Արամ Ա. Վեհափառ Հայրապետին Ցաւակցագիրը՝ Վառդան Գրիգորեանի Մահուան Առիթով

ՎԳ

ՎԳ

 

Անթիլիաս, 19 Ապրիլ 2021

 

Գերաշնորհ

Անուշաւան Արք. Դանիէլեան

Առաջնորդ Ամերիկայի Արեւելեան Թեմին

Նիւ Եորք

 

Սիրելի՛ Սրբազան,

 

Խոր ցաւով իմացանք Մեծի Տանն Կիլիկիոյ կաթողիկոսութեան մօտիկ բարեկամ­ներէն եւ Հիւսիսային Ամերիկայի մեր համայնքի կարկառուն դէմքերէն՝ Վարդան Գրիգորեանի մահուան գոյժը։ Մեր խորազգած ցաւակցութիւնները կը յայտնենք ձեզի, Ազգային իշխանութեան եւ հանգուց­եալի հարազատներուն։

Արդարեւ, Վարդան Գրիգորեան իր ստանձնած պատասխանատու պաշտօններով ու բեղուն գործունէութեամբ եղաւ հանրածանօթ մտաւորական ու յարգուած անձնաւո­րութիւն՝ վայելելով հայ թէ օտար հասարակութեան սէրն ու յարգանքը, միանգամայն բարձր պահելով մեր ժո­ղովուրդին անունն ու վարկը ամերիկեան շրջանակներէն ներս։ Վարդան Գրիգորեան եղած է մօտիկ բարեկամներէն մէկը Մեր երջանկայիշատակ նախորդներուն՝ Զարեհ Ա., Խորէն Ա. եւ Գարեգին Բ. կաթողիկոսներուն, եւ սերտ գործակցութիւն ունեցած է Արեւելեան թեմի մեր Ազգային առաջնորդարանին հետ։ Մենք անձամբ ճանչցած ենք զինք եւ բարձր գնահատելով իր լայածա­ւալ գործունէութիւնը, 1997ի Հոկտեմբերին Արեւելեան թեմին տուած Մեր հովուապետական այցելութեան ընթացքին իրեն շնորհած ենք Մեծի Տանն Կիլիկիոյ կաթողիկոսութեան Իշխանի կարգի շքանշան։

Վարդան Գրիգորեան նաեւ օգտակար հանդիսացած է մեր ժողովուրդի դատի պաշտ­պան­ման, ինչպէս նաեւ մեր մշակութային ժառանգութեան պահպանման աշխա­տանքներուն` յատկապէս Իրանի Սուրբ Թադէի վանքի վերանորոգման իրականացման բերելով իր աջակցու­թիւնը։

Կ’աղօթենք առ Բարձրեալն Աստուած, որ Վարդան Գրիգորեանի հոգին ընդունի երկնային երանական խաղաղութեան մէջ, եւ Սուրբ Հոգւոյն միջոցաւ մխիթարէ իր հարազատներն ու սգակիր բարեկամները։ Յիշատակն արդարոյն օրհնութեամբ եղիցի։

 

Սիրոյ ջերմ ողջունիւ,

 

Աղօթարար՝

ԱՐԱՄ Ա. ԿԱԹՈՂԻԿՈՍ

ՄԵԾԻ ՏԱՆՆ ԿԻԼԻԿԻՈՅ

 

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top