որ հեռանալով, ոչ թէ ազատւում ենք ցաւից, այլ ցաւն ենք տանում մեր հետ: Քիչ է լաւաշին սովորական սնունդ անուանել, այն մեր աղօթքի հացն է հանապազօրեայ, մեր պատմութիւնն է, մեր բարեկեցութիւնն է: Մեր աչքին այնքան հարազատ է լաւաշի մուգ ու բաց չալպուտուրիկ մակերեսը, որ ամէնուր է` պատերին, հագուստին, սպասքի ու կահոյքի վրայ:

0420SHE LOVES3

 

MY RELIC-ը մեր ինքնութեան պատմութեան յաջորդ էջն է բացում երկրորդ սենեակում, մեր մասունքների պատմութիւնը ներկայացնելով «գոբելեն»ների (ձեռագործ հիւսուածեղէն), թաշկինակների ու առարկաների օգնութեամբ: Մասուքները մեր պատմութեան եւ հաւաքական մտածողութեան կենդանի առարկաներ են, որոնք խթանում են մեր յիշողութիւնը: «Ճիշդ է, այս գաղափարը մեր խմբինն է, սակայն ցուցադրութեանը ներկայացուած իրերի մեծ մասը նուիրաբերել է համայնքը ուրեմն սա մեր բոլորի աշխատանքն է», ասում է համահիմնադիր Նելլի Սարգիսեանը:

Երրորդ սրահում դէպի Մասիս սար ուղղուած՝ նահատակուած հայերի երազն է, ուր հողի մէջ թաղուած կօշիկներն են, որոնց տէրերը այլեւս չկան, բայց քայլքի ուղղութիւնը մնացել է նոյնը` դէպի Մասիսը: Կօշիկների մէջ ծլած սերմեր են, նոր կեանք խորհրդանշող կանաչը, վերակենդանացած կեանքը, որ այդպէս էլ դարերով հաշուի չեն առնում մեր թշնամիները:

0420SHE LOVES4

 

«Համայնքի ներգրաւուածութեան օգնութեամբ, SHE LOVES խումբը նպատակ ունի ներկայացնել յետ-պատերազմեան պատմութիւնը` պատմութիւն, որը կենտրոնացած է ոչ թէ ատելութիւն, բռնարարքներ կամ ցաւ վերարտադրելու վրայ, այլ արուեստի օգնութեամբ` սէր, տոկունութիւն եւ կեանքի յարատեւութիւն հաստատելու վրայ», ասում է ցուցադրութեան համադրող եւ խմբի հիմնադիր Ադրինէ Բաղդասարեանը:

0420SHE LOVES2SHE LOVES կին արուեստագէտների խումբը մեծ հաւատ ունի, որ արուեստի ուժով կարելի է ընկերային փոփոխութիւններ ստեղծել: «Մենք այս աշխատանքը նուիրում ենք Արցախի եւ Հայաստանի հայ ժողովրդին, Սփիւռքում ապրող իւրաքանչիւր հայի: Ցեղասպանութիւն բառը հայերը շատ լաւ գիտեն: Մեր խմբի անդամների մի մասը Ցեղասպանութեան պատճառով տարհանուած հայերի ժառանգներ են: Այս աշխատանքով մենք յոյս ունենք, որ կը ստեղծենք նոր պատմութիւն, որտեղ մենք զոհեր չենք: Մենք վերապրողներ ենք եւ երբեք չենք լռելու», ասում է MY RELIC ցուցադրութեան արտադրող Անի Նինա Օգանեանը:

 

MY RELIC ցուցադրութիւնը հովանաւորւում է Գլենդելի Արուեստի եւ մշակոյթի յանձնաժողովի կողմից: SHE LOVES խմբին կը միանան այլ արուեստագէտներ, իրենց ելոյթներով լրացնելով սրահների խորհրդաւոր մթնոլորտը:

Այս ոչ աւանդական ցուցադրութիւնը շուրջօրեայ է, այնպէս, որ մինչեւ Ապրիլի 25ը ուշադիր եղէք Արցախ փողոցի 117, 123 եւ 127 հասցէներում գտնուող պատուհաններին` հանդիպելու մեր մասունքներին:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top