Լիբանան Կը Շարունակէ Գոյատեւել Կատարեալ Անորոշութեան Մէջ

0504leb

0504leb

 

ՊԷՅՐՈՒԹ, «Ազդակ»․- Լիբանանի նախագահ Միշէլ Աուն 3 Մայիսի երեկոյեան նախագահական պալատին մէջ ընդունեց վարչապետի պաշտօնակատար Հասսան Տիապը, որուն հետ քննարկեց տնտեսական տագնապին դէմ դնելու համար, քաղաքացիներուն աջակցելու կարելիութիւնները:

Տիապ Պաապտայէն մեկնեցաւ առանց յայտարարութիւն կատարելու, սակայն ան հարցազրոյցի մը ընթացքին յայտնեց, որ 750 հազար լիբանանցի ընտանիքներու տրամադրուելիք յատկացումներու քարտին ծախսը շուրջ մէկ միլիառ տոլար պիտի ըլլայ: Ան նշեց, որ յատկացումներու քարտը ընտանիքներուն պիտի տրամադրէ 2էն 3 միլիոն լիբանանեան ոսկիի միջեւ տարուբերող գումարներ, ըստ ընտանիքի անդամներու թիւին եւ կարիքներուն:

Նշենք, որ առաւօտեան Աուն նախագահեց հարաւային Լիբանանի ծովային սահմանագծումի մանրամասնութիւնները քննարկելու նիստի մը` սահմանագծումի բանակցութիւններուն մասնակցող լիբանանեան խորհուրդի անդամներուն հետ:

Մամլոյ ազատութեան միջազգային օրուան առիթով, նախագահ Աուն ողջունեց լրագրողները` կոչ ուղղելով, որ տեղեկատուութիւնը ըլլայ իրաւունքի ձայնը, իսկ տեղեկատուութեան մարզին մէջ օգտագործուած բառերը դառնան փտածութիւնը եւ արժեզրկումը հարուածող սուրեր:

Միւս կողմէ, Աշխատաւորներու տօնին առիթով նախագահ Աուն յայտնեց, որ իրեն համար առաջնահերթութիւն է շարունակել ճիգերը` իրականացնելու համար բարեկարգումը եւ ապահովելու համար աշխատաւորներուն իրաւունքները:

Իր կարգին, խորհրդարանի նախագահ Նեպիհ Պըրրի շնորհաւորեց լիբանանցի աշխատաւորները` մաղթելով, որ բոլորը իսկապէս նեցուկ կանգնին աշխատաւորներուն:

Մինչ լիբանանցի ղեկավարներ կը կատարեն այս յայտարարութիւնները, Լիբանան եւ լիբանանցիները կը շարունակեն մնալ մութ փապուղիի մը մէջ. տնտեսական տագնապը կը շարունակէ յամենալ. քաղաքացիները ամէն իմաստով անորոշութեան ենթարկուած են` իրենց սեփական գումարներուն ճակատագիրին մասին տեղեկութիւններ ունենալու, օրուան ապրուստը ապահովելու եւ երկրին մէջ իրենց կեանքը շարունակելու իմաստով:

Պէտք է աւելցնել նաեւ, որ «Քորոնա» ժահրով վարակուածներուն եւ այդ ժահրին պատճառած մահուան պարագաներուն համեմատութիւնը նուազած է եւ երկրին մէջ «Քորոնա» համաճարակին արձանագրուած բարելաւումը զգալի է:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top