Փասատինայի Հայկական Ճեմարանը Ծառատունկով Կը Տօնէ Իր Անդրանիկ Տարեվերջը

0504blair

0504blair

Փասատինա քաղաքի Պլեր վարժարանի (Blair High School) մէջ այս տարի գործել սկսած Հայկական Ճեմարանը ծառատունկով մը կը տօնէ իր ուսումնական անդրանիկ տարուան աւարտը:

Վարժարանը որոշած է ATP (Armenia Tree Project) կազմակերպութեան համագործակցութեամբ՝ իւրաքանչիւր 50 աշակերտի անունով ծառ մը տնկել Հայաստանի Աշտարակ քաղաքին մէջ: Այդ ծառերը մաս պիտի կազմեն նոյն կազմակերպութեան կողմէ հիմնուած սփիւռքահայ վարժարաններու յատուկ անտառին:

Հարցումին, թէ Ճեմարանը ինչո՛ւ որոշած է Հայաստանի մէջ ծառատունկ կատարել՝ նորաստեղծ վարժարանի վարիչ Նորայր Տատուրեան այսպէս արտայայտուեցաւ. «Այդ յիսուն ծառերը խորհրդանշական են: Ծառը կը ներշնչէ բարձր գաղափարներ, ինչպէս՝ յաւերժութիւն, հողի եւ մարդու կապը, համեստօրէն ծառայել, պտղատու ըլլալ… Այս ծրագրին շնորհիւ մեր աշակերտները արմատ կը դնեն հայրենի հողին մէջ: Մեր նպատակն է՝ Սփիւռք-Հայաստան կապը ամուր եւ մնայուն պահել ու այդ ուղղութեամբ դաստիարակել հայրենանուէր սերունդներ»:

Աշակերտները ծառատունկի իբրեւ յիշատակ՝ կը ստանան ATP-ի կողմէ պատրաստուած գեղատիպ շնորհակալագիր եւ շապիկ մը:

Վարժարանին՝ Հայաստան-Փասատինա կապերու մէկ այլ դրսեւորումն էր Երեւանի «Գաֆէսճեան» արուեստի կեդրոնին հետ սկսած ուսումնական կապը: Աշակերնտերը հեռակայ դրութեամբ հետեւեցան կեդրոնին կողմէ պատրաստուած բազմաթիւ կրթական ծրագիրներու, ինչպէս՝ «Հայկական պետական նշաններ», «Դիմակը պատմութեան մէջ», «Հայկական թռչնագիրը», եւ այլն: Դասընթացքները ներկայացուց կեդրոնի կրթութեան գծով տնօրէն Լիզա Շիրինեան:

Հայկական Ճեմարանը կը գործէ Փասատինայի միացեալ կրթաշրջանի (PUSD) երդիքին եւ հովանաւորութեան տակ: Իբրեւ պետական վարժարան (6-12 րդ դասարաններ)՝ անիկա անվճար հայեցի դաստիարակութիւն կը մատուցէ թէ՛ Փասատինայի եւ թէ յարակից քաղաքներու հայորդիներուն: Ճեմարանը ունի վարկաւորուած (accredited) ամբողջական հայկական ծրագիր եւ ունի հայերէնի բոլոր մակարդակներուն համար դասարաններ: Արձանագրուելու կամ այլ տեղեկութիւններ ստանալու համար հեռաձայնել Թալին Նազարեանին՝ (626) 396 5820 (ext. 80124) թիւով:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top